ಕಾರವಾರ: ದುಬಾರಿಯಾಗಲಿದೆ ‘ಟುಪಲೇವ್’ ನಿರ್ವಹಣೆ!

ಯುದ್ಧವಿಮಾನವನ್ನು ಕಾರವಾರಕ್ಕೆ ಕರೆತರುವುದರ ಜತೆಗೆ ಅದರ ಜೋಡಣೆಯ ವೆಚ್ಚವನ್ನು ನೌಕಾದಳ ನಿಭಾಯಿಸಿದೆ. ವಿಮಾನವನ್ನು ವಸ್ತುಸಂಗ್ರಹಾಲಯವಾಗಿ ಪರಿವರ್ತಿಸಲು ಇನ್ನಷ್ಟೆ ಜಿಲ್ಲಾಡಳಿತಕ್ಕೆ ಹಸ್ತಾಂತರಿಸಬೇಕಾಗಿದೆ.

‘53.6 ಮೀ. ಉದ್ದ ಮತ್ತು 35 ಮೀ.ಗೂ ಹೆಚ್ಚು ಅಗಲವಿರುವ ಯುದ್ಧವಿಮಾನ ವಸ್ತುಸಂಗ್ರಹಾಲಯ ನಿರ್ವಹಣೆಗೆ ತಗುಲಲಿರುವ ವೆಚ್ಚದ ಮಾಹಿತಿಯೇ ಜಿಲ್ಲಾಡಳಿತಕ್ಕೆ ದಿಗಿಲುಬಡಿಸಿದೆ. ಇದೇ ಕಾರಣಕ್ಕೆ ಹಸ್ತಾಂತರಕ್ಕೆ ವಿಳಂಬವಾಗುತ್ತಿದೆ’ ಎಂದು ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.

‘ಟುಪಲೇವ್ ಯುದ್ಧವಿಮಾನದ ಜೋಡಣೆ ಕಾರ್ಯದವರೆಗೆ ನೌಕಾದಳ ಜವಾಬ್ದಾರಿ ನಿಭಾಯಿಸಿದೆ. ಹಸ್ತಾಂತರ ಪ್ರಕ್ರಿಯೆಗೆ ಮುನ್ನ ನೌಕಾದಳದವರು ಕೆಲ ಸೂಚನೆಗಳನ್ನು ನೀಡಿದ್ದಾರೆ. ಹವಾನಿಯಂತ್ರಿತ ವ್ಯವಸ್ಥೆಯೂ ಸೇರಿದಂತೆ ಹಲವು ಸೌಲಭ್ಯವುಳ್ಳ ವಿಮಾನವನ್ನು ನಿರ್ವಹಣೆ ಮಾಡಲು ಮಾಸಿಕ ಕನಿಷ್ಠ ₹2 ಲಕ್ಷ ವೆಚ್ಚ ತಗಲುತ್ತದೆ. ನಿರ್ವಹಣೆಯಲ್ಲಿ ಯಾವುದೇ ವ್ಯತ್ಯಯ ಉಂಟಾಗದಂತೆ ನೋಡಿಕೊಳ್ಳಬೇಕು ಎಂದು ಸಲಹೆ ನೀಡಿದ್ದಾರೆ’ ಎಂದು ಜಿಲ್ಲಾಧಿಕಾರಿ ಗಂಗೂಬಾಯಿ ಮಾನಕರ ‘ಪ್ರಜಾವಾಣಿ’ಗೆ ತಿಳಿಸಿದರು.

‘ಯುದ್ಧವಿಮಾನ ಹಸ್ತಾಂತರ ಮಾಡಿಕೊಂಡ ತಕ್ಷಣದಿಂದಲೇ ಅದರ ನಿರ್ವಹಣೆ ಜವಾಬ್ದಾರಿ ಜಿಲ್ಲಾಡಳಿತಕ್ಕೆ ಸೇರುತ್ತದೆ. ಆದರೆ ಹಸ್ತಾಂತರಕ್ಕೆ ಮೊದಲು ವಿಮಾನ ನಿರ್ವಹಣೆಗೆ ಅಗತ್ಯ ತಯಾರಿ ಮಾಡಿಕೊಳ್ಳಬೇಕಾಗುತ್ತದೆ. ಅಲ್ಲದೆ ಇನ್ನಿತರ ಕೆಲ ತಾಂತ್ರಿಕ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಬೇಕಾಗಿದೆ. ಹೀಗಾಗಿ ಹೆಚ್ಚುವರಿ ಜಿಲ್ಲಾಧಿಕಾರಿ ಅಧ್ಯಕ್ಷತೆಯಲ್ಲಿ ತಜ್ಞರನ್ನು ಒಳಗೊಂಡ ಸಮಿತಿ ರಚಿಸಲಾಗಿದ್ದು, ಇದೇ ಸಮಿತಿ ನೌಕಾದಳದ ಜತೆಗೆ ಸಂವಹನ ನಡೆಸಿ ಹಸ್ತಾಂತರ ಪ್ರಕ್ರಿಯೆಗೆ ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಿದೆ’ ಎಂದು ತಿಳಿಸಿದರು.

2017ರಲ್ಲಿ ಭಾರತೀಯ ಸೇನೆಯ ಕರ್ತವ್ಯದಿಂದ ನಿವೃತ್ತಿಯಾದ ಯುದ್ಧವಿಮಾನವನ್ನು ತಮಿಳುನಾಡಿನ ಅರಕ್ಕೋಣಮ್‍ನಲ್ಲಿರುವ ರಾಜೋಲಿ ನೌಕಾನೆಲೆಯಿಂದ ಕಳೆದ ಸೆಪ್ಟೆಂಬರನಲ್ಲಿ ಇಲ್ಲಿಗೆ ತರಲಾಗಿದೆ.