‘ಇನ್‌ಕ್ರೆಡಿಬಲ್ ಮಂಕಿ ಮ್ಯಾನ್’ ಚಿತ್ರೀಕರಣ

ಜಲಪಾತದ ಮೂಲೆ ಮೂಲೆಗಳಲ್ಲಿರುವ ಕಂದಕಗಳಲ್ಲಿ ಬರಿಗೈಲಿ ಕೋತಿರಾಜ್‌ ಹತ್ತಿ ಇಳಿಯುತ್ತಿದ್ದರು. ಚಿತ್ರಕ್ಕಾಗಿ ಕೃತಕವಾದ ಜೀವರಕ್ಷಕ ಸುರಕ್ಷತಾ ಸಾಧನಗಳೊಂದಿಗೆ ಹತ್ತಿ ಇಳಿಯುತ್ತಿದ್ದ ದೃಶ್ಯವನ್ನು ನೋಡುಗರು ಕುತೂಹಲದಿಂದ ವೀಕ್ಷಿಸಿದರು.

ರೋರರ್ ಜಲಪಾತದ ಮೇಲ್ಮೈನಲ್ಲಿ ಅಳವಡಿಸಿದ್ದ ವ್ಯವಸ್ಥಿತವಾದ ಹಗ್ಗದ ಸಹಾಯದೊಂದಿಗೆ ಮಂಗಳವಾರ ಕೋತಿರಾಜ್ 960 ಅಡಿ ಆಳದ ಜಲಪಾತವನ್ನು ಏರುವ ದೃಶ್ಯವನ್ನು ಮೊದಲ ಹಂತದಲ್ಲಿ ಚಿತ್ರೀಕರಿಸಲಾಗಿದೆ.

ಭಾರತೀಯ ಮೂಲದ ಆಸ್ಟ್ರೇಲಿಯಾ ಪ್ರಜೆ ಸ್ಟ್ಯಾನ್ ಲೀ ನಿರ್ದೇಶನದಲ್ಲಿ ಒಂದು ವಾರ ಚಿತ್ರೀಕರಣ ನಡೆಯಲಿದೆ. ಸಿನಿಮಾದ ಶೇ 70ರಷ್ಟು ಭಾಗವನ್ನು ಜೋಗ ಜಲಪಾತದಲ್ಲಿ ಚಿತ್ರೀಕರಿಸಲಾಗುತ್ತಿದೆ.

‘15 ಬಾರಿ ಜೋಗದ ಗುಂಡಿಗೆ ಇಳಿದು, 11 ಶವಗಳನ್ನು ಪತ್ತೆಹಚ್ಚಿರುವ ಸಮಾಜ ಸೇವೆಯನ್ನು ಮಾಡಿದ ಕ್ಷಣಗಳನ್ನು ನಿರ್ಮಾಪಕರೊಂದಿಗೆ ಹಂಚಿಕೊಂಡು, ಸಿನಿಮಾದ ಕಥೆಯಲ್ಲಿ ಅಳವಡಿಸಿಕೊಂಡಿದ್ದೇವೆ. ಆಯ ತಪ್ಪಿ ಜೋಗದ ಗುಂಡಿಯಲ್ಲಿ ರಾತ್ರಿಯೊಂದನ್ನು ಕಳೆದ ಕರಾಳ ಕಥೆಯನ್ನು ಚಿತ್ರಕಥೆಯಲ್ಲಿ ಸೇರಿಸಲಾಗಿದೆ’ ಎಂದು ಜ್ಯೋತಿರಾಜ್ ತಿಳಿಸಿದರು.

‘ನನ್ನ ಸಾಹಸವನ್ನು ವಿಶ್ವವಿಖ್ಯಾತ ಜೋಗ ಜಲಪಾತದ ವಿವಿಧ ಮಜಲುಗಳಲ್ಲಿ ಚಿತ್ರಿಸಿರುವುದು ವೈಯಕ್ತಿಕವಾಗಿ ಕೀರ್ತಿಯನ್ನು ತರುವುದರ ಜೊತೆಗೆ ಜೋಗ ಜಲಪಾತದ ವೈಭವವಿಶ್ವ ಮಟ್ಟದಲ್ಲಿ ಗುರುತಿಸುವಂತಾಗುತ್ತಿರುವುದು ಇನ್ನಷ್ಟು ಸಂತಸ ತಂದಿದೆ’ ಎಂದರು.