ಸೇಡಂ | ಈಶಾನ್ಯ ಪದವೀಧರ ಕ್ಷೇತ್ರ: 4,010 ನೋಂದಣಿ

ಸೆಪ್ಟೆಂಬರ್ ತಿಂಗಳಿಂದ ನೋಂದಣಿ ಕಾರ್ಯ ಆರಂಭಗೊಂಡಿತ್ತು. ಕಳೆದ ಒಂದೂವರೆ ತಿಂಗಳಲ್ಲಿ ಸೇಡಂ ತಾಲ್ಲೂಕಿನಲ್ಲಿ ಮತದಾರರ ನೋಂದಣಿ ಅಭಿಯಾನವನ್ನು ತಹಶೀಲ್ದಾರ್ ಕಚೇರಿ ಆಯೋಜಿಸಿತ್ತು. ಅಲ್ಲದೆ ಕಾಲೇಜು-ವಕೀಲರ ಸಂಘ ಸೇರಿದಂತೆ ವಿವಿಧೆಡೆಗಳಲ್ಲಿ ಜಾಗೃತಿ ಅಭಿಯಾನ ಮಾಡಲಾಗಿತ್ತು. ಕಂದಾಯ ಇಲಾಖೆ, ಸಿಡಿಪಿಒ ಇಲಾಖೆ ಹಾಗೂ ವಿವಿಧ ಇಲಾಖೆಗಳ ಸಹಯೋಗದಲ್ಲಿ ನಡೆದ ಅಭಿಯಾನದಿಂದಾಗಿ ಹೆಚ್ಚಿನ ಸಂಖ್ಯೆಯಲ್ಲಿ ನೋಂದಣಿಯಾಗಿದೆ.

‘ಈ ಹಿಂದೆ ಸುಮಾರು 1,130 ಮಾತ್ರ ಪದವೀಧರರ ಹೆಸರು ಮಾತ್ರ ಮತದಾರರ ಪಟ್ಟಿಯಲ್ಲಿತ್ತು. ಆದರೆ ಈ ಬಾರಿ ಪದವಿ ಪಡೆದ ನಾಲ್ಕು ಸಾವಿರಕ್ಕೂ ಅಧಿಕ ಮಂದಿ ತಮ್ಮ ಹೆಸರನ್ನು ನೋಂದಾಯಿಸಿದ್ದಾರೆ’ ಎಂದು ತಹಶೀಲ್ದಾರ್ ಕಚೇರಿಯ ಚುನಾವಣೆಯ ಶಾಖೆಯ ಮೂಲಗಳು ತಿಳಿಸಿವೆ.

ಪದವೀಧರ ಮತದಾರರ ಪಟ್ಟಿಯಲ್ಲಿ ಹೆಸರು ನೋಂದಣಿಯಲ್ಲಿ ಸೇಡಂ ತಾಲ್ಲೂಕು ಕಲಬುರಗಿ ಜಿಲ್ಲೆಗೆ ಮೂರನೇ ಸ್ಥಾನದಲ್ಲಿದೆ. ಪ್ರಥಮ ಸ್ಥಾನ ಕಲಬುರಗಿ ದಕ್ಷಿಣ 8,240, ದ್ವಿತೀಯ ಕಲಬುರಗಿ ಉತ್ತರ 6,248 ನೋಂದಣಿಯಾಗಿದೆ’ ಎಂದು ಮೂಲಗಳು ತಿಳಿಸಿವೆ.

ಕರಡು ಮತದಾರರ ಪಟ್ಟಿ ನವೆಂಬರ್ 23 ರಂದು ಪ್ರಕಟಗೊಳ್ಳಲಿದ್ದು, ಆಕ್ಷೇಪಣೆಗೆ ಡಿಸೆಂಬರ್ 9ರವರೆಗೆ ಅವಕಾವಿದೆ. ಅಂತಿಮ ಮತದಾರರ ಪಟ್ಟಿ ಡಿಸೆಂಬರ್ 30ರಂದು ಪ್ರಕಟಕೊಳ್ಳಲಿದೆ.