ಮಳವಳ್ಳಿ: ಪಟ್ಟಣ ಸೇರಿದಂತೆ ತಾಲ್ಲೂಕಿನ ಗ್ರಾಮೀಣ ಭಾಗದ ಹಲವೆಡೆ ಭಾನುವಾರ ಉತ್ತಮ ಮಳೆ ಸುರಿಯಿತು.
ಕಳೆದೊಂದು ವಾರದಿಂದ ಮಳೆ ವಾತಾವರಣ ಇತ್ತು, ಭಾನುವಾರ ಸಂಜೆ 4 ಗಂಟೆಗೆ ಶುರುವಾದ ವರ್ಷಧಾರೆ ನಿರಂತರವಾಗಿ ಮುಕ್ಕಾಲು ಗಂಟೆಗೂ ಹೆಚ್ಚು ಕಾಲ ಸುರಿಯಿತು. ಕಳೆದ ಹಲವು ದಿನಗಳಿಂದ ಬಿಸಿಲಿನ ಬೇಗೆಯಿಂದ ಬಸವಳಿದಿದ್ದ ಜನರು ಮಳೆಯ ಆಗಮನದಿಂದ ಖುಷಿಪಟ್ಟರು.
ತಾಲ್ಲೂಕಿನ ಕಿರುಗಾವಲು, ತಳಗವಾದಿ, ನೆಲಮಾಕನಹಳ್ಳಿ, ಮಾದಹಳ್ಳಿ, ಟಿ.ಕಾಗೇಪುರ, ದೇವಿಪುರ, ಅಂಚೆದೊಡ್ಡಿ, ನೆಲ್ಲೂರು, ಕ್ಯಾತೇಗೌಡನದೊಡ್ಡಿ, ಮಾರೇಹಳ್ಳಿ, ರಾವಣಿ ಸೇರಿದಂತೆ ಹಲವೆಡೆ ಉತ್ತಮ ಮಳೆಯಾಗಿದೆ. ಇದರಿಂದಾಗಿ ರೈತರ ಮುಖದಲ್ಲಿ ಮಂದಹಾಸ ಮೂಡಿದೆ.