ಹೇಮಾವತಿ ನಾಲೆಗೆ ತ್ಯಾಜ್ಯಯುಕ್ತ ನೀರು !

ತಿಪಟೂರು: ಹೇಮಾವತಿ ನಾಲೆ ನೀರಿಗೆ ತಿಪಟೂರಿನ ಒಳಚರಂಡಿ (ಯುಜಿಡಿ) ಪೈಪ್‍ಲೈನ್‍ ಕಲುಷಿತ ನೀರು ಸುಮಾರು ತಿಂಗಳಗಳಿಂದಲೂ ಸೇರುತ್ತಿದೆ. ಇದು ಜಿಲ್ಲೆಯ ಜನರ ಆತಂಕಕ್ಕೆ ಕಾರಣವಾಗಿದೆ.

ನಗರದ ರಾಷ್ಟ್ರೀಯ ಹೆದ್ದಾರಿಗೆ ಹೊಂದಿಕೊಂಡಂತೆ ಹಾದು ಹೋಗಿರುವ ಒಳಚರಂಡಿ ಯೋಜನೆ ಪೈಪ್‍ಲೈನ್ ಮಳೆ ಬಂದಾಗಲೆಲ್ಲಾ ಬಾಯಿ ತೆರೆದುಕೊಂಡು ರಸ್ತೆಯುದ್ದಕ್ಕೂ ಹರಿಯುತ್ತಾ ಸಾಗುತ್ತದೆ.

ಯುಜಿಡಿ ಮೊದಲ ಹಂತದಲ್ಲಿ ಈಡೇನಹಳ್ಳಿ ಬಳಿಯಲ್ಲಿ ಸ್ಥಾಪಿಸಲಾಗಿರುವ ಜಾಕ್‍ವೆಲ್ ಸ್ಥಾವರದಿಂದ ಸಮರ್ಪಕವಾಗಿ ನೀರು ಪಂಪ್ ಮಾಡಲು ಸಾಧ್ಯವಾಗಿಲ್ಲ. ತ್ಯಾಜ್ಯಯುಕ್ತ ನೀರು ಈಡೇನಹಳ್ಳಿ ರುದ್ರಭೂಮಿ ಎದುರಿನ ಸಣ್ಣ ಹಳ್ಳದ ಮೂಲಕ ರೈಲ್ವೆ ಲೈನ್ ಪಕ್ಕದಲ್ಲಿಯೇ ಹಾದು ಹಿಂಡಿಸ್ಕೆರೆ ಮತ್ತು ಹುಲ್ಲುಕಟ್ಟೆ ಮಧ್ಯೆ ಈಚನೂರು ಕೆರೆಗೆ ನೀರು ಪಂಪ್ ಮಾಡುವ ದೂರದಿಂದ 250 ಮೀಟರ್ ದೂರದಲ್ಲಿ ತೋಟಗಳ ಮೂಲಕವಾಗಿ ಹಾದು ತ್ಯಾಜ್ಯಯುಕ್ತ ನೀರು ಹೇಮಾವತಿ ನಾಲೆಗೆ ಸೇರುತ್ತಿದೆ.

ತಿಪಟೂರು ನಗರದಲ್ಲಿ ಒಂದು ಲಕ್ಷ ಜನಸಂಖ್ಯೆ ಗಮನದಲ್ಲಿ ಇಟ್ಟುಕೊಂಡು ಸಾಂಕ್ರಾಮಿಕ ರೋಗ ತಡೆಗಟ್ಟುವ ಉದ್ದೇಶದಿಂದಲೇ ₹65ಕೋಟಿ ವೆಚ್ಚದಲ್ಲಿ ಮೂರು ಹಂತದಲ್ಲಿ ಯುಜಿಡಿ ಯೋಜನೆ ರೂಪಿಸಲಾಗಿದೆ. ನಗರದಲ್ಲಿ ನಿತ್ಯ ಸಂಗ್ರಹವಾಗುವ 3.5 ಎಂ.ಎಲ್.ಡಿ (35ಲಕ್ಷ ಲೀಟರ್) ನೀರು ಸಂಸ್ಕರಿಸುವ ಸಲುವಾಗಿ ನಗರದ ಹೊರವಲಯದ ಹೂವಿನ ಕಟ್ಟೆ ಬಳಿಯಲ್ಲಿ ಯುಜಿಡಿ ತ್ಯಾಜ್ಯ ಸಂಸ್ಕರಣಾ ಘಟಕ ಸ್ಥಾಪಿಸಲಾಗಿದೆ.

ಮೊದಲ ಹಂತದಲ್ಲಿ ಈಡೇನಹಳ್ಳಿ ಬಳಿರುವ ಜಾಕ್‍ವೆಲ್‍ನ ಬಳಿಯಲ್ಲಿ ಕಠಿಣ ತ್ಯಾಜ್ಯ ಬೇರ್ಪಡಿಸಿ ಉಳಿದ ನೀರನ್ನು ಕಲ್ಲೇಗೌಡನಪಾಳ್ಯದ ಬಳಿ ಇರುವ ಯುಜಿಡಿ ಸಂಸ್ಕರಣ ಘಟಕಕ್ಕೆ ಪಂಪ್ ಮಾಡಲಾಗುತ್ತದೆ. ನಂತರದಲ್ಲಿ ಹಂತ ಹಂತವಾಗಿ ಸಂಸ್ಕರಣೆ ಮಾಡಿ ಕುಡಿಯಲು ಹೊರತುಪಡಿಸಿ ಉಳಿದೆಲ್ಲ ಕಾರ್ಯಗಳಿಗೆ ಉಪಯೋಗಿಸಲು ಯೋಗ್ಯವಾಗುವ ಸಾಧ್ಯತೆ ಇರುವ ನೀರನ್ನು ಹೂವಿನಕಟ್ಟೆಗೆ ಬಿಡಲಾಗುತ್ತದೆ.

ಸಮಸ್ಯೆಗೆ ಮೂಲ ಕಾರಣವೇನು?: ನಗರದ ಹಾಸನ ವೃತ್ತದಿಂದ ರಾಜಕಾಲುವೆ ಮೂಲಕ ಹರಿದು ಬರುವ ನೀರು ನೇರವಾಗಿ ಬಂದು ತಿಪಟೂರು ಅಮಾನಿಕೆರೆಗೆ ಸೇರುತ್ತಿತ್ತು. ಆದರೆ, ಕೆರೆ ಸೌಂದರೀಕಣದ ಸಲುವಾಗಿ ರಾಜಕಾಲುವೆ ನೀರನ್ನು ಕೆ.ಎಸ್.ಆರ್.ಟಿ.ಸಿ ಪಕ್ಕದಲ್ಲಿರುವ ಮ್ಯಾನ್ ಹೋಲ್‍ನ್ನು ದೊಡ್ಡ ರಂಧ್ರ ಮಾಡಿ ಹರಿಸಲಾಗುತ್ತಿದೆ.

ಅಲ್ಲದೇ ದೋಬಿಘಾಟ್ ಬಳಿಗೆ ಬರುವ ಚರಂಡಿ ನೀರು, ಮಳೆ ನೀರು ಸಹ ಮ್ಯಾನ್‍ಹೋಲ್ ಮೂಲಕವೇ ಯುಜಿಡಿ ಸೇರುತ್ತಿದೆ. ಮಳೆ ಬಂದಾಗ ಈ ರಾಜಕಾಲುವೆ ಮೂಲಕ ಸುಮಾರು 12 ರಿಂದ 15ಎಂ.ಎಲ್.ಡಿ. ನೀರು (120 ರಿಂದ 150 ಲಕ್ಷ ಲೀಟರ್) ಮಳೆ ನೀರು ಯುಜಿಡಿ ನೀರಿನೊಂದಿಗೆ ಸೇರುತ್ತಿದೆ. ಹೆಚ್ಚಿನ ಪ್ರಮಾಣ ನೀರು ಯುಜಿಡಿಗೆ ಬರುವುದರಿಂದ ಕೋಡಿ ಸರ್ಕಲ್ ಮುಂಭಾಗದ ಮ್ಯಾನ್‍ಹೊಲ್ ತೆಗೆದುಕೊಂಡು ನೀರು ಹರಿಯುತ್ತಾ ಸಾಗಿ ಈಡೇನಹಳ್ಳಿ ರುದ್ರಭೂಮಿ ಪಕ್ಕದ ಸಣ್ಣ ಹಳ್ಳದ ತಗ್ಗಿನ ಪ್ರದೇಶಕ್ಕೆ ಹರಿಯುತ್ತದೆ. ಅದೇ ಮಳೆ ಮತ್ತು ಯುಜಿಡಿ ನೀರು ಇದೀಗ ಹೇಮಾವತಿ ನಾಲೆ ಸೇರುತ್ತಿದೆ.

ಇನ್ನೂ ಹೂವಿನಕಟ್ಟೆಯಿಂದ ಬರುತ್ತಿರುವ ತ್ಯಾಜ್ಯಯುಕ್ತ ನೀರು ಹಿಂಡಿಸ್ಕೆರೆ ಕೆರೆ ಮೂಲಕ ಈಚನೂರು ಕೆರೆಗೆ ಸೇರ್ಪಡೆಯಾಗುತ್ತಿದ್ದು ತಿಪಟೂರಿನ ಜನರು ಬಳಸುವ ನೀರಿಗೂ ತ್ಯಾಜ್ಯಯುಕ್ತ ನೀರು ಸೇರಿಕೊಳ್ಳುತ್ತಿದೆ. ಮಳೆ ಕಾಲದಲ್ಲಿ ಹೆಚ್ಚಿನ ನೀರು ಹರಿಯಲಿದ್ದು ಸದ್ಯ ಕಡಿಮೆ ಪ್ರಮಾಣದಲ್ಲಿ ಕೊಳಚೆ ನೀರು ಸೇರುತ್ತಿದೆ.

ಒಟ್ಟಿನಲ್ಲಿ ಪ್ರತಿ ವರ್ಷ ಈ ಸಮಸ್ಯೆ ಎದುರಾಗುತ್ತಿದೆ. ಮಳೆ ನೀರು, ಚರಂಡಿ ನೀರಿಗೆ ಪರ್ಯಾಯ ವ್ಯವಸ್ಥೆ ಕಲ್ಪಿಸಿದರೆ ಯುಜಿಡಿ ವ್ಯವಸ್ಥೆಯೂ ಸುಲಲಿತವಾಗಿ ಕಾರ್ಯನಿರ್ವಹಿಸುತ್ತದೆ. ಈ ನಿಟ್ಟಿನಲ್ಲಿ ಶಾಶ್ವತ ಪರಿಹಾರಕ್ಕೆ ಅಧಿಕಾರಿಗಳು ಮುಂದಾಗುತ್ತಾರೆಯೇ ಕಾದು ನೋಡಬೇಕಿದೆ.