ಮಡಿಕೇರಿ: ಇಲ್ಲಿನ ಗಾಂಧಿ ಮೈದಾನದಲ್ಲಿ ಮಡಿಕೇರಿ ನಗರ ದಸರಾ ಸಮಿತಿ ಏರ್ಪಡಿಸಿರುವ ಮಡಿಕೇರಿ ದಸರಾ ಜನೋತ್ಸವದ ಸಾಂಸ್ಕೃತಿಕ ಕಾರ್ಯಕ್ರಮಗಳು 3ನೇ ದಿನವಾದ ಗುರುವಾರ ಸಭಿಕರಿಗೆ ಭರಪೂರ ಮನರಂಜನೆ ಒದಗಿಸಿದವು.
ಇದಕ್ಕೂ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಕೊಡಗು ವೈದ್ಯಕೀಯ ವಿಜ್ಞಾನ ಕಾಲೇಜಿನ ಡೀನ್ ಮತ್ತು ನಿರ್ದೇಶಕ ಡಾ.ಕಾರ್ಯಪ್ಪ, ‘ಮುಂದಿನ ವರ್ಷ ದಸರೆ ಸಂಭ್ರಮದಲ್ಲಿ ಕಾಲೇಜೂಭಾಗಿಯಾಗಲಿದೆ’ ಎಂದರು.
ಕಾಲೇಜಿನಲ್ಲಿರುವ ವಿವಿಧ ಬಗೆಯ ಸೌಲಭ್ಯಗಳು, ಆಸ್ಪತ್ರೆಯಲ್ಲಿ ರೋಗಿಗಳಿಗೆ ದೊರಕುವ ಅತ್ಯಾಧುನಿಕ ಚಿಕಿತ್ಸೆ ಸೇರಿದಂತೆ ಹಲವು ಬಗೆಯ ವಸ್ತುಪ್ರದರ್ಶನ ಏರ್ಪಡಿಸಲಾಗುವುದು. ಇದರಿಂದ ಸಾರ್ವಜನಿಕರಿಗೆ ಮಾಹಿತಿ ದೊರಕಿ ಅವರು ಅನಾರೋಗ್ಯಪೀಡಿತರಾದರೆ ಚಿಕಿತ್ಸೆ ಪಡೆಯಲು ಅನುಕೂಲವಾಗುತ್ತದೆ ಎಂದು ಹೇಳಿದರು.
ಮುಡಾದ ಮಾಜಿ ಅಧ್ಯಕ್ಷರಾದ ಚುಮ್ಮಿ ದೇವಯ್ಯ ಮಾತನಾಡಿ, ‘ಗಾಂಧಿ ಮೈದಾನದಲ್ಲಿ ಸೊಗಸಾದ ಮಂಟಪ ನಿರ್ಮಾಣವಾಗಿದೆ. ಇದನ್ನು ಸದುಪಯೋಗಪಡಿಸಿಕೊಳ್ಳಬೇಕು. ಪುಂಡರು, ಸೋಮಾರಿಗಳು, ಜಾನುವಾರುಗಳ ತಾಣವಾಗದಂತೆ ನೋಡಿಕೊಳ್ಳಬೇಕು’ ಎಂದು ತಿಳಿಸಿದರು.
ಮಂಗಳೂರಿನ ಅರೆಹೊಳೆ ಪ್ರತಿಷ್ಠಾನದವರು ಪ್ರಸ್ತುತಪಡಿಸಿದ ‘ಸಂಗೀತ ನೃತ್ಯ ವೈವಿಧ್ಯ’ವು ನೋಡುಗರನ್ನು ಬಹುವಾಗಿ ಸೆಳೆಯಿತು. ಮಡಿಕೇರಿಯ ಡ್ಯಾನ್ಸ್ ಲ್ಯಾಬ್ ಅಂಡ್ ಫಿಟ್‌ನೆಸ್‌ ಸ್ಟುಡಿಯೊ ಹಾಗೂ ಆವಂದೂರಿನ ಇಂಚರಾ ಕಲಾ ತಂಡದವರ ‘ನೃತ್ಯ’, ಕುಶಾಲನಗರದ ಸಂವೇದಿತಾ ಅವರ ಗೀತಗಾಯನ, ಕೊಡಗು ಪತ್ರಕರ್ತರ ಸಂಘದ ‘ಗಾನ ವೈವಿಧ್ಯ’, ಕೂರ್ಗ್ ಹನಿ ಮೆಲೊಡಿಸ್ ತಾತಂಡ ಪ್ರತಾಪ್ ಬೆಳ್ಯಪ್ಪ ಮತ್ತು ಸಂಗಡಿಗರ ‘ಸಂಗೀತ ರಸಮಂಜರಿ’ಗಳು ಸಭಿಕರನ್ನು ಸೂಜಿಗಲ್ಲಿನಂತೆ ಸೆಳದವು.
