ತುರ್ವಿಹಾಳ: ಬಿಸಿಲಿನ ತಾಪಕ್ಕೆ ನಲುಗಿದ ಕೂಲಿಕಾರ್ಮಿಕರು

ಇಲ್ಲಿಗೆ ಸಮೀಪದ ಗಾಂಧಿನಗರ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ತಾಯಮ್ಮ ಕ್ಯಾಂಪ್, ರಾಜಾಜಿನಗರ ಕ್ಯಾಂಪ್ ಹಾಗೂ ವೆಂಕಟೇಶ್ವರ ಕ್ಯಾಂಪ ಸೇರಿದಂತೆ ನರೇಗಾ ಯೋಜನೆಯಡಿ ನಿತ್ಯ 600 ಕೂಲಿ ಕಾರ್ಮಿಕರು ಹತ್ತಿಗುಡ್ಡ ಗ್ರಾಮದ ಬಳಿ ಇರುವ ಕೆರೆಯಲ್ಲಿ ಹೂಳೆತ್ತುವ ಕೆಲಸಕ್ಕೆ ಹೋಗುತ್ತಾರೆ. ಅಲ್ಲಿ ಸಮರ್ಪಕವಾಗಿ ನೀರು, ನೆರಳು ಹಾಗೂ ಔಷಧಗಳನ್ನು ಒದಗಿಸದೇ ತೊಂದರೆ ಅನುಭವಿಸುವಂತಾಗಿದೆ.

ಕೂಲಿಕಾರ್ಮಿಕರು ಕೆಲಸ ಮಾಡುವ ಸ್ಥಳದಲ್ಲಿ ವಿಶ್ರಾಂತಿ ಹಾಗೂ ಊಟದ ನೆರಳಿಗೆ ಒಂದು ಟಂಟ್ ಹಾಕಲಾಗಿತ್ತು. 50 ಕಾರ್ಮಿಕರಿಗೆ ಅನುಕೂಲವಾಗಿತ್ತು ಊಳಿದವರು ಬಿಸಿಲಿನ ತಾಪಕ್ಕೆ ಅಂಜಿ ಕೆಲವರು ಟ್ರ್ಯಾಕ್ಟರ್ ಕೆಳಗಿನ ನೆರಳಿಗೆ ಹಾಗೂ ಇನ್ನೂ ಕೆಲವರು ತಪ್ಪದೇ ಟೆಂಟ್ ಕಟ್ಟಿಕೊಂಡು ವಿಶ್ರಾಂತಿ ಪಡೆದುಕೊಳ್ಳುತ್ತಿದ್ದರು. ಕುಡಿಯಲು ನೀರಿನ ಸಮಸ್ಯೆಯಿದೆ ಎಂದು ಮಹಿಳೆಯರು ದೂರಿದರೂ ಬಿಸಿಲಿನ ಜಳಕ್ಕೆ ಮಹಿಳೆಯರು ತಲೆ ತಿರುಗಿ ಬಿದ್ದರು ಅಧಿಕಾರಿಗಳು ತಲೆ ಕೆಡಿಸಿಕೊಳ್ಳುತ್ತಿಲ್ಲ.

ನರೇಗಾ ಕೆಲಸ ಬರಗಾಲದಲ್ಲಿ ಹಳ್ಳಿ ಕೂಲಿಕಾರ್ಮಿಕರ ಬದುಕಿಗೆ ಆಸರೆಯಾಗಿದೆ. ಆದರೆ ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ಮೇ1ರಂದು ಎನ್.ಎಂ.ಆರ್ ತೆಗೆದು ಮೇ.2ರಿಂದ 10ರವರೆಗೆ 7 ದಿನ ಕೂಲಿ ಕೆಲಸ ನೀಡಬೇಕಾಗಿತ್ತು. ಆದರೆ ಮೇ.2ರಂದು ಎನ್.ಎಂ.ಆರ್ ತೆಗೆದ ಕಾರಣಕ್ಕಾಗಿ 1 ದಿನ ಕೆಲಸ ಕಳೆದುಕೊಳ್ಳಬೇಕಾಗಿದೆ ಎಂದು ಬಸವರಾಜ ಗ್ಯಾಂಗಮಾನ್ ಆರೋಪಿಸಿದರು.

ನರೇಗಾ ಕೂಲಿಕಾರರ ಜಾಬ್ ಕಾರ್ಡ್ ಹಾಗೂ ಇನ್ನಿತರ ಕೆಲಸಗಳಲ್ಲಿ ನಿರಂತರ ಬೇಜಾವ್ದಾರಿ ತೊರುತ್ತಿರುವ ಪಂಚಾಯಿತಿ ಕಂಪ್ಯೂಟರ್ ಆಪರೇಟರ್‌ ಶ್ರೀದೇವಿ ಅವರ ಮೇಲೆ ಅಧಿಕಾರಿಗಳು ಶಿಸ್ತು ಕ್ರಮ ಜರುಗಿಸಬೇಕು ಎಂದು ನರೇಗಾ ಕೂಲಿಕಾರರಾದ ಯುವರಾಜ, ಅಮರೇಶ ತೆಲಗೂರು, ಮಾಂತಪ್ಪ ಇಟಲಾಪೂರ ಒತ್ತಾಯಿಸಿದ್ದಾರೆ.