ತುಮಕೂರು | 2 ವರ್ಷದಲ್ಲಿ ನಾಲ್ಕು ಮದುವೆ: ವಂಚಕರ ಗ್ಯಾಂಗ್‌ ಬಂಧನ

ತುಮಕೂರು: ಮದುವೆಯ ನಾಟಕವಾಡಿ ವಂಚಿಸುತ್ತಿದ್ದ ಜಾಲವನ್ನು ಪೊಲೀಸರು ಭೇದಿಸಿದ್ದು, ಎರಡು ವರ್ಷದಲ್ಲಿ ನಾಲ್ಕು ಮದುವೆಯಾಗಿದ್ದ ವಂಚಕಿ ಹಾಗೂ ಆಕೆಯ ತಂಡವನ್ನು ಗುಬ್ಬಿ ಪೊಲೀಸರು ಮಹಾರಾಷ್ಟ್ರದಲ್ಲಿ ಬಂಧಿಸಿದ್ದಾರೆ.

. ನಾಲ್ಕು ಮದುವೆಯಾಗಿ ವಂಚಿಸಿದ್ದ ಕೋಮಲಾ (38) ಹಾಗೂ ಆಕೆಯ ತಂಡದ ಲಕ್ಷ್ಮಿ (50), ಸಿದ್ಧಪ್ಪ (50), ಲಕ್ಷ್ಮಿಬಾಯಿ (48) ಬಂಧಿತರು. ಮತ್ತೊಬ್ಬ ಆರೋಪಿ ವಿಜಯ್ ಬಂಧನಕ್ಕೆ ಪೊಲೀಸರು ಬಲೆ ಬೀಸಿದ್ದಾರೆ.

. ಗುಬ್ಬಿ ತಾಲ್ಲೂಕಿನ ಅತ್ತಿಕಟ್ಟೆ ಗ್ರಾಮದ ಯುವಕನನ್ನು ಮದುವೆಯಾಗಿ ವಂಚಿಸಿದ್ದ ಕೋಮಲಾ ಬೆಳಗಾವಿ ಹಾಗೂ ಮಹಾರಾಷ್ಟ್ರದಲ್ಲಿ ಇದೇ ರೀತಿ ಮದುವೆಯಾಗಿ ವಂಚಿಸಿರುವುದು ತನಿಖೆಯ ವೇಳೆ ಗೊತ್ತಾಗಿದೆ.

. ಬೆಳಗಾವಿ, ಹುಬ್ಬಳ್ಳಿ, ಮಹಾರಾಷ್ಟ್ರ ಸೇರಿದಂತೆ ವಿವಿಧೆಡೆ ವಾಸಿಸುತ್ತಿದ್ದ ತಂಡ ಪದೇಪದೇ ವಾಸಸ್ಥಳ ಬದಲಿಸುತ್ತಿತ್ತು. ಮಧ್ಯವರ್ತಿ ಮೂಲಕ ಮದುವೆ ವಯಸ್ಸು ಮೀರಿದ ಯುವಕರನ್ನು ಪತ್ತೆ ಹಚ್ಚಿ ವಿವಾಹಕ್ಕೆ ಸಂಚು ರೂಪಿಸುತ್ತಿದ್ದರು.

. ಗಂಡಿನ ಮನೆಗೆ ಬಂದು ರಾತ್ರೋರಾತ್ರಿ ಹೆಣ್ಣು ನೋಡುವ ಶಾಸ್ತ್ರ ಮುಗಿಸಿ, ‘ನಮ್ಮ ಕಡೆ ಹೀಗೆ ನಡೆಯುತ್ತದೆ’ ಎಂದು ಸುಳ್ಳು ಹೇಳಿ ನಂಬಿಸುತ್ತಿದ್ದರು.

. ಕೋಮಲಾ ಮದುವೆ ಹುಡುಗಿ ಎಂದು ಪರಿಚಯಿಸುತ್ತಿದ್ದ ಈ ತಂಡವು ಸಿದ್ಧಪ್ಪ ಮತ್ತು ಲಕ್ಷ್ಮಿಬಾಯಿಯನ್ನು ವಧುವಿನ ಚಿಕ್ಕಪ್ಪ, ಚಿಕ್ಕಮ್ಮ ಹಾಗೂ ವಿಜಯ್ ಎಂಬಾತನನ್ನು ಅಣ್ಣ ಎಂದು ಪರಿಚಯ ಮಾಡಿಸುತ್ತಿತ್ತು. ಲಕ್ಷ್ಮಿ ಎಂಬಾಕೆ ಮದುವೆ ಬ್ರೋಕರ್ ಪಾತ್ರ ನಿರ್ವಹಿಸುತ್ತಿದ್ದಳು. ಈಕೆಯೇ ಮದುವೆ ನಾಟಕದ ಪ್ರಮುಖ ಸೂತ್ರಧಾರಿಣಿ.

. ಮದುವೆಗೂ ಮುನ್ನವೇ ₹2 ಲಕ್ಷದಿಂದ ₹3 ಲಕ್ಷ ಪಡೆಯುತ್ತಿದ್ದ ತಂಡ ಮದುವೆ ನಂತರ ವರನ ಮನೆಯಿಂದ ಹಣ, ಒಡವೆ ತೆಗೆದುಕೊಂಡು ಜಾಗ ಖಾಲಿ ಮಾಡುತ್ತಿದ್ದರು.

. ‘ಎರಡು ವರ್ಷದಲ್ಲಿ ನಾಲ್ಕು ಮದುವೆ ಮಾಡಿಕೊಂಡಿದ್ದಾರೆ. ಮಹಾರಾಷ್ಟ್ರ, ಬೆಳಗಾವಿಯ ವಿವಿಧ ಕಡೆ ಯುವಕರನ್ನು ವಂಚಿಸಿದ್ದಾರೆ. ಆದರೆ, ಎಲ್ಲಿಯೂ ಇವರ ವಿರುದ್ಧ ಪ್ರಕರಣ ದಾಖಲಾಗಿಲ್ಲ’ ಎಂದು ಗುಬ್ಬಿ ಪೊಲೀಸರು ತಿಳಿಸಿದ್ದಾರೆ.