‘ನಾನು ಆಗ 14 ವರ್ಷ ವಯಸ್ಸಿನವಳಾಗಿದ್ದೆ. ಕುಟುಂಬದ ಒಂದು ಪೂಜಾ ಕಾರ್ಯಕ್ರಮದಲ್ಲಿ ನಾನು ಋತುಮತಿಯಾದೆ. ಆಗ ನನ್ನ ಅಮ್ಮ ಅಲ್ಲಿರಲಿಲ್ಲ. ಹಾಗಾಗಿ, ನನ್ನ ಪಕ್ಕದಲ್ಲಿ ಕುಳಿತಿದ್ದ ಆಂಟಿಯ ಬಳಿ ಕಳವಳದಿಂದಲೇ ಈ ವಿಚಾರ ತಿಳಿಸಿದೆ (ಏಕೆಂದರೆ ನನ್ನ ಬಳಿ ಆ ಹೊತ್ತಿನಲ್ಲಿ ಸ್ಯಾನಿಟರಿ ಪ್ಯಾಡ್ ಇರಲಿಲ್ಲ). ನಾನು ತಲೆಕೆಡಿಸಿಕೊಂಡಿದ್ದನ್ನು ಹತ್ತಿರದಲ್ಲೇ ಇದ್ದ ಇನ್ನೊಬ್ಬರು ಮಹಿಳೆ ನೋಡಿದರು. ಅವರೂ ಒಳ್ಳೆಯ ಸ್ವಭಾವದವರು. ನಾನು ನನ್ನ ಆಂಟಿಯ ಹತ್ತಿರ ಹೇಳಿದ್ದನ್ನು ಕೇಳಿಸಿಕೊಂಡರು. ನನಗೆ ಸಮಾಧಾನ ಆಗುವ ರೀತಿಯಲ್ಲಿ, ಮುಗುಳುನಗುತ್ತ ‘ಪರವಾಗಿಲ್ಲ ಚಿನ್ನಾ, ದೇವರು ಕ್ಷಮಿಸುತ್ತಾರೆ’ (ಋತುಸ್ರಾವ ಇದ್ದಾಗಲೂ ಪೂಜೆಯಲ್ಲಿ ಪಾಲ್ಗೊಂಡಿದ್ದಕ್ಕೆ) ಎಂದು ಹೇಳಿದರು. ನಾನು ಸ್ತ್ರೀವಾದಿ ಆಗಿದ್ದು, ನಾಸ್ತಿಕಳಾಗಿದ್ದು ಅದೇ ದಿನ. ಆಗ ನನಗೆ 14 ವರ್ಷ ವಯಸ್ಸು’ ಎಂದು ಶ್ರದ್ಧಾ ಅವರು ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಬರೆದಿದ್ದಾರೆ.
