ಹೊಸಪೇಟೆ (ವಿಜಯನಗರ): ದೇಶದ ಅತಿ ಎತ್ತರದ 405 ಅಡಿ ಎತ್ತರದ ಧ್ವಜಸ್ತಂಭವನ್ನು ನಗರದ ಮುನ್ಸಿಪಲ್‌ ಮೈದಾನದಲ್ಲಿ ಅಳವಡಿಸಲಾಗಿದ್ದು, ಸೋಮವಾರ (ಆ.15) ಪ್ರವಾಸೋದ್ಯಮ ಸಚಿವ ಆನಂದ್‌ ಸಿಂಗ್‌ ಅವರು ತ್ರಿವರ್ಣ ಧ್ವಜ ಹಾರಿಸುವ ಈ ಮೂಲಕ ಈ ಸ್ತಂಭವನ್ನು ಉದ್ಘಾಟಿಸುವರು.
ಈವರೆಗೆ ಬೆಳಗಾವಿಯಲ್ಲಿನ 361 ಅಡಿ ಎತ್ತರದ ಧ್ವಜಸ್ತಂಭ ದೇಶದ ಎತ್ತರದ ಧ್ವಜಸ್ತಂಭವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿತ್ತು. ಇನ್ನು ಆ ದಾಖಲೆ ವಿಜಯನಗರದ ಪಾಲಾಗಲಿದೆ.
ಪ್ರವಾಸೋದ್ಯಮ ಇಲಾಖೆಯ ₹6 ಕೋಟಿ ಅನುದಾನದಲ್ಲಿ ಈ ಸ್ತಂಭವನ್ನು ನಿರ್ಮಿಸಲಾಗಿದ್ದು, 120X80 ಅಡಿ ಅಳತೆಯ ಧ್ವಜ ತಯಾರಿಸಲಾಗಿದೆ. ಪುಣೆಯ ಬಜಾಜ್‌ ಕಂಪನಿಯ 85 ನುರಿತ ಕಾರ್ಮಿಕರು ಒಂದು ವಾರದಿಂದ ಹಗಲಿರುಳು ಶ್ರಮಿಸಿ ಧ್ವಜ ಸ್ತಂಭದ 13 ಬಿಡಿಭಾಗಗಳನ್ನು ಜೋಡಿಸಿದ್ದಾರೆ.
ಈ ಧ್ವಜಸ್ತಂಭದ ಅಡಿ ಸೋಮ ವಾರ 5000 ಮಕ್ಕಳು ಕೇಸರಿ, ಬಿಳಿ ಹಾಗೂ ಹಸಿರು ಬಣ್ಣದ ಟೋಪಿ ಧರಿಸಿ ತ್ರಿವರ್ಣದ ರಂಗು ಮೂಡಿಸಲಿದ್ದಾರೆ. ‘ಪ್ರವಾಸೋದ್ಯಮಕ್ಕೆ ಉತ್ತೇಜನ ಕೊಡಲು 405 ಅಡಿ ಎತ್ತರದ ಧ್ವಜಸ್ತಂಭ ನಿರ್ಮಿಸಲಾಗಿದೆ’ ಎಂದು ಸಚಿವ ಆನಂದ್‌ ಸಿಂಗ್‌ ಭಾನುವಾರ ತಿಳಿಸಿದರು.
