ರಾಮನಗರ/ಮಾಗಡಿ: ಜಿಲ್ಲೆಯ ರಾಮನಗರ ಮತ್ತು ಮಾಗಡಿ ತಾಲ್ಲೂಕಿನ ವಿವಿಧೆಡೆ ಸೋಮವಾರ ಸಂಜೆ ಭಾರೀ ಗಾಳಿ ಹಾಗೂ ಗುಡುಗು ಸಹಿತ ಸಾಧಾರಣೆ ಮಳೆಯಾಗಿದೆ. ಪಾದರಹಳ್ಳಿ, ಲಕ್ಷ್ಮಿಪುರ, ವೀರೇಗೌಡನದೊಡ್ಡಿ, ಗೊಲ್ಲರದೊಡ್ಡಿ, ಗೌಡರದೊಡ್ಡಿ ಹಾಗೂ ಮಾಗಡಿ ತಾಲ್ಲೂಕಿನ ವಿವಿಧ ಹಳ್ಳಿಗಳಲ್ಲಿ ಸುಮಾರು ಮುಕ್ಕಾಲು ತಾಸು ಮಳೆ ಸುರಿದಿದೆ.
ಸಂಜೆ 6 ಗಂಟೆಯಿಂದಲೇ ಮೋಡ ಕವಿದ ವಾತಾವರಣದ ಜೊತೆಗೆ ಜೋರಾಗಿ ಗಾಳಿ ಬೀಸತೊಡಗಿತು. ಸಣ್ಣದಾಗಿ ಹನಿಗಳೊಂದಿಗೆ ಶುರುವಾದ ಮಳೆ ರಾತ್ರಿ 7ರ ಹೊತ್ತಿಗೆ ಸಾಧಾರಣವಾಗಿ ಸುಮಾರು 40 ನಿಮಿಷ ಸುರಿಯಿತು. ಬಿಸಿಲ ಬೇಗೆಗೆ ಬಳಲಿದ್ದ ಭೂಮಿಗೆ ಮಳೆಯು ತಂಪನ್ನೆರೆಯಿತು. ಮಳೆ ಇಲ್ಲದೆ ಕಂಗಾಲಾಗಿದ್ದ ರೈತರು ವರುಣನ ಕೃಪೆಗೆ ಸಂತಸಪಟ್ಟರು.
