ಭಾನುವಾರ, ಜೂನ್ 7, 2020
22 °C
ಮನೆಮಂದಿಗೆಲ್ಲ ನಗಿಸಲು ಬಂದ

ಹುಬ್ಬಳ್ಳಿಯಾಂವ ಈ ಹ್ಯಾಪ್ಪಿಕುಮಾರ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

ಲಾಕ್‌ಡೌನ್‌ ಅವಧಿಯಲ್ಲಿ ಎಲ್ಲ ಸುರಕ್ಷಿತ ಕ್ರಮಗಳನ್ನು ಕೈಗೊಂಡು ’ಮನೆಗೆ ಮನಕೆ ನಾಟಕ’ ಯೋಜನೆಯನ್ನು ಆರಂಭಿಸಲಾಗಿದೆ ಎಂದು ರಂಗಕರ್ಮಿ ಯಶವಂತ ಸರದೇಶಪಾಂಡೆ ಹೇಳಿದರು.

ಈ ಯೋಜನೆಯಲ್ಲಿ ಏಕವ್ಯಕ್ತಿ ಪ್ರದರ್ಶನ ‘ಹ್ಯಾಪ್ಪಿಕುಮಾರ್‌ ಹುಬ್ಬಳ್ಳಿಯಾಂವ’ ನಾಟಕವನ್ನು ಪ್ರದರ್ಶಿಸಲಿದ್ದಾರೆ. ವಿಜಯ ತೆಂಡುಲ್ಕರ್‌ ರಚಿತ ಈ ನಾಟಕವನ್ನು ಅವರೇ ಅನುವಾದಿಸಿ, ಇದೀಗ ಕನ್ನಡಿಗರ ಮುಂದೆ ಪ್ರಸ್ತುತ ಪಡಿಸಲಿದ್ದಾರೆ. 

45, 60, 75 ಹಾಗೂ 90 ನಿಮಿಷಗಳ ಪ್ರಸ್ತುತಿ ಇದು. ರಾಕೇಶ್‌ ಬೇಡಿ ಅವರು ರಂಗರೂಪಕ್ಕೆ ತಂದ ಈ ಪ್ರಸ್ತುತಿಯಲ್ಲಿ 15–20 ಪಾತ್ರಗಳು ಬಂದು ಹೋಗುತ್ತವೆ. ಹುಬ್ಬಳ್ಳಿಯಿಂದ ಬೆಂಗಳೂರಿಗೆ ಚಿತ್ರನಟನಾಗುವ ಆಸೆಯಿಂದ ಬಂದ ಆನಂದ ಕುಮಾರ್‌, ಹ್ಯಾಪ್ಪಿ ಕುಮಾರ್‌ ಆಗಿ ಬದಲಾಗುವ ಪ್ರಕ್ರಿಯೆ ನಾಟಕದ ವಸ್ತುವಾಗಿದೆ. ಎರಡು ನಗರಗಳ ಜೀವನ, ಬಣ್ಣದ ಬದುಕು, ಮಾನವ ಸಹಜ ಗುಣಗಳಾದ ಪ್ರತಿಷ್ಠೆ, ಗೌರವ, ಅಹಂಕಾರ ಮುಂತಾದ ಹತ್ತುಹಲವು ಭಾವಾತಿರೇಕಗಳು ತೆಳುಹಾಸ್ಯದ ಪರದೆ ಹೊದ್ದು ಬಂದು ಹೋಗುತ್ತವೆ ಎಂದು ನಾಟಕದ ವಿಷಯವಸ್ತುವನ್ನು ವಿವರಿಸಿದರು.

ಹುಬ್ಬಳ್ಳಿಯ ಜವಾರಿ ಭಾಷೆಯಲ್ಲಿರುವ ಈ ಪ್ರದರ್ಶನವನ್ನು ‘ಮನೆಗೆ ಮನಕೆ ನಾಟಕ’ ಎಂಬ ಯೋಜನೆ ಅಡಿ ಮನೆಮನೆಗೆ ಹೋಗಿ ಪ್ರದರ್ಶಿಸುವ ಆಕಾಂಕ್ಷೆ ಸರದೇಶಪಾಂಡೆ ಅವರದ್ದು. ಪ್ರತಿ ಪ್ರದರ್ಶನಕ್ಕೂ ಗೌರವ ಸಂಭಾವನೆ ಪಡೆಯಲಿರುವ ಇವರು, ನಾಟಕ ಪ್ರದರ್ಶನದ ಮೊದಲು ಮತ್ತು ನಂತರ ಕೋವಿಡ್‌ 19 ಸುರಕ್ಷೆಯ ಬಗೆಗೂ ಜಾಗೃತಿ ಮೂಡಿಸಲಿದ್ದಾರೆ. ಸೀಮಿತ ಪರಿಕರದೊಂದಿಗೆ ಮನೆಯ ಸದಸ್ಯರೆಲ್ಲ ಕುಳಿತು ನೋಡಬಹುದಾದ ಈ ಪ್ರದರ್ಶನ 8–10 ಜನ ಸದಸ್ಯರಿರುವ ಕುಟುಂಬಗಳಿಗೆ ಹೇಳಿ ಮಾಡಿಸಿದಂತಿದೆ. ಹೆಚ್ಚಿನ ಮಾಹಿತಿಗೆ: 98452 17869

ಮೇ 15ರಂದು ವಿಶ್ವ ಕುಟುಂಬ ದಿನಾಚರಣೆ ಇದ್ದು, ಹ್ಯಾಪ್ಪಿಕುಮಾರ್‌ ಹುಬ್ಬಳ್ಳಿಯಾಂವ ಏಕವ್ಯಕ್ತಿ ಪ್ರದರ್ಶನವನ್ನು ಪ್ರಜಾವಾಣಿಯ ಫೇಸ್‌ಬುಕ್‌ಲೈವ್‌ನಲ್ಲಿ ಸಂಜೆ 4ರಿಂದ 5ವರೆಗೆ ಪ್ರಸ್ತುತ ಪಡಿಸಲಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು