ಅರಿವು ಎಂಬ ‘ಪರಿಸರ’ ಶಾಲೆ

7
11 ವರ್ಷಗಳಿಂದ ಕನ್ನಡ ಮಾಧ್ಯಮದಲ್ಲಿ ಕಲಿಸುತ್ತಿರುವ ಖಾಸಗಿ ಶಾಲೆ

ಅರಿವು ಎಂಬ ‘ಪರಿಸರ’ ಶಾಲೆ

Published:
Updated:
Deccan Herald

ಮೈಸೂರು: ಮೈಸೂರಿನಲ್ಲೊಂದು ಪರಿಸರ ಶಾಲೆ ಇದೆ. ಇಲ್ಲಿ ಸಾಂಪ್ರದಾಯಿಕ ಕಲಿಕೆಯ ಜತೆಗೆ, ಮಕ್ಕಳ ಸರ್ವತೋಮುಖ ವ್ಯಕ್ತಿತ್ವದ ಬೆಳವಣಿಗೆಗೆ ಆದ್ಯತೆ ನೀಡಲಾಗುತ್ತಿದೆ. ಪರಿಸರದ ಮಧ್ಯೆ ಮಿಂದು ‘ಕಲಿ– ನಲಿ’ ಪರಿಕಲ್ಪನೆಯನ್ನು ಅಕ್ಷರಶಃ ಮಕ್ಕಳು ಇಲ್ಲಿ ಅನುಭವಿಸುತ್ತಿದ್ದಾರೆ.

ಇದು ಅರಿವು ವಿದ್ಯಾಸಂಸ್ಥೆ. ‘ಪರಿಸರ ಶಾಲೆ’ ಎಂಬ ಅಡ್ಡ ಹೆಸರು ಇದಕ್ಕಿದೆ. ಪರಿಸರಕ್ಕೆ ಹತ್ತಿರವಾಗಿ ಮಕ್ಕಳನ್ನು ಬೆಳೆಸುವುದು ಈ ಶಾಲೆಯ ವಿಶೇಷ. ಗಿಡ ನೆಡುವುದು, ಮಡಿಕೆ ಮಾಡುವುದು, ಚಾಪೆ ನೇಯುವುದು, ಕಲೆ, ಸಂಗೀತ, ನೃತ್ಯ- ಇವುಗಳೇ ಪಾಠ. ಈ ಪಾಠವೂ ಪರಿಸರ ನಡುವೆ. ಜತೆಗೆ, ಇದು ಕನ್ನಡ ಶಾಲೆ. ಸರ್ಕಾರಿ ಹಾಗೂ ಸರ್ಕಾರಿ ಅನುದಾನಿತ ಶಾಲೆಗಳೇ ಕಷ್ಟದಿಂದ ನಡೆಯುತ್ತಿರುವ ಸಂದರ್ಭದಲ್ಲಿ ಯಾವುದೇ ಅನುದಾನವಿಲ್ಲದೇ ಕನ್ನಡ ಮಾಧ್ಯಮ ಶಾಲೆಯೊಂದನ್ನು ಯಶಸ್ವಿಯಾಗಿ 11 ವರ್ಷಗಳಿಂದ ಖಾಸಗಿ ಸಂಸ್ಥೆಯೊಂದು ನಡೆಸಿಕೊಂಡು ಬರುತ್ತಿರುವುದು ವಿಶೇಷವೂ ಹೌದು; ಶ್ರಮದ ಫಲವೂ ಹೌದು.

ಇಲ್ಲಿ 186 ವಿದ್ಯಾರ್ಥಿಗಳು ಕನ್ನಡ ಮಾಧ್ಯಮದಲ್ಲಿ ಪಾಠ ಕಲಿಯುತ್ತಿದ್ದಾರೆ. ಒಂದರಿಂದ ಹತ್ತನೇ ತರಗತಿಯವರೆಗೂ ಇಲ್ಲಿ ಕಲಿಸಲಾಗುತ್ತಿದೆ. ಹಾಗೆಂದು ಇಲ್ಲಿ ಇಂಗ್ಲಿಷ್‌ ಕಲಿಸುತ್ತಿಲ್ಲ ಎಂದಲ್ಲ. ಒಂದನೇ ತರಗತಿಯಿಂದಲೇ ಇಲ್ಲಿ ಇಂಗ್ಲಿಷ್‌ ಕಲಿಸಲಾಗುತ್ತಿದೆ. ವಿಧಾನವೂ ವಿಭಿನ್ನ. ಸಾಮಾನ್ಯವಾಗಿ ಎಲ್ಲ ಶಾಲೆಗಳಲ್ಲಿ ಮೊದಲು ಅಕ್ಷರಾಭ್ಯಾಸ ಮಾಡಿಸಿ, ನಂತರ ಭಾಷೆಯನ್ನು ಕಲಿಸುವುದು ವಾಡಿಕೆ. ಆದರೆ, ಅರಿವು ಶಾಲೆಯಲ್ಲಿ ಸಹಜ ಕಲಿಕೆ ಇದೆ. ಅಂದರೆ, ಮನೆಯಲ್ಲಿ ತಂದೆ, ತಾಯಿ ಮಾತನಾಡುವುದನ್ನು ಹೇಳಿಕೊಡುವಂತೆ, ಮೊದಲು ಇಂಗ್ಲಿಷನ್ನು ಮಾತನಾಡುವುದನ್ನು ಕಲಿಸಿ ಬಳಿಕ ಅಕ್ಷರಾಭ್ಯಾಸ ಮಾಡಿಸಲಾಗುತ್ತಿದೆ. ಇದರಿಂದ ಮಕ್ಕಳು ಇಂಗ್ಲಿಷನ್ನು ಸಮರ್ಪಕವಾಗಿ ಕಲಿಯಬಹುದು ಎನ್ನುವುದು ಅರಿವು ಸಂಸ್ಥೆಯ ವ್ಯವಸ್ಥಾಪಕ ಟ್ರಸ್ಟಿ ಡಾ.ಮನೋಹರ್‌ ಅವರು ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು.

ವಿಷಯಾಧಾರಿತ ಕಲಿಕೆ

5ನೇ ತರಗತಿ ನಂತರ ವಿಶ್ವವಿದ್ಯಾಲಯಗಳಂತೆ ಇಲ್ಲಿ ವಿಷಯಾಧಾರಿತ ಕಲಿಕೆಗೆ ಮಹತ್ವ ಕೊಡಲಾಗಿದೆ. ಇಂಗ್ಲಿಷ್, ಕನ್ನಡ, ವಿಜ್ಞಾನ, ಸಮಾಜ ವಿಜ್ಞಾನ, ಇತಿಹಾಸ ಸೇರಿದಂತೆ ಹಲವು ವಿಷಯಗಳಿಗೆ ಮೀಸಲಿಟ್ಟ ಕೊಠಡಿಗಳಿಗೆ ವಿದ್ಯಾರ್ಥಿಗಳು ಹೋಗುತ್ತಾರೆ. ಆಸಕ್ತ ವಿದ್ಯಾರ್ಥಿಗಳು ಇಲ್ಲಿ ಪಾಠ ಕೇಳಿ ತಮ್ಮ ಬುದ್ಧಿಸಾಮರ್ಥ್ಯ ಹೆಚ್ಚಿಸಿಕೊಳ್ಳುತ್ತಿದ್ದಾರೆ. ಪಠ್ಯದಲ್ಲಿ ಇರುವುದನ್ನು ಉರು ಹೊಡೆದು ಪರೀಕ್ಷೆ ಬರೆಯುವುದು ಹೆಚ್ಚುಗಾರಿಕೆಯಲ್ಲ. ವಿಷಯವನ್ನು ಪ್ರೀತಿಸಿ ಅರ್ಥಮಾಡಿಕೊಂಡರೆ ಜ್ಞಾನ ವಿಸ್ತರಣೆ ಆಗುವುದು ಎನ್ನುವುದು ಈ ಶಾಲೆಯ ಆಶಯ.

ತಿಂಗಳಿಗೊಮ್ಮೆ ‘ಅಂಗಳ’ ಪತ್ರಿಕೆ:

ವಿದ್ಯಾರ್ಥಿಗಳ ಜ್ಞಾನಾಭಿವೃದ್ಧಿಗಾಗಿ ಒಂದು ವರ್ಷಕ್ಕೂ ಹೆಚ್ಚಿನ ಕಾಲದಿಂದ ಇಲ್ಲಿ ‘ಅಂಗಳ’ ಎಂಬ ಶಾಲಾ ಪತ್ರಿಕೆಯನ್ನು ಹೊರತರಲಾಗುತ್ತಿದೆ. ಪ್ರತಿ ತಿಂಗಳ ಎರಡನೇ ಶನಿವಾರ ಇದು ಹೊರಬರುತ್ತಿದೆ. ವಿದ್ಯಾರ್ಥಿಗಳು ತಮ್ಮಿಷ್ಟದ ಸಾಹಿತ್ಯವನ್ನು ಇಲ್ಲಿ ಪ್ರಕಟಿಸಬಹುದು. ಕಥೆ, ಕವನ, ಪ್ರಚಲಿತ ವಿದ್ಯಮಾನ... ಹೀಗೆ ನಾನಾ ವಿಷಯಗಳ ಮೇಲೆ ಬರವಣಿಗೆಗೆ ಅವಕಾಶವಿದೆ. ನಾಲ್ಕು ಪುಟಗಳ ಈ ಪತ್ರಿಕೆಯಲ್ಲಿ 3 ಪುಟ ಕನ್ನಡಕ್ಕೆ ಮೀಸಲು. ಇನ್ನೊಂದು ಪುಟದಲ್ಲಿ ಇಂಗ್ಲಿಷ್‌ ಹಾಗೂ ಹಿಂದಿಯ ಲೇಖನಗಳನ್ನು ಪ್ರಕಟಿಸಲಾಗುತ್ತಿದೆ. ಶಾಲಾ ಮಟ್ಟದಲ್ಲೇ ಬರವಣಿಗೆಗೆ ಆದ್ಯತೆ ನೀಡುವುದು; ಆ ಮೂಲಕ ವಿದ್ಯಾರ್ಥಿಗಳಲ್ಲಿ ಭಾಷೆ, ಸಾಹಿತ್ಯದ ಬಗ್ಗೆ ಒಲವು ಮೂಡಿಸುವುದು ವಿಶೇಷ.

ವಿದೇಶಿಯರಿಂದ ಕಲಿಕೆ:

ಇಲ್ಲಿ ವಿದೇಶಿಯರು ಭಾಷೆ ಕಲಿಸುವುದು ವಿಶೇಷ. ಇದಕ್ಕಾಗಿ ಜರ್ಮನಿಯಿಂದ ಭಾಷಾ ತಜ್ಞರು ಬಂದು ಕಾರ್ಯಾಗಾರಗಳನ್ನು ನಡೆಸಿ ಹೋಗುತ್ತಿದ್ದಾರೆ. ಇಂಗ್ಲಿಷ್ ಕಲಿಸುತ್ತಾರೆ. ಕಲಿಕೆಯೆ ಎಲ್ಲ ಆಯಾಮಗಳ ಸ್ಪರ್ಶ ನೀಡುವುದು ಉದ್ದೇಶ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !