ರಾಧಿಕಾ ಆಪ್ಟೆ ಬಾಲಿವುಡ್ನ ಪ್ರತಿಭಾನ್ವಿತ ನಟಿ. ‘ಪಾರ್ಚ್ಡ್’, ‘ಬದ್ಲಾಪುರ್’ ಮತ್ತು ‘ಅಂಧಾದುನ್’ ಸಿನಿಮಾಗಳಲ್ಲಿನ ಆಕೆಯ ನಟನೆಯನ್ನು ಮೆಚ್ಚದವರು ವಿರಳ. ‘ಕಬಾಲಿ’ ಚಿತ್ರದ ಮೂಲಕ ‘ಸೂಪರ್ ಸ್ಟಾರ್’ ರಜನಿಕಾಂತ್ ಜೊತೆಗೂ ತೆರೆ ಹಂಚಿಕೊಂಡಿದ್ದು ಆಕೆಯ ಹಿರಿಮೆ. ಆದರೆ, ಆಕೆಗೂ ಮತ್ತು ವಿವಾದಗಳಿಗೂ ಬಿಡಿಸಲಾಗದ ನಂಟು. ತಾನು ಆಡುವ ಮಾತುಗಳಿಂದ ಆಕೆ ಆಗಾಗ್ಗೆ ವಿವಾದದ ಸುಳಿಗೆ ಸಿಲುಕುವುದು ಉಂಟು. ಈಗ ರಾಧಿಕಾ ಆಪ್ಟೆ ದಕ್ಷಿಣ ಭಾರತ ಚಿತ್ರರಂಗದಲ್ಲಿನ ಲಿಂಗ ತಾರತಮ್ಯದ ಬಗ್ಗೆ ಬಹಿರಂಗವಾಗಿ ಮಾತನಾಡಿರುವುದು ಚರ್ಚೆಗೆ ಗ್ರಾಸವಾಗಿದೆ.