ಕುಮಟಾ: ಕಾಲೇಜು ಸ್ಥಗಿತಗೊಳ್ಳುವ ಆತಂಕ

200ರಲ್ಲಿ ಕುಮಟಾ ಪಟ್ಟಣದ ಮೂರೂರು ರಸ್ತೆಯಲ್ಲಿರುವ ಸರ್ಕಾರಿ ಪದವಿ ಕಾಲೇಜು ಹಾಗೂ ಬಾಡ ಸರ್ಕಾರಿ ಪದವಿ ಕಾಲೇಜು ಒಟ್ಟಿಗೆ ಆರಂಭವಾಗಿದ್ದವು. ಆರಂಭದ ಕೆಲ ವರ್ಷ ಸಾಕಷ್ಟು ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ದಾಖಲಾಗಿದ್ದರೂ ಈಚಿನ ಕೆಲ ವರ್ಷದಿಂದ ಸಂಖ್ಯೆ ಕ್ಷೀಣಿಸುತ್ತಿದೆ. ಕಲೆ ಹಾಗೂ ವಾಣಿಜ್ಯ ತರಗತಿಗಳಿರುವ ಬಾಡ ಸರ್ಕಾರಿ ಪದವಿ ಕಾಲೇಜಿನ ಈ ವರ್ಷದ ಒಟ್ಟೂ ವಿದ್ಯಾರ್ಥಿಗಳ ಸಂಖ್ಯೆ ಕೇವಲ 14 ಇದೆ.

‘ಪದವಿ ಕಾಲೇಜಿನ ಒಂದು ತರಗತಿಯಲ್ಲಿ ಕನಿಷ್ಠ 15 ವಿದ್ಯಾರ್ಥಿಗಳು ಹಾಗೂ ಕಾಲೇಜಿನ ಒಟ್ಟೂ ವಿದ್ಯಾರ್ಥಿಗಳ ಸಂಖ್ಯೆ ನೂರಕ್ಕಿಂತ ಹೆಚ್ಚು ಇರಬೇಕು ಎಂಬ ನಿಯಮವಿದೆ. ಕಾಲೇಜಿನಲ್ಲಿ ತರಗತಿ ನಡೆಸಲು ಕೊಠಡಿಗಳ ಕೊರತೆಯೂ ಇದೆ. ಪಕ್ಕದ ಖಾಸಗಿ ಹೊಟೇಲಿನ ಮಹಡಿಯ ಮೇಲಿನ ಬಾಡಿಗೆ ಕಟ್ಟಡದಲ್ಲಿ ತರಗತಿ ನಡೆಸಲಾಗುತ್ತಿದೆ’ ಎಂದು ಕಾಲೇಜಿನ ಪ್ರಾಚಾರ್ಯ ರೆಹಮಾನ್ ಸಾಬ್ ಹೇಳಿದರು.

‘ಪದವಿ ಕಾಲೇಜು ಕಟ್ಟದಲ್ಲಿಯೇ ಸರ್ಕಾರಿ ಪದವಿ ಪೂರ್ವ ಕಾಲೇಜು ಕೂಡ ಇದೆ. ಪಿಯುಸಿ ಪಾಸಾದ ನಂತರ ವಿದ್ಯಾರ್ಥಿ ಇಲ್ಲೇ ಪದವಿ ಮುಂದುವರಿಸಲು ಮನವಿ ಮಾಡುತ್ತೇವೆ. ಆದರೆ ಅವರೆಲ್ಲ ಬೇರೆ ಬೇರೆ ತರಬೇತಿಗಳಿಗೆ ಸೇರಿಕೊಳುತ್ತಿದ್ದಾರೆ. ಸುತ್ತಲೂ ಬೇರೆ ಪದವಿ ಪೂರ್ವ ಕಾಲೇಜು ಇಲ್ಲದಿರುವುದು ವಿದ್ಯಾರ್ಥಿಗಳ ಸಂಖ್ಯೆ ಕ್ಷೀಣಿಸಲು ಇನ್ನೊಂದು ಕಾರಣವಾಗಿದೆ’ ಎಂದು ಸಮಸ್ಯೆ ವಿವರಿಸಿದರು.

‘ಪದವಿ ತರಗತಿ ವಿದ್ಯಾರ್ಥಿಗಳೂ ಬೇರೆ ಕಾಲೇಜಿಗೆ ಹೋಗತೊಡಗಿದಾಗ ಅವರನ್ನು ಆಕರ್ಷಿಸಲು ಅವರ ಶುಲ್ಕ ಸಹ ಅಧ್ಯಾಪಕರೇ ಭರಿಸಿ ಕಾಲೇಜಿಗೆ ಪ್ರವೇಶಾತಿ ಮಾಡಿಸಿಕೊಂಡ ಉದಾಹರಣೆಗಳಿವೆ. ಉನ್ನತ ಶಿಕ್ಷಣ ಆಯುಕ್ತರಿಗೆ ಪತ್ರ ಬರೆದು ಮಾಹಿತಿ ಕೇಳಿದಾಗ ಅವರು ಈ ಶೈಕ್ಷಣಿಕ ವರ್ಷ ಮುಗಿಯಲಿ ಮುಂದೆ ನೋಡೋಣ ಎಂದಿದ್ದಾರೆ’ ಎಂದರು.