ಬಾಲಿವುಡ್‌ನಲ್ಲಿ ಮಿಂಚಿ, ಹಾಲಿವುಡ್‌ಗೆ ಹಾರಿದವರು ನಟಿ ದೀಪಿಕಾ ಪಡುಕೋಣೆ ಹಾಗೂ ಪ್ರಿಯಾಂಕಾ ಚೋಪ್ರಾ. ಈಗ ಈ ಸಾಲಿಗೆ ಕತ್ರಿನಾ ಕೈಫ್‌ ಕೂಡ ಸೇರುತ್ತಿದ್ದಾರೆ.
ಬಾಲಿವುಡ್‌ನ ಮುಂಚೂಣಿ ನಟಿಯರಲ್ಲಿ ಒಬ್ಬರಾಗಿರುವ ಕತ್ರಿನಾ ಈಗ ಹಾಲಿವುಡ್‌ನತ್ತ ದೃಷ್ಟಿ ನೆಟ್ಟಿದ್ದಾರೆ. ಈಚೆಗೆ ಕಾರ್ಯಕ್ರಮವೊಂದರಲ್ಲಿ ಇಂಗ್ಲಿಷ್‌ ಸಿನಿಮಾದಲ್ಲಿ ನಟಿಸುವ ತನ್ನ ಒಲವನ್ನು ಅವರು ಹಂಚಿಕೊಂಡಿದ್ದು, ‘ನಾನು ಚಿತ್ರಕತೆ ಓದಿದ ಬಳಿಕ ಸಿನಿಮಾದಲ್ಲಿ ನಟಿಸಲು ಒಪ್ಪುತ್ತೇನೆ. ಇಂಗ್ಲಿಷ್‌ ಸಿನಿಮಾದ ಚಿತ್ರಕತೆ ಇಷ್ಟ’ ಎಂದು ಹಾಲಿವುಡ್‌ ಪ್ರವೇಶಿಸುವ ಸೂಚನೆಯನ್ನು ನೀಡಿದ್ದರು.
ಗಾಳಿಸುದ್ದಿಯ ಪ್ರಕಾರ, ನಟಿ ಅಮೆರಿಕ ಪ್ರವಾಸ ತೆರಳಿದ ಸಂದರ್ಭದಲ್ಲಿ ಫಾಕ್ಸ್‌ ಸ್ಟುಡಿಯೊದ ಜೊತೆ ಸಿನಿಮಾ ಬಗ್ಗೆ ಮಾತುಕತೆ ನಡೆಸಿದ್ದಾರೆ. ಅವೆಂಜರ್ಸ್‌ ಖ್ಯಾತಿಯ ಜೆರೆಮಿ ಬೆನ್ನೆರ್‌ ಅವರ ಚಿತ್ರದಲ್ಲಿ ಕತ್ರಿನಾ ನಟಿಸಲಿದ್ದಾರೆ. ಇದು ನಿಜವಾದಲ್ಲಿ ಸದ್ಯದಲ್ಲಿ ಹಾಲಿವುಡ್‌ ಸಿನಿಮಾದಲ್ಲಿ ಕತ್ರಿನಾಳನ್ನು ಕಣ್ತುಂಬಿಕೊಳ್ಳಬಹುದು.
ಸವಾಲಿನ ಪಾತ್ರಗಳ ಬಗ್ಗೆ ಕತ್ರಿನಾ ಒಲವು
‘ಭಾರತ್‌’ ಸಿನಿಮಾದಲ್ಲಿ ವಿಭಿನ್ನವಾದ ಲುಕ್‌ನಿಂದ ಅಭಿಮಾನಿಗಳನ್ನು ಸೆಳೆದ ಕತ್ರಿನಾ ಕೈಫ್‌ ಈಗ ಸವಾಲಿನ ಪಾತ್ರದ ನಿರೀಕ್ಷೆಯಲ್ಲಿದ್ದಾರಂತೆ.
ಸಲ್ಮಾನ್‌ ಖಾನ್‌ ಸಿನಿಮಾಗಳಲ್ಲಿ ನಟಿಯರಿಗೆ ಹೆಚ್ಚಿನ ಕೆಲಸ ಇರುವುದಿಲ್ಲ ಎಂಬ ವಿಮರ್ಶಕರ ಮಾತನ್ನು ಕತ್ರಿನಾ ಯಾವಾಗಲೂ ತಳ್ಳಿ ಹಾಕಿದ್ದಾರೆ. ಆದರೆ ಭಾರತ್‌ ಸಿನಿಮಾ ಯಶಸ್ಸಿನ ಬಳಿಕ ಅವರು ಈಗ ‘ಇನ್ನೂ ಹೆಚ್ಚಿನ ಸವಾಲು ಇರುವ ಪಾತ್ರಗಳನ್ನು ಮಾಡಬೇಕು’ ಎಂದು ಹೇಳಿದ್ದಾರೆ.
‘ಈ ಮೊದಲು ಯಾವಾಗಲೂ ಮಾಡಿರದ ಪಾತ್ರಗಳನ್ನು ಇನ್ನು ಮುಂದೆ ಆಯ್ಕೆ ಮಾಡಿಕೊಳ್ಳಲು ಬಯಸುತ್ತೇನೆ. ದ್ವಿಪಾತ್ರ, ಕಾಮಿಡಿ ಸಿನಿಮಾದಲ್ಲಿ ಇನ್ನೂ ಮಾಡಿಲ್ಲ. ಸಿಂಗಲ್‌ ಮದರ್‌ ಪಾತ್ರಗಳೂ ಇದ್ದರೆ ನಟಿಯರಿಗೆ ಹೆಚ್ಚಿನ ಕೆಲಸ ಸಿಗುತ್ತದೆ’ ಎಂದು ಅವರು ಹೇಳಿದ್ದಾರೆ.
‘ಇಲ್ಲಿಯವರೆಗೂ ನಾನು ಮಾಡಿರುವ ಕೆಲವು ಸಿನಿಮಾಗಳಲ್ಲಿ ನಿರ್ದೇಶಕ ಅಥವಾ ನಿರ್ಮಾಪಕರಿಗೆ ನಾನೇ ಮೊದಲ ಆಯ್ಕೆಯಾಗಿರಲಿಲ್ಲ. ಬಾಕ್ಸ್‌ ಆಫೀಸ್‌ ಕೊಳ್ಳೆ ಹೊಡೆದ ಸಿನಿಮಾಗಳನ್ನು ನಾನು ಮಾಡಿರಬಹುದು. ಆದರೆ ಜನರಿಗೆ ಹತ್ತಿರವಾಗುವ ಪಾತ್ರವೊಂದನ್ನು ಮಾಡುವ ಕನಸಿದೆ’ ಎಂದು ಅವರು ಹೇಳಿಕೊಂಡಿದ್ದಾರೆ.
ಈಗ ರೋಹಿತ್‌ ಶೆಟ್ಟಿ ನಿರ್ದೇಶನದ ಸೂರ್ಯವಂಶಿ ಚಿತ್ರದಲ್ಲಿ ಅಕ್ಷಯ್‌ಕುಮಾರ್‌ ಜೊತೆ ನಟಿಸುತ್ತಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.