’ಸಿಎಂ ಸೂಚನೆ ಅನುಸರಿಸದ ಅಧಿಕಾರಿಗಳು’: ಶ್ರೀನಿವಾಸ್‌ ಪುಜಾರಿ ಆರೋಪ

ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ‘ಬಡವರು ಮನೆ ಕಟ್ಟಿಕೊಳ್ಳಲು ಮಂಜೂರಾಗುವ ಹಣದಲ್ಲಿ ಅರ್ಧಕ್ಕಿಂತ ಹೆಚ್ಚು ಮರಳಿಗಾಗಿ ವೆಚ್ಚವಾಗುತ್ತಿದೆ. ಮರಳು ಖರೀದಿ ಸಾಧ್ಯವಾಗದೆ ಬಹಳಷ್ಟು ಬಡವರು ಮನೆಯನ್ನೆ ಕಟ್ಟಿಕೊಂಡಿಲ್ಲ. ಇದನ್ನು ಸದನಲ್ಲಿ ಪ್ರಸ್ತಾಪಿಸಿದಾಗ, ಎಲ್ಲರೂ ವಾಸ್ತವಾಂಶ ಒಪ್ಪಿದ್ದಾರೆ. ಬಡವರು ಮರಳು ತೆಗೆದುಕೊಳ್ಳುವುದಕ್ಕೆ ಅಡ್ಡಿಪಡಿಸಬಾರದು ಎಂದು ಮುಖ್ಯಮಂತ್ರಿ ಅವರು ಅಧಿಕಾರಿಗಳಿಗೆ ಸೂಚನೆಯನ್ನು ನೀಡಿದ್ದಾರೆ. ಯಾವ ಅಧಿಕಾರಿಯೂ ಮಾತು ಪಾಲನೆ ಮಾಡುತ್ತಿಲ್ಲ’ ಎಂದರು.

‘ಮರಳಿನ ವಿಷಯದಲ್ಲಿ ಸರ್ಕಾರ ನಿರ್ಲಿಪ್ತವಾಗಿದೆ. ಗುಂಡಾಗಳ ಕೈಗೆ ಮರಳು ಗಣಿಗಾರಿಕೆ ನೀಡಿದೆ. ರಾಯಚೂರಿನಲ್ಲಿ ಕೊಲೆಯಾದ ಗ್ರಾಮ ಲೆಕ್ಕಿಗ ಸಾಹೇಬ್‌ ಪಟೇಲ್‌ ಕುಟುಂಬಕ್ಕೆ ನ್ಯಾಯ ಒದಗಿಸಬೇಕು. ಡಿಕ್ಕಿ ಹೊಡೆದ ಮರಳಿನ ಟಿಪ್ಪರ್‌ ರಾಯಲ್ಟಿ ಪಡೆದಿರಲಿಲ್ಲ ಎಂಬುದು ಬಯಲಾಗಿದೆ. ಮರಳು ದಂಧೆಯ ಎಲ್ಲ ಅಕ್ರಮಗಳನ್ನು ಬಯಲಿಗೆ ತರಲು ಉನ್ನತ ಮಟ್ಟದ ತನಿಖೆ ನಡೆಸಬೇಕು. ಇದಕ್ಕಾಗಿ ಸರ್ಕಾರದ ಮೇಲೆ ಒತ್ತಡ ಹಾಕಲಾಗುವುದು’ ಎಂದು ತಿಳಿಸಿದರು.