ಫಿಫಾ ವಿಶ್ವಕಪ್‌ ಫುಟ್‌ಬಾಲ್‌ ಟೂರ್ನಿ: ಹಂಗರಿ ವಿರುದ್ಧ ಆಸ್ಟ್ರೇಲಿಯಾಕ್ಕೆ ಜಯ
ಮೆಲ್ಬರ್ನ್‌ (ರಾಯಿಟರ್ಸ್‌): ಡೆನಿಯಲ್‌ ಅರ್ಜಾನಿ ಅವರು ಗಳಿಸಿದ ಗೋಲಿನ ನೆರವಿನಿಂದ ಆಸ್ಟ್ರೇಲಿಯಾ ತಂಡವು ಫಿಫಾ ವಿಶ್ವಕಪ್‌ ಫುಟ್‌ಬಾಲ್‌ ಟೂರ್ನಿಯ ಎರಡನೇ ಅಭ್ಯಾಸ ಪಂದ್ಯದಲ್ಲೂ ಜಯ ಗಳಿಸಿದೆ.
ಶನಿವಾರ ರಾತ್ರಿ ನಡೆದ ಪಂದ್ಯದಲ್ಲಿ ಆಸ್ಟ್ರೇಲಿಯಾ ತಂಡವು ಹಂಗರಿ ತಂಡವನ್ನು 2–1 ಗೋಲುಗಳಿಂದ ಮಣಿಸಿತು.
ಪಂದ್ಯದ ಆರಂಭದಿಂದಲೂ ಉಭಯ ತಂಡಗಳು ಪ್ರಬಲ ಪೈಪೋಟಿ ನೀಡಿದವು. ಇದರಿಂದಾಗಿ ಗೋಲು ಗಳಿಸಲು ಸಿಕ್ಕ ಅನೇಕ ಅವಕಾಶಗಳನ್ನು ಎರಡು ತಂಡಗಳ ರಕ್ಷಣಾ ವಿಭಾಗದ ಆಟಗಾರರು ವಿಫಲಗೊಳಿಸಿದರು. ಆದರೆ, 73ನೇ ನಿಮಿಷದಲ್ಲಿ ಬದಲಿ ಆಟಗಾರನಾಗಿ ಅಂಗಳಕ್ಕಿಳಿದ ಡೆನಿಯಲ್‌ ಅರ್ಜಾನಿ ಅವರು ಆಸ್ಟ್ರೇಲಿಯಾಗೆ ನೆರವಾದರು.
ಈ ಬಾರಿಯ ವಿಶ್ವಕಪ್‌ನಲ್ಲಿ ಆಡಲಿರುವ ಯುವ ಆಟಗಾರರಲ್ಲಿ ಒಬ್ಬರಾಗಿರುವ ಅರ್ಜಾನಿ ಅವರು 74ನೇ ನಿಮಿಷದಲ್ಲಿ ಗೋಲು ಗಳಿಸಿ ತಂಡಕ್ಕೆ ಮುನ್ನಡೆ ತಂದುಕೊಟ್ಟರು. ಲಾಂಗ್‌ ಪಾಸ್‌ ಮೂಲಕ ಸಿಕ್ಕ ಚೆಂಡನ್ನು ಅವರು ಗುರಿ ಮುಟ್ಟಿಸಿದ್ದು ಸೊಗಸಾಗಿತ್ತು.
ಇದಾದ ಕೂಡಲೇ ಎಚ್ಚೆತ್ತುಕೊಂಡ ಹಂಗರಿ ಆಟಗಾರರು ಗೋಲು ಗಳಿಸುವ ಹಲವು ಪ್ರಯತ್ನ ಮಾಡಿದರಾದರೂ ಯಶಸ್ವಿಯಾಗಲಿಲ್ಲ. ಆದರೆ, 88ನೇ ನಿಮಿಷದಲ್ಲಿ ಆಸ್ಟ್ರೇಲಿಯಾದ ಟ್ರೆಂಟ್‌ ಸೆನ್ಸ್‌ಬರಿ ಅವರು ಚೆಂಡನ್ನು ನಿಯಂತ್ರಣಕ್ಕೆ ತೆಗೆದುಕೊಳ್ಳಲು ಹೋಗಿ ತಾವೇ ಹಂಗರಿ ತಂಡಕ್ಕೆ ಗೋಲು ಗಳಿಸಿಕೊಟ್ಟರು. ಇದರಿಂದ ಪಂದ್ಯ ಸಮಬಲಗೊಂಡಿತು.
ಉಭಯ ತಂಡಗಳು ಸಮಬಲ ಸಾಧಿಸಿದ್ದರಿಂದ ಪಂದ್ಯ ಡ್ರಾನಲ್ಲಿ ಅಂತ್ಯವಾಗಬಹುದು ಎಂದು ಪ್ರೇಕ್ಷಕರು ಅಂದಾಜಿಸಿದ್ದರು. ಆದರೆ, ಕೆಲವೇ ನಿಮಿಷಗಳ ಹಿಂದೆ ಸೆನ್ಸ್‌ಬರಿ ಮಾಡಿದ್ದ ತಪ್ಪನ್ನು ಹಂಗರಿಯ ಥಾಮಸ್‌ ಕದರ್‌ ಮರುಕಳಿಸಿದರು. ಗೋಲು ತಪ್ಪಿಸಲು ಹೋಗಿ ಆಸ್ಟ್ರೇಲಿಯಾಗೆ ಗೋಲು ಗಳಿಸಿ ಕೊಟ್ಟು ತಂಡದ ಸೋಲಿಗೆ ಕಾರಣರಾದರು.
ತನ್ನ ಮೊದಲ ಅಭ್ಯಾಸ ಪಂದ್ಯದಲ್ಲಿ ಜೆಕ್‌ ಗಣರಾಜ್ಯದ ವಿರುದ್ಧ ಆಸ್ಟ್ರೇಲಿಯಾ ತಂಡವು 4–0 ಗೋಲುಗಳಿಂದ ಗೆದ್ದಿತ್ತು. ಸಿ ಗುಂಪಿನಲ್ಲಿರುವ ಆಸ್ಟ್ರೇಲಿಯಾ ತಂಡವು ತನ್ನ ಮೊದಲ ಪಂದ್ಯದಲ್ಲಿ ಫ್ರಾನ್ಸ್‌ ತಂಡವನ್ನು ಎದುರಿಸಲಿದೆ. ಪೆರು, ಡೆನ್ಮಾರ್ಕ್‌ ಈ ಗುಂಪಿನಲ್ಲಿರುವ ಇತರ ತಂಡಗಳು.
‘ಈ ಪಂದ್ಯದಲ್ಲಿ ಕೆಲವು ತಪ್ಪುಗಳನ್ನು ಮಾಡಿದ್ದೇವೆ. ಆದರೆ, ಎರಡು ಅಭ್ಯಾಸ ಪಂದ್ಯಗಳಲ್ಲಿ ಜಯ ಸಾಧಿಸುವ ಮೂಲಕ ತಂಡವು ವಿಶ್ವಾಸದಲ್ಲಿದೆ’ ಎಂದು ಆಸ್ಟ್ರೇಲಿಯಾದ ಡಿಫೆಂಡರ್‌ ಜ್ಯಾಕ್ಸನ್‌ ಇರ್ವಿನ್‌ ಹೇಳಿದ್ದಾರೆ.
ಸ್ಪೇನ್‌ಗೆ ಜಯ: ಇನ್ನೊಂದು ಅಭ್ಯಾಸ ಪಂದ್ಯದಲ್ಲಿ ಟ್ಯುನಿಶಿಯಾ ವಿರುದ್ಧ ಸ್ಪೇನ್‌ ತಂಡ ಗೆದ್ದಿದೆ. ಟ್ಯುನಿಶಿಯಾ ತಂಡವನ್ನು 1–0 ಗೋಲುಗಳಿಂದ ಸ್ಪೇನ್‌ ಮಣಿಸಿತು. 2010ರಲ್ಲಿ ವಿಶ್ವಕಪ್‌ ಎತ್ತಿಹಿಡಿದಿದ್ದ ಸ್ಪೇನ್‌, ಪಂದ್ಯದ ಆರಂಭದಿಂದಲೂ ಗೋಲು ಗಳಿಸಲು ಪ್ರಯಾಸ ಪಟ್ಟಿತು.
ಬದಲಿ ಆಟಗಾರ ಡಿಗೊ ಕೊಸ್ಟಾ ಅವರು 65ನೇ ನಿಮಿಷದಲ್ಲಿ ಶಾರ್ಟ್‌ ಪಾಸ್‌ ಮೂಲಕ ಸಿಕ್ಕ ಚೆಂಡನ್ನು ಗುರಿ ಮುಟ್ಟಿಸುವ ಪ್ರಯತ್ನ ಮಾಡಿದರು. ಆದರೆ, ಟ್ಯುನಿಶಿಯಾದ ಗೋಲ್‌ಕೀಪರ್‌ ಐಮನ್‌ ಮತ್ಲೌತಿ ಅವರು ಇದನ್ನು ವಿಫಲಗೊಳಿಸಿದರು.
ಪಂದ್ಯದ 84ನೇ ನಿಮಿಷದಲ್ಲಿ ಫಾರ್ವರ್ಡ್‌ ಆಟಗಾರ ಕೊಸ್ಟಾ ಅವರು ಲಾಂಗ್‌ ಪಾಸ್‌ ಮೂಲಕ ನೀಡಿದ ಚೆಂಡನ್ನು ಸ್ಪೇನ್‌ನ ಇಯಾಗೊ ಅಸ್ಪಾಸ್‌ ಅವರು ಗುರಿ ಮುಟ್ಟಿಸುವ ಮೂಲಕ ತಂಡ ಜಯಿಸಲು ಕಾರಣರಾದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.