ತಾವರಗೇರಾ| ‘ಕಬ್ಬಿಣದ ಕಡಲೆ‘ ಸುಲಭ ಮಾಡಿದ ಶಿಕ್ಷಕ

ಗಣಿತ ವಿಷಯ ಬೋಧಿಸುವ ಪರಶುರಾಮ ಈ ಶಾಲೆಗೆ 2016ರಲ್ಲಿ ವರ್ಗವಾಗಿ ಬಂದರು. ಗ್ರಾಮೀಣ ಭಾಗದವರು ‘ಕಬ್ಬಿಣದ ಕಡಲೆ’ ಎಂದೇ ಭಾವಿಸುವ ಗಣಿತ ಕಲಿಸಲು ವಿಶೇಷ ತರಗತಿಗಳನ್ನು ಏರ್ಪಡಿಸಲು ಶುರು ಮಾಡಿದರು. ಆಗಿನಿಂದಲೂ ಶಾಲೆಯ ಫಲಿತಾಂಶದ ದಿಕ್ಕು ಕೂಡ ಬದಲಾಗಿದೆ.

ಆ ವರ್ಷ ಗಣಿತದಲ್ಲಿ ಶಾಲೆಯು ಶೇ 90.12ರಷ್ಟು ಫಲಿತಾಂಶ ಪಡೆಯಿತು. 2017ರಲ್ಲಿ ಶೇ 88.15ರಷ್ಟು ಫಲಿತಾಂಶ ದಾಖಲಿಸಿತು. ಪರಶುರಾಮ ಅವರು ಹೆಚ್ಚುವರಿ ತರಗತಿಯ ಶ್ರಮ ಮಾತ್ರ ಬಿಡಲಿಲ್ಲ. ಇದರ ಫಲವಾಗಿ 2018ರಲ್ಲಿ ಶೇ100 ಫಲಿತಾಂಶ ಪಡೆಯಿತು. ಅಲ್ಲಿಂದ ಇಲ್ಲಿಯ ತನಕ ಗಣಿತದಲ್ಲಿ ಶೇ100ರಷ್ಟು ಫಲಿತಾಂಶ ದಾಖಲಿಸಿರುವುದು ವಿಶೇಷ. 2016ರಲ್ಲಿ ಎಸ್ಸೆಸ್ಸೆಲ್ಸಿಗೆ 81 ವಿದ್ಯಾರ್ಥಿಗಳು ಇದ್ದರು. ಪ್ರಸ್ತುತ 10ನೇ ತರಗತಿಯಲ್ಲಿ 110 ವಿದ್ಯಾರ್ಥಿಗಳು ಕಲಿಯುತ್ತಿದ್ದಾರೆ.

ಹಿಂದಿನ ಐದು ವರ್ಷಗಳ ಅವಧಿಯಲ್ಲಿ ಶಾಲೆ ಒಟ್ಟಾರೆಯಾಗಿ ಎರಡು ಬಾರಿ ಶೇ 100ರಷ್ಟು ಫಲಿತಾಂಶ ಪಡೆದಿರುವ ಶಾಲೆ, ಮೂರು ಬಾರಿ ಶೇ 98ರಷ್ಟು ಫಲಿತಾಂಶ ಪಡೆದಿದೆ. ಗಣಿತ ವಿಷಯದ ಉತ್ತಮ ಫಲಿತಾಂಶಕ್ಕೆ ಪರಶುರಾಮ ಬಲ ತುಂಬಿದರೆ, ಉಳಿದ ವಿಷಯಗಳಲ್ಲಿ ಮಕ್ಕಳ ಉತ್ತಮ ಓದಿಗೆ ಶಾಲೆಯ ಬೇರೆ ಶಿಕ್ಷಕರೂ ನೆರವಾಗಿದ್ದಾರೆ. 

ಹೆಚ್ಚುವರಿ ಪಾಠ: ಪ್ರತಿನಿತ್ಯ ಬೆಳಿಗ್ಗೆ 8 ಗಂಟೆಯಿಂದ ಶಾಲೆ ಆರಂಭದವರೆಗೆ ಮತ್ತು ಶಾಲೆ ಬಿಟ್ಟಾಗಿನಿಂದ ಸಂಜೆ 6 ಗಂಟೆವರೆಗೆ ವಿಶೇಷ ತರಗತಿ ನಡೆಸಿ ಗಣಿತವನ್ನು ಪರಶುರಾಮ ಅವರು ಬೋಧಿಸುತ್ತಾರೆ. ಇದರೊಂದಿಗೆ ವಿವಿಧ ಸಂಶೋಧನೆ, ಚಟುವಟಿಕೆ ಮೂಲಕ ವಿದ್ಯಾರ್ಥಿಗಳ ಕಲಿಕೆ ನಡೆಯುತ್ತದೆ.

‘ಕಲಿಕೆಯಲ್ಲಿ ಹಿಂದುಳಿದ ಮಕ್ಕಳನ್ನು ಗುರುತಿಸಿ ಶಿಕ್ಷಕ ಪರಶುರಾಮ ಕಾಳಜಿಯೊಂದಿಗೆ ವಿಶೇಷ ತರಗತಿ ನಡೆಸಿ ಅವರ ಕಲಿಕಾ ಗುಣಮಟ್ಟ ಸುಧಾರಣೆಗೆ ಶ್ರಮಿಸುತ್ತಾರೆ. ಮಕ್ಕಳಿಗೆ ವಿಜ್ಞಾನ, ಗಣಿತ, ತಂತ್ರಜ್ಞಾನ ಕಲಿಸಲು ವಿವಿಧ ಚಟುವಟಿಕೆಗಳನ್ನು ಆಯೋಜಿಸುವುದರಲ್ಲೂ ಅವರು ಮುಂಚೂಣಿಯಲ್ಲಿದ್ದಾರೆ’ ಎನ್ನುತ್ತಾರೆ ಮುಖ್ಯಶಿಕ್ಷಕ ಬಸವರಾಜ ಮಡಿವಾಳರ.