ಮಡಿಕೇರಿ | 5 ತಿಂಗಳಿಂದ ಪಾವತಿಯಾಗದ ವೇತನ: ಅತಿಥಿ ಉಪನ್ಯಾಸಕರ ಮೌನ ಪ್ರತಿಭಟನೆ

ತರಗತಿ ಬಹಿಷ್ಕರಿಸಿ ಕಾಲೇಜಿನ ಮುಂಭಾಗ ಯಾರ ವಿರುದ್ಧವೂ ಘೋಷಣೆ ಕೂಗದೇ ಮೌನವಾಗಿಯೇ ಕುಳಿತು ಧರಣಿ ನಡೆಸಿದರು.

ಈ ವೇಳೆ ಮಾತನಾಡಿದ ಅತಿಥಿ ಉಪನ್ಯಾಸಕರೊಬ್ಬರು, ‘ಕಳೆದ ಅಕ್ಟೋಬರ್‌ನಿಂದ 5 ತಿಂಗಳುಗಳಿಂದ ವೇತನ ಪಾವತಿಯಾಗಿಲ್ಲ. ಕೋವಿಡ್‌ ಕಾಲದ 3 ತಿಂಗಳ ವೇತನವನ್ನೂ ನೀಡಿಲ್ಲ. ಒಟ್ಟು 8 ತಿಂಗಳ ಕಾಲ ವೇತನ ಪಾವತಿಸಬೇಕು’ ಎಂದು ಆಗ್ರಹಿಸಿದರು.

‘ಮಕ್ಕಳ ಹಿತದೃಷ್ಟಿಯಿಂದ ನಾವು ಕಳೆದ ಸೆಮಿಸ್ಟರ್ ಪೂರ್ಣ ಮೌಲ್ಯಮಾಪನ ಮಾಡಿದ್ದೇವೆ. ಪರೀಕ್ಷಾ ಮೇಲ್ವಿಚಾರಣಾ ಕಾರ್ಯ ಮಾಡಿದ್ದೇವೆ. ಪಾಠ ಪ್ರವಚನ ಮುಗಿಸಿದ್ದೇವೆ. ನಮ್ಮ ಕರ್ತವ್ಯವನ್ನು ಪ್ರಾಮಾಣಿಕವಾಗಿ ಮಾಡಿದ್ದರೂ ನಮಗೆ ವೇತನ ನೀಡಿಲ್ಲ’ ಎಂದು ದೂರಿದರು.

‘ನಿರಂತರವಾಗಿ ಒಟ್ಟು 5 ತಿಂಗಳ ವೇತನವನ್ನು ನೀಡದೇ ಇರುವುದರಿಂದ ಜೀವನ ನಿರ್ವಹಣೆ ತೀರಾ ಕಷ್ಟದಾಯಕವಾಗಿದೆ. ನಮಗೂ ಹೆಂಡತಿ, ಮಕ್ಕಳು ಇದ್ದಾರೆ. ವಯಸ್ಸಾದ ತಂದೆ, ತಾಯಿಯರು ಇದ್ದಾರೆ. ಔಷಧೋಪಚಾರಗಳಿಗೆ ಹಣ ಬೇಕಿದೆ. ಮಂಗಳೂರು ವಿಶ್ವವಿದ್ಯಾನಿಲಯದವರು ನಮಗೂ ಇದಕ್ಕೂ ಸಂಬಂಧವೇ ಇಲ್ಲ ಎಂಬಂತೆ ವರ್ತಿಸಿರುವುದು ಸರಿಯಲ್ಲ’ ಎಂದು ಖಂಡಿಸಿದರು.

ಮತ್ತೊಬ್ಬ ಅತಿಥಿ ಉಪನ್ಯಾಸಕ ಮಾತನಾಡಿ, ‘ಮಂಗಳೂರು ವಿಶ್ವವಿದ್ಯಾನಿಲಯ ವ್ಯಾಪ್ತಿಗೆ ಸೇರುವ ದಕ್ಷಿಣ ಕನ್ನಡ ಜಿಲ್ಲೆಯ ಕಾಲೇಜುಗಳ ಅತಿಥಿ ಉಪನ್ಯಾಸಕರಿಗೆ ವೇತನ ಪಾವತಿ ಮಾಡಲಾಗಿದೆ. ಕೊಡಗಿನ ಎಫ್‌ಎಂಸಿ ಕಾಲೇಜಿನ ಉಪನ್ಯಾಸಕರಿಗೆ ಮಾತ್ರವೇ ವೇತನ ಪಾವತಿಸಿಲ್ಲ. ಇದು ವಿಶ್ವವಿದ್ಯಾನಿಲಯ ಮಲತಾಯಿ ಧೋರಣೆ ಅನುಸರಿಸುತ್ತಿದೆಯೇ ಎಂಬ ಅನುಮಾನಕ್ಕೂ ಕಾರಣವಾಗಿದೆ’ ಎಂದು ಸಂಶಯ ವ್ಯಕ್ತಪಡಿಸಿದರು.

ಮತ್ತೊಬ್ಬ ಅತಿಥಿ ಉಪನ್ಯಾಸಕ ಮಾತನಾಡಿ, ‘ನಾವು ನಮ್ಮ ನ್ಯಾಯಬದ್ಧವಾದ ಹಕ್ಕನ್ನು ಮಾತ್ರ ಕೇಳುತ್ತಿದ್ದೇವೆ. ಬಾಕಿ ವೇತನ ಪಾವತಿಸಿದ ತಕ್ಷಣವೇ ನಮ್ಮ ಕರ್ತವ್ಯವನ್ನು ನಾವು ಮಾಡುತ್ತೇವೆ. ಮಂಗಳೂರು ವಿಶ್ವವಿದ್ಯಾನಿಲಯದ ಘನತೆಗೆ ಕಳಂಕ ತರುವ ಉದ್ದೇಶ ನಮ್ಮದ್ದಲ್ಲ’ ಎಂದು ಹೇಳಿದರು.

‘ಕಳೆದ 5 ತಿಂಗಳಿಂದಲೂ ಇಲ್ಲಿಂದ ಎಲ್ಲರೂ ಮಂಗಳೂರು ವಿಶ್ವವಿದ್ಯಾನಿಲಯಕ್ಕೆ ಹೋಗಿ ಸಂಬಳ ಕೊಡಿ ಎಂದು ಬೇಡಿಕೊಂಡಿದ್ದೇವೆ. ನಾಲ್ಕಾರು ಬಾರಿ ಅಷ್ಟು ದೂರ ಹೋಗುವುದಕ್ಕೆ ಹಣ ಸಾಕಷ್ಟು ಖರ್ಚಾಗಿದೆ. ಮೊನ್ನೆ ಹೋದಾಗ ವಿಶ್ವವಿದ್ಯಾನಿಲಯದ ಅಧಿಕಾರಿಗಳಿಂದ ಹೆಚ್ಚಿನ ಸ್ಪಂದನೆ ವ್ಯಕ್ತವಾಗಲಿಲ್ಲ. ಹೀಗಾಗಿ, ನಾವು ನಿರಾಶರಾಗಿದ್ದೇವೆ’ ಎಂದು ಬೇಸರ ವ್ಯಕ್ತಪಡಿಸಿದರು.