ನಟಿ ಪೂಜಾ ಹೆಗ್ಡೆ ಸಂಭಾವನೆ ಹೆಚ್ಚಿಸಿಕೊಂಡಿದ್ದೇಕೆ?

ಟಾಲಿವುಡ್‌ ಹೊರತುಪಡಿಸಿದರೆ ಬಾಲಿವುಡ್‌ನಲ್ಲೂ ಆಕೆಗೆ ಅಭಿಮಾನಿ ಬಳಗ ದೊಡ್ಡದಿದೆ. ಅವಕಾಶ ಹೆಚ್ಚಿದ ನಡುವೆಯೇ ಪೂಜಾ ಸಂಭಾವನೆಯ ಮೊತ್ತವನ್ನೂ ಹೆಚ್ಚಿಸಿಕೊಂಡಿರುವ ಸುದ್ದಿ ಟಾಲಿವುಡ್‌ ಅಂಗಳದಿಂದ ಹೊರಬಿದ್ದಿದೆ.

ಬೆಲ್ಲಮಕೊಂಡ ಶ್ರೀನಿವಾಸ್‌ ನಾಯಕರಾಗಿದ್ದ ‘ಸಾಕ್ಷ್ಯಂ’ ಚಿತ್ರಕ್ಕೂ ಪೂಜಾ ನಾಯಕಿಯಾಗಿದ್ದರು. ಆ ಸಿನಿಮಾದಲ್ಲಿನ ನಟನೆಗೆ ₹ 1.50 ಕೋಟಿ ಸಂಭಾವನೆ ಪಡೆದಿದ್ದರು. ಇದು ಅವರು ಇಲ್ಲಿಯವರೆಗೆ ಪಡೆದಿರುವ ಅತಿಹೆಚ್ಚಿನ ಸಂಭಾವನೆಯಾಗಿತ್ತು. ಆದರೆ, ಗಲ್ಲಾಪೆಟ್ಟಿಗೆಯಲ್ಲಿ ಸೂಪರ್‌ ಹಿಟ್‌ ಆದ ಅಲ್ಲು ಅರ್ಜುನ್‌ ನಾಯಕರಾಗಿದ್ದ ‘ಅಲಾ ವೈಕುಂಠಪುರಮುಲೋ’ ಚಿತ್ರದಲ್ಲಿನ ನಟನೆಗಾಗಿ ಆಕೆ ಪಡೆದ ಸಂಭಾವನೆಯ ಮೊತ್ತ ₹ 1.40 ಕೋಟಿ.

ಕೋವಿಡ್‌–19 ಪರಿಣಾಮ ಚಿತ್ರೋದ್ಯಮ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದೆ. ಕೆಲವು ನಟ, ನಟಿಯರು, ನಿರ್ದೇಶಕರು ಸಂಭಾವನೆಯ ಕಡಿತಕ್ಕೆ ಮುಂದಾಗಿದ್ದಾರೆ. ಆ ಮೂಲಕ ನಿರ್ಮಾಪಕರ ಮೇಲಿನ ಹೊರೆ ಕಡಿಮೆ ಮಾಡುವುದು ಅವರ ಇರಾದೆ. ಆದರೆ, ಕೋವಿಡ್‌ ಸಂಕಷ್ಟದಲ್ಲಿ ಪೂಜಾ ಸಂಭಾವನೆಯ ಮೊತ್ತವನ್ನು ₹ 2 ಕೋಟಿಗೆ ಹೆಚ್ಚಿಸಿಕೊಂಡಿರುವುದು ಟಾಲಿವುಡ್‌ನ ಹಲವು ನಿರ್ಮಾಪಕರ ಹುಬ್ಬೇರುವಂತೆ ಮಾಡಿದೆ.

ಪ್ರಸ್ತುತ ಪ್ರಭಾಸ್‌ ನಟನೆಯ ‘ರಾಧೆ ಶ್ಯಾಮ್‌’ ಚಿತ್ರದಲ್ಲಿನ ನಟನೆಗಾಗಿ ಆಕೆ ₹ 1 ಕೋಟಿ ಸಂಭಾವನೆ ಪಡೆದಿದ್ದಾರಂತೆ. ಅಂದಹಾಗೆ ‘ಅಲಾ ವೈಕುಂಠಪುರಮುಲೋ’ ಸಿನಿಮಾಕ್ಕೂ ಮೊದಲೇ ಈ ಚಿತ್ರಕ್ಕೆ ಅವರು ಸಹಿ ಹಾಕಿದ್ದರಂತೆ. ಹಾಗಾಗಿ, ಇದು ಕಡಿಮೆ ಸಂಭಾವನೆಯಾಗಿದೆ. ಹೊಸ ಚಿತ್ರಗಳಲ್ಲಿನ ನಟನೆಗೆ ಪೂಜಾ ಸಂಭಾವನೆ ಹೆಚ್ಚಿಸಿಕೊಂಡಿದ್ದಾರೆ ಎನ್ನುವುದು ಟಾಲಿವುಡ್‌ ಅಂಗಳದ ಮಾತು.