ಇಲ್ಲಿನ ವಿದ್ಯಾನಗರ ರುದ್ರಭೂಮಿಯ ಆವರಣದಲ್ಲಿ ಮಂಗಳವಾ ಸಂಜೆ ಕಳೇಬರದ ಅಂತಿಮ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿತ್ತು. ಸ್ಪೀಕರ್ ವಿಶ್ವೇಶ್ವರ ಹೆಗಡೆ ಕಾಗೇರಿ ಸೇರಿದಂತೆ ನೂರಾರು ಜನರು ಪಾರ್ಥಿವ ಶರೀರಕ್ಕೆ ನಮನ ಸಲ್ಲಿಸಿದರು. ಯಕ್ಷಗಾನ ಭಾಗವತರಾದ ಕೇಶವ ಹೆಗಡೆ ಕೊಳಗಿ, ಸತೀಶ ದಂಟ್ಕಲ್, ಗಜಾನನ ಭಟ್ಟ ತುಳಗೇರಿ, ಶ್ರೀನಿವಾಸ ಭಾಗವತ, ರವೀಂದ್ರ ಭಟ್ಟ ಅಚವೆ, ತಿಮ್ಮಪ್ಪ ಭಟ್ಟ ಬಾಳೆಹದ್ದ, ಶಂಕರ ಭಾಗವತ ಗಿರಗಡ್ಡೆ, ಶ್ರೀಧರ ಹೆಗಡೆ ಹಣಗಾರ ಅವರು ‘ನೀನೇ ಕುಣಿಸುವೆ ಜೀವರನು..’ ಪದ್ಯ ಹಾಡುವ ಮೂಲಕ ಮಂಜುನಾಥ ಭಾಗವತರಿಗೆ ಗಾನ ನಮನ ಸಲ್ಲಿಸಿದರು. ಶಂಕರ ಭಾಗವತ ಮದ್ದಲೆ, ವಿಘ್ನೇಶ್ವರ ಕೆಸರಕೊಪ್ಪ, ಪ್ರಸನ್ನ ಹೆಗ್ಗಾರ ಚಂಡೆ ನುಡಿಸಿದರು.