ಲಿಂಗಸುಗೂರು | ತಾಂಡಾದಲ್ಲಿ ಪ್ರಜಾಪ್ರಭುತ್ವ ಹಬ್ಬದ ಸಂಭ್ರಮ

ಮಂಗಳವಾರ ಬೆಳಿಗ್ಗೆ ಮತಗಟ್ಟೆ ಅಧಿಕಾರಿ, ಸಹಾಯಕ ಸಿಬ್ಬಂದಿ ಬಂಜಾರ ಉಡುಗೆ ಧರಿಸಿಯೇ ಚುನಾವಣಾ ಪ್ರಕ್ರಿಯೆ ಆರಂಭಿಗೊಳಿಸಿದರು. ಕನ್ಯಾಮಣಿ ಯುವತಿಯರು ಸಾಂಪ್ರದಾಯಿಕ ಉಡುಗೆ ಧರಿಸಿ ತೀಜ ತಲೆ ಮೇಲೆ ಹೊತ್ತು ತಂದು ವಿದ್ಯುನ್ಮಾನ ಮತಯಂತ್ರಕ್ಕೆ ಪೂಜೆ ಸಲ್ಲಿಸುತ್ತಿದ್ದಂತೆ ಮತದಾನ ಆರಂಭಗೊಂಡಿತು.

ಮತಗಟ್ಟೆ ಸಿಬ್ಬಂದಿ ಪುರುಷರು ಸಾದಾ ಪಂಚೆ, ಕಾಚಾಕೋಡಿ ಟೋಪಿ(ಪಾಗಡಿ), ಮಹಿಳೆಯರು ಪೇಟಿಯಾ (ಲಂಗ), ಕಾಂಚಾಳಿ (ಜಾಕೀಟು), ಛಾಟೀಯಾ (ಮೇಲುವಸ್ತ್ರ) ಧರಿಸಿ ಮತದಾನ ಪ್ರಕ್ರಿಯೆ ನಿಯಮಾನುಸಾರ ನಡೆಸಿದ್ದು ಗಮನ ಸೆಳೆಯಿತು. ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ, ಬಿಎಲ್‍ಒ ಸಿಬ್ಬಂದಿ ಕೂಡ ಉಡುಗೆ ಧರಿಸಿದ್ದು ವಿಶೇಷವಾಗಿತ್ತು.

ತಾಂಡಾದ ನಾಯಕ, ಚವ್ಹಾಣ, ರಾಠೋಡ ನೇತೃತ್ವದಲ್ಲಿ ಹಿರಿಯರು, ಮಹಿಳೆಯರು ಕೂಡ ಸಾಂಪ್ರದಾಯಿಕ ಉಡುಗೆ ಧರಿಸಿ ಮತಗಟ್ಟೆಗೆ ಆಗಮಿಸಿದ್ದರು. ತಾಂಡಾದ ಯುವತಿಯರು ಮತದಾರರಿಗೆ ತೀಜ (ಸಸಿ ಬುಟ್ಟಿ) ನೀಡಿ ಲಂಬಾಣಿ ಸಾಂಪ್ರದಾಯಿಕ ನೃತ್ಯದ ಮೂಲಕ ಮತಗಟ್ಟೆ ವರೆಗೆ ಕರೆತರುತ್ತಿರುವುದು ಕಂಡು ಬಂತು.

ಮತಗಟ್ಟೆಯಲ್ಲಿ ಮತದಾನ ಮಾಡಿ ಹೊರಬರುವ ಮತದಾರರಿಗೆ ಯುವತಿಯರು ಮತಗಟ್ಟೆ ಹೊರಭಾಗದಲ್ಲಿನ ಸೆಲ್ಫಿ ಕಾರ್ನ್‍ರದಲ್ಲಿ ಫೋಟೊ ಕ್ಲಿಕ್ಕಿಸಿಕೊಳ್ಳಲು ಉತ್ತೇಜನ ನೀಡಿದರು. ತಾಂಡಾದ ಹಿರಿಯರು, ಕಿರಿಯರು ಪಕ್ಷಾತೀತವಾಗಿ ಬಂಜಾರ ಸಾಂಪ್ರದಾಯಿಕ ಹಾಡು, ನೃತ್ಯಗಳ ಮೂಲಕ ಹಬ್ಬದ ಮಾದರಿಯಲ್ಲಿ ಭಾಗವಹಿಸಿದ್ದು ವಿಶೇಷವಾಗಿತ್ತು.

ತಹಶೀಲ್ದಾರ್‌ ಮಲ್ಲಪ್ಪ ಯರಗೋಳ, ತಾಲ್ಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ಅಮರೇಶ, ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ ಬಸಯ್ಯ ಗೊರೆಬಾಳ ಸೇರಿದಂತೆ ಸೆಕ್ಟರ್‌ ಸೇರಿದಂತೆ ಇತರೆ ತಂಡಗಳ ಅಧಿಕಾರಿಗಳು ಸಂಭ‍್ರಮಾಚರಣೆಯಲ್ಲಿ ಭಾಗವಹಿಸಿ ಹರ್ಷ ಹಂಚಿಕೊಂಡರು.

ಚಪ್ಪಾಳೆ ತಟ್ಟುತ್ತ ಲಯಭರಿತ ನೃತ್ಯದ ಸ್ವಾಗತ ಮತದಾರರ ಜೊತೆ ಯುವಕ-ಯುವತಿಯರ ಹೆಜ್ಜೆ ಮನೆ ಮನೆಯಿಂದ ಮತಗಟ್ಟೆಗೆ ಬಂದ ಮತದಾರ