ತುಮಕೂರು: ಬ್ಯಾಡಗಿ ಮೆಣಸಿನಕಾಯಿ ಮತ್ತಷ್ಟು ಖಾರ

ಬಿಸಿಲ ತೀವ್ರತೆ ಮತ್ತಷ್ಟು ಹೆಚ್ಚಾಗುತ್ತಿದ್ದು, ಮಾರುಕಟ್ಟೆಗೆ ಬರುವ ತರಕಾರಿ ಆವಕದಲ್ಲೂ ಏರಿಕೆಯಾಗಿದೆ. ಹಿಂದಿನ ವಾರಕ್ಕೆ ಹೋಲಿಸಿದರೆ ಟೊಮೆಟೊ ಆವಕ ಹೆಚ್ಚಾಗಿದ್ದು, ಬೆಲೆ ತೀವ್ರ ಕುಸಿತ ಕಂಡಿದೆ. ಕೆ.ಜಿ ₹5–10ಕ್ಕೆ ಇಳಿಕೆಯಾಗಿದ್ದು, ಮಾರುಕಟ್ಟೆಯಲ್ಲಿ ಟೊಮೆಟೊ ಕೇಳುವವರೇ ಇಲ್ಲವಾಗಿದ್ದಾರೆ. ಸಾಗಣೆ ವೆಚ್ಚವೂ ಸಿಗದೆ ರೈತರು ಕಂಗಾಲಾಗಿದ್ದಾರೆ.

ಬೀನ್ಸ್, ಬದನೆಕಾಯಿ, ಎಲೆಕೋಸು, ಹೂ ಕೋಸು, ತೊಂಡೆಕಾಯಿ ಧಾರಣೆ ಅಲ್ಪ ಪ್ರಮಾಣದಲ್ಲಿ ಹೆಚ್ಚಳವಾಗಿದ್ದರೆ ಹಸಿರು ಮೆಣಸಿನ ಕಾಯಿ, ಕ್ಯಾಪ್ಸಿಕಂ ದುಬಾರಿಯಾಗಿದ್ದು, ಕೆ.ಜಿಗೆ ₹50–60ಕ್ಕೆ ಏರಿಕೆಯಾಗಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಕೆ.ಜಿಗೆ ₹80–100ಕ್ಕೆ ಮಾರಾಟ ಮಾಡಲಾಗುತ್ತಿದೆ. ಹಿಂದಿನ ವಾರಕ್ಕೆ ಹೋಲಿಸಿದರೆ ಬಹುತೇಕ ಎರಡು ಪಟ್ಟು ಹೆಚ್ಚಳವಾದಂತಾಗಿದೆ. ಬೇಸಿಗೆಯಲ್ಲಿ ದಾಹ ತಣಿಸಲು ಬಳಸುವ ನಿಂಬೆ ಹಣ್ಣು ಬೆಲೆ ಮತ್ತಷ್ಟು ಏರಿಕೆಯಾಗಿದೆ. ಸೌತೆಕಾಯಿ ದರ ಅಲ್ಪಮಟ್ಟಿಗೆ ಕಡಿಮೆಯಾಗಿದೆ.

ಸೊಪ್ಪು ಚೇತರಿಕೆ: ಹಿಂದಿನ ವಾರದಿಂದ ಏರಿಕೆಯತ್ತ ಹೆಜ್ಜೆ ಹಾಕಿರುವ ಸೊಪ್ಪಿನ ಬೆಲೆ ಈ ವಾರವೂ ಸ್ವಲ್ಪ ದುಬಾರಿಯಾಗಿದೆ. ಕೊತ್ತಂಬರಿ ಸೊಪ್ಪು ಕೆ.ಜಿಗೆ ₹30–40, ಸಬ್ಬಕ್ಕಿ ಕೆ.ಜಿಗೆ ₹25–30, ಮೆಂತ್ಯ ಸೊಪ್ಪು ಕೆ.ಜಿಗೆ ₹25–30, ಪಾಲಕ್ ಸೊಪ್ಪು (ಕಟ್ಟು) ₹20ಕ್ಕೆ ಮಾರಾಟವಾಗುತ್ತಿದೆ. ಯುಗಾದಿ ಹಬ್ಬ ಹಾಗೂ ಮರುದಿನದ ವರ್ಷ ತೊಡಕಿನ ಹೊತ್ತಿಗೆ ಕೊತ್ತಂಬರಿ ಸೊಪ್ಪು ಮತ್ತಷ್ಟು ಏರಿಕೆಯಾಗಬಹುದು ಎಂದು ಅಂತರಸನಹಳ್ಳಿ ಮಾರುಕಟ್ಟೆ ಮೂಲಗಳು ತಿಳಿಸಿವೆ.

ಹಣ್ಣು ದರ ನಿಯಂತ್ರಣ: ಬೇಸಿಗೆಯಲ್ಲಿ ಹೆಚ್ಚಾಗಿ ಬಳಸುವ ಹಣ್ಣಿನ ಬೆಲೆ ಈ ವಾರ ಏರಿಕೆ ದಾಖಲಿಸದಿದ್ದರೂ, ನಿಯಂತ್ರಣಕ್ಕೆ ಬಂದಿದೆ ಎಂದು ಹೇಳಲಾಗುತ್ತಿದೆ. ದಾಳಿಂಬೆ, ಕಿತ್ತಳೆ, ಏಲಕ್ಕಿ ಬಾಳೆ, ಕರಬೂಜ, ಕಲ್ಲಂಗಡಿ ಹಣ್ಣಿನ ದರ ಕೊಂಚ ಕಡಿಮೆಯಾಗಿದೆ. ಆದರೆ, ಪೈನಾಪಲ್ ಧಾರಣೆ ಮತ್ತಷ್ಟು ಹೆಚ್ಚಳವಾಗಿದೆ.

ಬೇಳೆ ಯಥಾಸ್ಥಿತಿ: ಏರಿಕೆಯತ್ತ ಮುಖ ಮಾಡಿದ್ದ ತೊಗರಿ ಬೇಳೆ ಧಾರಣೆ ಈ ವಾರ ಯಥಾಸ್ಥಿತಿ ಮುಂದುವರಿದಿದೆ. ದುಬಾರಿಯಾಗಿದ್ದ ಗೋಧಿ ದರ ಕಡಿಮೆಯಾಗಿದ್ದು, ಕೆ.ಜಿಗೆ ₹4–5 ಇಳಿಕೆಯಾಗಿದೆ. ಗಗನ ಮುಟ್ಟಿದ್ದ ಕಡಲೆಕಾಯಿ ಬೀಜ ಎರಡು ವಾರದಿಂದ ಇಳಿಕೆಯತ್ತ ಸಾಗಿದ್ದು, ಈ ವಾರವೂ ಅಲ್ಪ ಕುಸಿದಿದೆ.

ಇಳಿದ ಅಡುಗೆ ಎಣ್ಣೆ: ಯುಗಾದಿ ಹಬ್ಬದ ವೇಳೆಗೆ ಎಣ್ಣೆ ಧಾರಣೆ ದುಬಾರಿಯಾಗಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ, ಏರಿಕೆ ಬದಲು ಅಲ್ಪ ಇಳಿಕೆಯಾಗಿದೆ. ಸನ್‌ ಫ್ಲವರ್ ಕೆ.ಜಿಗೆ ₹125–130, ಪಾಮಾಯಿಲ್ ಕೆ.ಜಿಗೆ ₹97–98, ಕಡಲೆಕಾಯಿ ಎಣ್ಣೆ ಕೆ.ಜಿಗೆ ₹155–160ಕ್ಕೆ ಮಾರಾಟವಾಗುತ್ತಿದೆ.

ಮಸಾಲೆ ಪದಾರ್ಥ ದುಬಾರಿ: ಹಬ್ಬ, ಜಾತ್ರೆ ಚಟುವಟಿಕೆಗಳು ನಡೆಯುತ್ತಿದ್ದು, ಈ ಸಮಯದಲ್ಲಿ ಬಾಡೂಟಕ್ಕೆ ಹೆಚ್ಚಾಗಿ ಬಳಸುವ ಮಸಾಲೆ ಪದಾರ್ಥಗಳ ದರ ಏರಿಕೆಯಾಗಿದೆ. ಬ್ಯಾಡಗಿ ಮೆಣಸಿನಕಾಯಿ ಬೆಲೆ ಒಮ್ಮೆಲೆ ಕೆ.ಜಿಗೆ ₹150, ಲವಂಗ ಕೆ.ಜಿಗೆ ₹60–70 ಹೆಚ್ಚಳವಾಗಿದೆ.

ಧನ್ಯ ಕೆ.ಜಿ ₹110–160, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿಗೆ ₹550–600, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿಗೆ ₹250–260, ಕರಿಮೆಣಸು ಕೆ.ಜಿಗೆ ₹550–580, ಜೀರಿಗೆ ಕೆ.ಜಿಗೆ ₹350–380, ಸಾಸಿವೆ ಕೆ.ಜಿಗೆ ₹75–80, ಮೆಂತ್ಯ ಕೆ.ಜಿಗೆ ₹90–95, ಚಕ್ಕೆ ಕೆ.ಜಿಗೆ ₹260–300, ಲವಂಗ ಕೆ.ಜಿಗೆ ₹800–850, ಗುಣಮಟ್ಟದ ಗಸಗಸೆ ಕೆ.ಜಿಗೆ ₹1,350–1,400, ಬಾದಾಮಿ ಕೆ.ಜಿಗೆ ₹650–670, ಗೋಡಂಬಿ ಕೆ.ಜಿ ₹680–750, ದ್ರಾಕ್ಷಿ ಕೆ.ಜಿಗೆ ₹220–240, ಹುಣಸೆಹಣ್ಣು ₹100–140ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

ಕೋಳಿ ಮತ್ತೆ ಏರಿಕೆ: ಹಿಂದಿನ ವಾರದಿಂದ ಏರಿಕೆಯತ್ತ ಮುಖ ಮಾಡಿರುವ ಕೋಳಿ ಮಾಂಸದ ಬೆಲೆ ಈ ವಾರವೂ ದುಬಾರಿಯಾಗಿದೆ. ಬ್ರಾಯ್ಲರ್ ಕೋಳಿ ಕೆ.ಜಿಗೆ ₹110, ರೆಡಿ ಚಿಕನ್ ಕೆ.ಜಿಗೆ ₹180, ಸ್ಕಿನ್‌ಲೆಸ್ ಕೆ.ಜಿಗೆ ₹200, ಮೊಟ್ಟೆ ಕೋಳಿ (ಫಾರಂ) ಕೆ.ಜಿಗೆ ₹100ಕ್ಕೆ ಮಾರಾಟವಾಗುತ್ತಿದೆ. ಯುಗಾದಿ ಹಬ್ಬದ ವೇಳೆಗೆ ಇನ್ನಷ್ಟು ಬೆಲೆ ಏರಿಕೆಯಾಗಲಿದೆ.

ಮೀನು ಇಳಿಕೆ: ಕೆಲ ವಾರಗಳಿಂದ ಯಥಾಸ್ಥಿತಿ ಕಾಯ್ದುಕೊಂಡಿದ್ದ ಮೀನಿನ ಬೆಲೆ ಈಗ ಇಳಿಕೆಯತ್ತ ಮುಖ ಮಾಡಿದೆ. ಸೀಗಡಿ ಹೊರತುಪಡಿಸಿದರೆ ಇತರೆ ಎಲ್ಲಾ ಮೀನುಗಳ ದರ ಕಡಿಮೆಯಾಗಿದೆ. ಬಂಗುಡೆ ಕೆ.ಜಿಗೆ ₹210, ಬೂತಾಯಿ ಕೆ.ಜಿಗೆ ₹130, ಅಂಜಲ್ ಕೆ.ಜಿಗೆ ₹990, ಬೊಳಿಂಜರ್ ಕೆ.ಜಿಗೆ ₹210, ಬಿಳಿ ಮಾಂಜಿ ಕೆ.ಜಿಗೆ ₹1,150, ಕಪ್ಪುಮಾಂಜಿ ಕೆ.ಜಿಗೆ ₹710, ಸೀಗಡಿ ಕೆ.ಜಿಗೆ ₹550, ಏಡಿ ₹340ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.
**
ಹಣ್ಣು (ಬೆಲೆ ಕೆ.ಜಿ ₹)

ಸೇಬು;190–200

ದಾಳಿಂಬೆ;220

ಮೂಸಂಬಿ;100

ಕಿತ್ತಳೆ;70

ಸಪೋಟ;80

ಏಲಕ್ಕಿ ಬಾಳೆ;75

ಪಚ್ಚಬಾಳೆ;40

ಪಪ್ಪಾಯ;40

ಸೀಬೆ;100

ಪೈನಾಪಲ್;90

ಕರಬೂಜ;40

ಕಲ್ಲಂಗಡಿ;25

ದ್ರಾಕ್ಷಿ;60–80

***

ಧಾನ್ಯ (ಬೆಲೆ ಕೆ.ಜಿ ₹) (ಮಂಡಿಪೇಟೆ)

ತೊಗರಿ ಬೇಳೆ;105–125

ಉದ್ದಿನ ಬೇಳೆ;110–120

ಹೆಸರು ಬೇಳೆ;105–110

ಕಡಲೆ ಬೇಳೆ;65–70

ಹೆಸರು ಕಾಳು;100–105

ಕಡಲೆಕಾಳು;58–65

ಅಲಸಂದೆ;80–85

ಅವರೆಕಾಳು;120–130

ಹುರುಳಿಕಾಳು;70–75

ಹುರಿಗಡಲೆ;75–80

ಬಟಾಣಿ;55–65

ಕಡಲೆ ಬೀಜ;120–125

ಗೋಧಿ;36–40

ಸಕ್ಕರೆ;36–37

***

ತರಕಾರಿ (ಬೆಲೆ ಕೆ.ಜಿ ₹) (ಅಂತರಸನಹಳ್ಳಿ ಮಾರುಕಟ್ಟೆ)

ಬೀನ್ಸ್;35–40

ಕ್ಯಾರೆಟ್;15–20

ಬೀಟ್ರೂಟ್‌;15–20

ಈರುಳ್ಳಿ;15–20

ಟೊಮೆಟೊ;10

ಆಲೂಗಡ್ಡೆ;20–25

ಗೆಡ್ಡೆಕೋಸು;15–20

ಮೂಲಂಗಿ;15–20

ಬೆಂಡೆಕಾಯಿ;35–40

ಬದನೆಕಾಯಿ;25–30

ಎಲೆಕೋಸು;15–20

ಹೂಕೋಸು(1ಕ್ಕೆ);30

ತೊಂಡೆಕಾಯಿ;30–40

ಹಾಗಲಕಾಯಿ;25–30

ನುಗ್ಗೆಕಾಯಿ;50–60

ಮೆಣಸಿನಕಾಯಿ;50–60

ಕ್ಯಾಪ್ಸಿಕಂ;50–60

ಶುಂಠಿ;30–70

ಸೌತೆಕಾಯಿ 1ಕ್ಕೆ;8–10

ನಿಂಬೆಹಣ್ಣು 1ಕ್ಕೆ;5–6