ಭಟ್ಟರ ಕೈ ಹಿಡಿದ ತಿನಿಸಿನ ಗೃಹೋದ್ಯಮ

ಬುಧವಾರ, ಮೇ 22, 2019
29 °C
ಯಲ್ಲಾಪುರದಲ್ಲಿ 25 ವರ್ಷಗಳಿಂದ ಮನೆಮಾತಾಗಿರುವ ಮಾರುತಿ ಹೋಂ ಪ್ರೊಡಕ್ಟ್ಸ್

ಭಟ್ಟರ ಕೈ ಹಿಡಿದ ತಿನಿಸಿನ ಗೃಹೋದ್ಯಮ

Published:
Updated:
Prajavani

ಯಲ್ಲಾಪುರ: ಪಟ್ಟಣದ ತಟಗಾರ್ ರಸ್ತೆಯಲ್ಲಿರುವ ಗೃಹೋದ್ಯಮ ಮಾರುತಿ ಹೋಂ ಪ್ರಾಡಕ್ಟ್ಸ್ 25 ವರ್ಷಗಳಿಂದ ಜನರಿಗೆ ಶಂಕರ ಪೋಳಿ ಹಾಗೂ ಚಕ್ಕುಲಿಯ ರುಚಿ ನೀಡುತ್ತಿದೆ. ನರಸಿಂಹ ವೆಂಕಟ್ರಮಣ ಭಟ್ಟ (ಎನ್.ವಿ.ಭಟ್ಟ) ಈ ಉದ್ಯಮವನ್ನು ಪತ್ನಿಯ ಬಂಗಾರದ ಕಿವಿಯೋಲೆಯನ್ನು ಅಡವಿಟ್ಟು ಆರಂಭಿಸಿದರು. ಅವರ ಪರಿಶ್ರಮದ ಫಲವಾಗಿ ಉದ್ಯಮ ಕೈ ಹಿಡಿದಿದೆ.

ಎನ್.ವಿ.ಭಟ್ಟ ಅವರು ಜೀವನೋಪಾಯಕ್ಕಾಗಿ ಒಂದು ಚಿಕ್ಕ ಅಂಗಡಿ ಆರಂಭಿಸಿದ್ದರು. ಆದರೆ, ಅದು ಕೈ ಹಿಡಿಯಲಿಲ್ಲ. ಮೈ ತುಂಬ ಸಾಲವಾಗಿ ತಂದೆ, ತಾಯಿ, ಮಡದಿ, ಮಕ್ಕಳನ್ನು ಸಾಕುವುದು ಹೇಗೆ ಎಂಬ ಚಿಂತೆ ಕಾಡತೊಡಗಿತ್ತು. ಆಗ ಅವರಿಗೆ ತಂದೆ ವೆಂಕಟ್ರಮಣ ಭಟ್ಟ ನೆರವಾದರು.ಅವರು ಈ ಹಿಂದೆ ಉಡುಪಿ ಹೋಟೆಲ್‌ನಲ್ಲಿ ಉದ್ಯೋಗ ಮಾಡುತ್ತಿದ್ದರು. ಅಲ್ಲಿ ಕಲಿತಿದ್ದ ಶಂಕರ ಪೋಳಿ ಹಾಗೂ ಚಕ್ಕುಲಿ ಮಾಡುವ ವಿಧಾನವನ್ನು ಮಗನಿಗೆ ಹೇಳಿಕೊಟ್ಟರು.

ಎನ್.ವಿ.ಭಟ್ಟರ ಕೈಯಲ್ಲಿ ಬಿಡಿಗಾಸೂ ಇಲ್ಲದ ಕಾರಣ ಪತ್ನಿ ಮಾದೇವಿ ತಮ್ಮ ಕಿವಿಯೋಲೆಯನ್ನು ಅಡವಿಡಲು ನೀಡಿದರು. ಒಲ್ಲದ ಮನಸ್ಸಿನಿಂದಲೇ ಭಟ್ಟರು ₹ 960ಕ್ಕೆ ಅಡವಿಟ್ಟು ಬೇಕಾದ ಸಾಮಗ್ರಿ ತಂದು ಉದ್ಯೋಗ ಆರಂಭಿಸಿದರು. ಶಂಕರ ಪೋಳಿ, ರುಚಿಯಾದ ಚಕ್ಕುಲಿ ತಯಾರಿಸಿ ₹ 2, ₹ 5 ಪ್ಯಾಕೆಟ್‌ಗಳನ್ನು ಮಾಡಿ ಅಂಗಡಿಗಳಲ್ಲಿ ಮಾರಾಟಕ್ಕಿಟ್ಟರು. ಇದಕ್ಕೆ ಬೇಡಿಕೆ ಕುದುರತೊಡಗಿತು.

ಅಂದು ಮೂರು ಕೆ.ಜಿ ಹಿಟ್ಟಿನಿಂದ ಆರಂಭವಾದ ಉದ್ಯೋಗ, ಇಂದು ದಿನಕ್ಕೆ 30 ಕೆ.ಜಿ ಹಿಟ್ಟಿನ ತಿಂಡಿ ತಯಾರಿಸುವ ಉದ್ಯಮವಾಗಿ ಬೆಳೆದಿದೆ. ಗಂಡ, ಹೆಂಡತಿಯ ಜೊತೆ ಮೂವರು ಕೆಲಸಗಾರರು ಹಾಗೂ ಕಾಲೇಜಿಗೆ ಹೋಗುವ ಮಗಳು ರಾಜೇಶ್ವರಿ, ಪೌರೋಹಿತ್ಯಕ್ಕೆ ಹೋಗುವ ಮಗ ರವಿ ಕೈಜೋಡಿಸುತ್ತಿದ್ದಾರೆ.

ಭಟ್ಟರು ಕಾಲಕ್ರಮೇಣ ಘಾಟಿ, ಮಸಾಲಾ ಶಂಕರ ಪೋಳಿ, ಅವಲಕ್ಕಿ, ಚುಡುವಾ, ಮೆಕ್ಕೆಜೋಳದ ಚುಡುವಾ, ಸೇವು, ಬಟಾಟೆ ಚಿಪ್ಸ್, ಮಸಲಾ ಕಾಬೂಲ್ ಕಡ್ಲೆ, ಮಸಾಲಾ ಶೇಂಗಾ, ಹಾಗೂ ಜಿಲೇಬಿ, ಹಾಗೂ ಬುಂದಿ ಲಾಡುಗಳನ್ನು ತಯಾರಿಸಿ ಮಾರುತ್ತಿದ್ದಾರೆ. ಮಾರಾಟಕ್ಕಾಗಿ ತಮ್ಮ ಉದ್ಯಮ ಇರುವಲ್ಲಿಯೇ ಅಂಗಡಿ ಆರಂಭಿಸಿದ್ದಾರೆ.

‘ಹೆಚ್ಚೆಚ್ಚು ತಿಂಡಿಗಳನ್ನು ತಯಾರಿಸಿ ಗುಣಮಟ್ಟ ಹಾಳು ಮಾಡಿಕೊಳ್ಳಲು ಮನಸ್ಸಿಲ್ಲ. ಹಾಗೇ ಹೆಚ್ಚು ವ್ಯಾಪಾರ ಮಾಡಿ ದಿಢೀರ್ ಶ್ರೀಮಂತನಾಗುವ ಹಂಬಲವೂ ಇಲ್ಲ. ನಾನು ಗುಣಮಟ್ಟದಲ್ಲಿ ಯಾವುದೇ ರಾಜಿ ಮಾಡಿಕೊಳ್ಳುವುದಿಲ್ಲ’ ಎಂದು ಹೇಳುತ್ತಾರೆ.

ದೃಷ್ಟಿ ದೋಷವುಳ್ಳ ಭಟ್ಟರು ಸರ್ಕಾರದಿಂದ ಅಂಗವಿಕಲರ ಸೌಲಭ್ಯಗಳನ್ನು ಪಡೆದುಕೊಂಡಿಲ್ಲ. ಸಾಂಸ್ಕೃತಿಕ ಸಮಾರಂಭಗಳಿಗೆ ಧನ ಸಹಾಯ ಮಾಡುತ್ತಾರೆ. ಇವರ ಬಳಿ ಉದ್ಯೋಗ ಕಲಿತ ಐದಾರು ಜನರು ಇದೇ ಉದ್ಯೋಗ ಮಾಡಿಕೊಂಡಿದ್ದಾರೆ.

ಯಂತ್ರಗಳ ಬಳಕೆ: ಉದ್ಯಮಕ್ಕೆ ಬೇಕಾದ ಉಪಕರಣಗಳನ್ನು ತಮಗೆ ಬೇಕಾದ ಹಾಗೆ ಹೇಳಿ ತಯಾರಿಸಿಕೊಂಡಿದ್ದಾರೆ. ಮೊದಲು ಕಟ್ಟಿಗೆ ಒಲೆಯಲ್ಲಿ ತಿಂಡಿಗಳನ್ನು ಸಿದ್ಧಪಡಿಸುತ್ತಿದ್ದವರು ಬೆಂಕಿಯ ಉಷ್ಣತೆಯ ಸ್ಥಿರತೆಯ ಕಾರಣದಿಂದ ಡೀಸೆಲ್ ಒಲೆ ಬಳಕೆ ಮಾಡುತ್ತಿದ್ದಾರೆ. ಕಾವಿಗೆ ಆರಿ ಹೋಗುವ ಎಣ್ಣೆಯ ಪ್ರಮಾಣ ಮತ್ತೆ ಭರ್ತಿಯಾಗುವಂತೆ ಪೈಪ್ ಮೂಲಕ ಹನಿ ಹನಿಯಾಗಿ ಮತ್ತೆ ಕಡಾಯಿ ಸೇರುವ ವ್ಯವಸ್ಥೆ ಮಾಡಿಕೊಂಡಿದ್ದಾರೆ. ಹಳೆಯ ಗ್ರೈಂಡರ್ ಒಂದನ್ನು ಹಿಟ್ಟು ಗಾಳಿಸುವ ಯಂತ್ರವಾಗಿ ಪರಿವರ್ತಿಸಿಕೊಂಡಿದ್ದಾರೆ. ಹಿಟ್ಟು ಮಿಶ್ರಣ ಮಾಡಲು, ಶಂಕರ ಪೋಳೆ ಲಟ್ಟಿಸಲು ಯಂತ್ರಗಳನ್ನು ಬಳಕೆ ಮಾಡುತ್ತಿದ್ದಾರೆ. ಒಂದು ಹಂತದ ಬಳಿಕ ಕೈಯಲ್ಲೇ ತೆಳ್ಳಗೆ ಒರೆಯಲಾಗುತ್ತದೆ.

ಇರ್ತಾರಾ ಮೋದಿ? ಬರ್ತಾರಾ ರಾಹುಲ್?

ಲೋಕಸಭೆ ಫಲಿತಾಂಶಕ್ಕಾಗಿ ವಿಶ್ವವೇ ಬೆರಗುಗಣ್ಣಿನಿಂದ ಕಾಯುತ್ತಿದೆ. ನರೇಂದ್ರ ಮೋದಿ ಗೆಲ್ತಾರಾ? ರಾಹುಲ್‌ ಗಾಂಧಿ ಬರ್ತಾರಾ? ರಾಜಕಾರಣದ ಕ್ಷಣಕ್ಷಣದ ಮಾಹಿತಿ, ತಾಜಾ ಅಪ್‌ಡೇಟ್‌ಗಳಿಗಾಗಿ www.prajavani.net/prajamatha ನೋಡಿ.

ಫೇಸ್‌ಬುಕ್‌ನಲ್ಲಿ ನಮ್ಮನ್ನು ಲೈಕ್ ಮಾಡಿ ಅಥವಾ ಟ್ವಿಟರ್, ಯೂಟ್ಯೂಬ್, ಇನ್‌ಸ್ಟಾಗ್ರಾಂನಲ್ಲಿ ಫಾಲೊ ಮಾಡಿ.

ತ್ವರಿತ ಸುದ್ದಿ, ನಿಖರ ವಿಶ್ಲೇಷಣೆಗೆ www.prajavani.net ಓದಿ. 'ಪ್ರಜಾವಾಣಿ' ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 5

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !