ಕ್ಷೇಮ ಕುಶಲ: ನಳನಳಿಸುತ್ತಿರಲಿ ಬಾಂಧವ್ಯ.. ಕೆಲ ಸಲಹೆಗಳು ಇಲ್ಲಿವೆ

ಮನುಷ್ಯಸಂಬಂಧಗಳಲ್ಲಿ ಸಂಘರ್ಷಗಳೇನೂ ಹೊಸತಲ್ಲ; ಅವು ಮಾನವ ಸಮಾಜದೊಟ್ಟಿಗೇ ರೂಪಾಂತರಗಳನ್ನು ಹೊಂದುತ್ತಾ ಪ್ರತಿ ಕಾಲಘಟ್ಟದಲ್ಲಿಯೂ ಅನೇಕ ರೀತಿಗಳಲ್ಲಿ ಪ್ರಕಟಗೊಳ್ಳುತ್ತಾ, ವ್ಯಾಖ್ಯಾನಗೊಳ್ಳುತ್ತಾ ಮನುಷ್ಯನ ಬುದ್ಧಿಶಕ್ತಿಯನ್ನು ಭಾವನಾಪ್ರಪಂಚವನ್ನು ಕೆಣಕುತ್ತಾ ಮನುಷ್ಯಸಮೂಹವನ್ನು ತಬ್ಬಿಬ್ಬುಗೊಳಿಸುತ್ತಲೇ ಬಂದಿವೆ. ಸಂಘರ್ಷಗಳನ್ನು ನಾವು ಸಮಸ್ಯೆ ಎನ್ನುವ ರೀತಿಯಲ್ಲಿ ನೋಡುತ್ತಾ ಪರಿಹಾರಗಳನ್ನು ಹುಡುಕುವುದು ಸಂಘರ್ಷ ನಿರ್ವಹಣೆಯ ಒಂದು ಅತಿ ಸಣ್ಣ ಭಾಗ ಮಾತ್ರ. ಮುಖ್ಯವಾಗಿ ಮನುಷ್ಯ ಮನುಷ್ಯನ ನಡುವಿನ ಆಂತರಿಕ ಘರ್ಷಣೆಗಳು ನಮ್ಮನ್ನು ನಾವು ಆಳವಾಗಿ ಅರಿಯುವ ಅವಕಾಶಗಳನ್ನು ನಮ್ಮ ಮುಂದಿಡುತ್ತವೆ. ಮಾನವಸಂಬಂಧಗಳ ಆಳವಾದ ಅರಿವು ಸಮಾಜವನ್ನೂ ರಾಜಕೀಯವನ್ನ, ಕಲೆಯನ್ನೂ ಆಳವಾಗಿ ಅರಿಯುವ ಅವಕಾಶವನ್ನು ಮಾಡಿಕೊಡುತ್ತದೆ. ಹಾಗಾಗಿ ಸಂಘರ್ಷಗಳೇನೇ ಇರಲಿ, ಅವುಗಳು ತಂದಿಡುವ ಸಂಕಟದ ಕಡೆಗಷ್ಟೇ ಗಮನಹರಿಸದೆ ಸಂಘರ್ಷಗಳನ್ನು ಹೇಗೆ ರಚನಾತ್ಮಕವಾಗಿ ಉಪಯೋಗಿಸಿಕೊಂಡು ಬಾಂಧವ್ಯವನ್ನು ಸೃಜನಶೀಲವಾಗಿ ನಿರ್ಮಿಸಿಕೊಳ್ಳಬಹುದು ಎಂದು ಯೋಚಿಸುವುದು ಸಹಾಯಕವಾಗುತ್ತದೆ.

ಸೃಜನಶೀಲತೆಯೆನ್ನುವುದು ಕೇವಲ ಕಲೆಗಷ್ಟೇ ಸೀಮಿತವಾದುದಲ್ಲ; ಬದುಕನ್ನು ಬಾಂಧವ್ಯವನ್ನು ಹೊಸ ಹೊಸದಾಗಿ ಕಟ್ಟಿಕೊಳ್ಳುವುದು, ನವೀಕರಿಸಿಕೊಳ್ಳುವುದು, ಬೇರೆ ಬೇರೆ ಆಯಾಮಗಳಲ್ಲಿ ನಮ್ಮನ್ನು ಕಂಡುಕೊಳ್ಳುವುದು, ನಮ್ಮ ಅನುಭವಗಳು ಹೇಗೆ ನಮ್ಮನ್ನು ರೂಪಿಸುತ್ತಿವೆ, ಅನುಭವಗಳೊಟ್ಟಿಗೆ ಬದುಕಿನ ವಿವಿಧ ಅರ್ಥಗಳು ಹೇಗೆ ಅನಾವರಣಗೊಳ್ಳುತ್ತಿವೆ - ಎನ್ನುವುದನ್ನೆಲ್ಲಾ ಸೂಕ್ಷ್ಮವಾಗಿ ಅವಲೋಕಿಸುವುದು ಕೂಡ ಸೃಜನಶೀಲತೆಯೇ ಅಲ್ಲವೇ? ಯಾವುದೆಲ್ಲಾ ಬದುಕಿಗೆ ಜೀವಂತಿಕೆಯ ಸೌಂದರ್ಯವನ್ನು ತಂದುಕೊಡುವುದೋ, ಯಾವುದು ಬದುಕನ್ನು ರಸಮಯವಾಗಿ ಸಾಕಾರಗೊಳಿಸಿಕೊಳ್ಳುವುದಕ್ಕೆ ಪ್ರೇರಕವೋ ಅವೆಲ್ಲವೂ ಸೃಜನಶೀಲವೆ ಹೌದು.

ಎಲ್ಲರ ಬದುಕಿನಲ್ಲಿಯೂ ಯಾವ ಕಾರಣಕ್ಕಾಗಿಯಾದರೂ ಆತ್ಮೀಯ ಎನಿಸಿಕೊಳ್ಳಬಹುದಾದ ಒಂದಾದರೂ ಸಂಬಂಧವಿರುತ್ತದೆ. ಅದು ಒಂದು ಸಂಬಂಧದಲ್ಲಿನ ಸಾಂತ್ವನದ ಗುಣವಿರಬಹುದು, ಇನ್ನೊಂದರಲ್ಲಿನ ಸಮಾನ ಆಸಕ್ತಿಗಳಿರಬಹುದು, ಆಕರ್ಷಣೆಯಿರಬಹುದು, ಕರ್ತವಪ್ರಜ್ಞೆ, ಜೀವನಪ್ರೀತಿ, ನಿಷ್ಕಾರಣ ಸಹೃದಯತೆ - ಹೀಗೆ ಹಲವು ಕಾರಣಗಳಿಗಾಗಿ ಒಂದು ಸಂಬಂಧ ಮಧುರವಾಗಿರುತ್ತದೆ. ಬಾಂಧವ್ಯದಲ್ಲಿನ ಈ ಮಾಧುರ್ಯವು ಸಂಘರ್ಷ ನಿರ್ವಹಣೆಯನ್ನು ಸರಾಗವಾಗಿಸುತ್ತದೆ; ಬಾಂಧವ್ಯವನ್ನು ಮುಂದುವರೆಸಲು ಬೇಕಾದ ಬದಲಾವಣೆಗಳನ್ನು ಮಾಡಿಕೊಳ್ಳಲು ಪ್ರೇರೇಪಿಸುತ್ತದೆ.

ಸಂಘರ್ಷಗಳ ನಿರ್ವಹಣೆ ಸುಲಭವಲ್ಲ, ಎರಡು ಭಿನ್ನ ವ್ಯಕ್ತಿತ್ವಗಳ ನಡುವಿನ ಸಾಮರಸ್ಯವೆಂದರೆ ಸಾಮಾನ್ಯವಲ್ಲ, ಅದೊಂದು ಸುದೀರ್ಘ ಪ್ರಕ್ರಿಯೆ; ಅದಕ್ಕೆ ಸುಲಭವಾದ ನೇರವಾದ ಇಂಥದ್ದೇ ಎಂಬ ಸೂತ್ರವಿಲ್ಲ. ಆದರೆ ಕೆಲವು ಅಭ್ಯಾಸಗಳು ಸಂಘರ್ಷ ನಿರ್ವಹಣೆಯನ್ನು ಸ್ವಲ್ಪಮಟ್ಟಿಗೆ ಸುಲಲಿತಗೊಳಿಸಿ ಬಾಂಧವ್ಯವನ್ನು ಅರಳಿಸಬಹುದು. ಅಂತಹ ಕೆಲವು ಅಭ್ಯಾಸಗಳ ಹಿಂದಿನ ಒಳನೋಟಗಳು ಇಲ್ಲಿವೆ

. * ಪ್ರತಿಯೊಂದು ಸಂಬಂಧಕ್ಕೂ ಒಂದು ಭೂತಕಾಲವಿರುತ್ತದೆ, ಒಂದು ಚರಿತ್ರೆಯಿರುತ್ತದೆ. ಇಂದಿನ ನಮ್ಮ ಸಂಬಂಧ ಹೀಗಿರುವುದಕ್ಕೆ ‘ನಮ್ಮ ಭೂತಕಾಲ ಹೇಗಿತ್ತು’ ಎನ್ನುವುದೂ ಕಾರಣವಾಗುತ್ತದೆ. ಹಿಂದೆ ನಡೆದ ಕಹಿಘಟನೆಗಳು ಇಂದು ನಮ್ಮ ಆತ್ಮೀಯತೆಯ ಆಳವನ್ನು ನಿರ್ಧರಿಸಬಾರದೆಂದು ಬಯಸಿದರೆ ಅದಕ್ಕಾಗಿ ಸಾಕಷ್ಟು ಪರಿಶ್ರಮವನ್ನು ಪಡಬೇಕಾಗಿರುವುದು ನ್ಯಾಯವಲ್ಲವೇ? ಭೂತಕಾಲದ ಕಹಿಯನ್ನು ಮರೆಸುವಂತೆ ವರ್ತಮಾನದಲ್ಲಿ ನಮ್ಮ ವರ್ತನೆಯಿರಬೇಕು. ನಂಬಿಕೆ, ವಿಶ್ವಾಸಗಳೇ ಬಾಂಧವ್ಯದ ಅಡಿಪಾಯ, ವಿಶ್ವಾಸಾರ್ಹತೆಯಿಲ್ಲದ ಪ್ರೀತಿಗೆ ಯಾವ ಬೆಲೆಯೂ ಇಲ್ಲವಷ್ಟೇ. ಬಾಂಧವ್ಯವು ಒಂದು ಚಿಕ್ಕ ಮಗುವಿನಂತೆ, ಒಂದು ಎಳೆಯ ಸಸಿಯಂತೆ, ಅದು ಸಮಯ, ತಾಳ್ಮೆ ಮತ್ತು ಪ್ರೇಮಭರಿತ ಆರೈಕೆಯನ್ನು ಬೇಡುತ್ತದೆ. ಭೂತದಲ್ಲಿ ಸಂಬಂಧ ಹಳಸಿದ್ದು ಈಗ ಅದು ಚೇತರಿಸಿಕೊಳ್ಳುತ್ತಿದ್ದರೆ ನಮ್ಮ ನಿರೀಕ್ಷೆಗಳನ್ನು ವಾಸ್ತವಕ್ಕೆ ಸರಿಹೊಂದುವಂತೆ ಇರಿಸಿಕೊಳ್ಳುವುದು ಕ್ಷೇಮ.

* ಒಂದು ಸಂಬಂಧದಲ್ಲಿ ನಮ್ಮನ್ನು ನಾವಿರುವಂತೆ ತೆರೆದಿಟ್ಟುಕೊಳ್ಳಲು, ನಮ್ಮ ಭಾವನಾತ್ಮಕ ಅವಶ್ಯಕತೆ ಅವಲಂಬನೆಗಳ ಬಗ್ಗೆ ನಿಸ್ಸಂಕೋಚವಾಗಿ ಹೇಳಿಕೊಳ್ಳಲು, ನಮ್ಮ ಆಸೆ–ಆಕಾಂಕ್ಷೆಗಳ ಬಗ್ಗೆ ಸಹಜವಾಗಿ ಮಾತನಾಡಲು ಸಾಕಷ್ಟು ಧೈರ್ಯ ಬೇಕು. ನಮ್ಮ ಅಂತರಾಳವನ್ನು ತೆರೆದಿಟ್ಟಾಗ ಎದುರಿನವರು ನಮ್ಮನ್ನು ತಿರಸ್ಕರಿಸಬಹುದು, ನಮ್ಮಿಂದ ದೂರವಾಗಬಹುದು, ನಮ್ಮನ್ನು ನಿಕೃಷ್ಟವಾಗಿ ಕಾಣಬಹುದು, ನಮಗೆ ಹಣೆಪಟ್ಟಿಗಳನ್ನಂಟಿಸಬಹುದು. ನಮ್ಮನ್ನು ನಾವು ತೋರ್ಪಡಿಸಿಕೊಳ್ಳುವುದು ಭಾವನಾತ್ಮಕವಾಗಿ ನಮ್ಮನ್ನು ಭಗ್ನಗೊಳಿಸಿ ನಮ್ಮನ್ನು ದುರ್ಬಲರನ್ನಾಗಿ ಕಾಣಿಸುವ ಸಾಧ್ಯತೆಗಳಿದ್ದರೂ ಆಂತರ್ಯವನ್ನು ಬಿಚ್ಚಿಡದೇ ಬಾಂಧವ್ಯವನ್ನು ನಿಜದ ನೆಲೆಯಲ್ಲಿ ಕಟ್ಟಲಾಗುವುದಿಲ್ಲ.

* ಪ್ರತಿಯೊಬ್ಬರೂ ಪ್ರತಿದಿನವೂ ಬದಲಾಗುತ್ತಲೇ ಇರುತ್ತಾರೆ. ಅಂತಹ ಬದಲಾವಣೆಗಳನ್ನು ನಾವು ಗುರುತಿಸದೇ ವರ್ಷಗಳ ಹಿಂದೆ ಅವರು ಹೇಗಿದ್ದರೋ ಹಾಗೇ ಅವರ ಒಂದು ಪುರಾತನ ಚಹರೆಯನ್ನು ಮಾತ್ರ ಮನಸ್ಸಿನಲ್ಲಿಟ್ಟುಕೊಂಡು ಆ ಚಹರೆಯೇ ನಿಜದ ಅವರೆಂದು ಭ್ರಮಿಸುತ್ತಾ ಇಂದಿನ ಸತ್ಯಕ್ಕೆ ಕುರುಡರಾಗಿ ವ್ಯವಹರಿಸುವುದರಿಂದ ಸಂಬಂಧಗಳು ನಿಂತನೀರಿನಂತೆ ಬೇಸರ ತರಿಸುತ್ತವೆ. ಪ್ರತಿಯೊಬ್ಬ ವ್ಯಕ್ತಿಯ ಒಳಗೂ ವೈರುಧ್ಯಗಳಿರುವಂತೆ ಪ್ರತಿಯೊಂದು ಸಂಬಂಧದ ಬಗೆಗೂ ವಿರುದ್ಧ ಭಾವನೆಗಳಿರಬಹುದು. ಉದಾಹರಣೆಗೆ ನಾವು ಅತಿಯಾಗಿ ಪ್ರೀತಿಸುವವರನ್ನೂ ಕೆಲವು ಸಂದರ್ಭಗಳಲ್ಲಿ ಕೆಲವು ಗುಣ ಸ್ವಭಾವಗಳಿಗಾಗಿ ಅವರ ಬಗೆಗೆ ಕ್ರೋಧವಿರಬಹುದು. ವಿರೋಧಾಭಾಸಗಳನ್ನು ಒಂದೇ ವ್ಯಕ್ತಿಯಲ್ಲಿ ಕಾಣುವುದನ್ನು, ಒಂದೇ ವ್ಯಕ್ತಿಯ ಬಗೆಗೆ ನಮ್ಮಲ್ಲಿ ವಿರುದ್ಧ ಭಾವನೆಗಳಿರುವುದನ್ನು ಸ್ವೀಕರಿಸಲು ಮಾನಸಿಕ ಪ್ರಬುದ್ಧತೆ ಬೇಕು.

* ಯಾವ ಬಾಂಧವ್ಯದಲ್ಲಿ ಆತ್ಮೀಯತೆಯನ್ನು ಸಾಧಿಸಬೇಕು, ಯಾವುದರಲ್ಲಿ ಕೇವಲ ಸಾಮಾಜಿಕ ಸಾಮರಸ್ಯ ಸಾಕು, ಯಾವ ಬಾಂಧವ್ಯಕ್ಕೆ ನಮ್ಮ ಜೀವನದಲ್ಲಿ ನಮ್ಮ ಹೃದಯದಲ್ಲಿ ಎಂತಹ ಸ್ಥಾನ ನೀಡಬೇಕೆನ್ನುವುದೆಲ್ಲಾ ನಮ್ಮದೇ ಆಯ್ಕೆ. ಯಾವುದಕ್ಕೆ ಎಷ್ಟು ಆದ್ಯತೆ, ಏಕೆ ಎನ್ನುವುದೆಲ್ಲಾ ಸ್ಪಷ್ಟವಿದ್ದರೆ ನಮ್ಮ ಮನಸ್ಸನ್ನು, ಸಮಯವನ್ನು ಎಲ್ಲಿ ತೊಡಗಿಸಿಕೊಳ್ಳಬೇಕು ಎನ್ನುವುದನ್ನು ನಿರ್ಧರಿಸಬಹುದು. ‘ಈ ಬಾಂಧವ್ಯದಲ್ಲಿ ನನಗೆ ಮುಖ್ಯವಾದದ್ದು ಏನು’ ಎನ್ನುವುದು ತಿಳಿಯಾಗಿದ್ದಾಗ ಮುಖ್ಯವಲ್ಲದ ಓರೆಕೋರೆಗಳನ್ನು ನಿರ್ಲಕ್ಷಿಸಿ ಮುನ್ನಡೆಯಬಹುದು.

* ‘ಸುಮ್ಮನೆ ಜಗಳವೇಕೆ’ ಎಂದು ಸಂಘರ್ಷಗಳನ್ನು ಮುಚ್ಚಿಹಾಕಿ ತೋರಿಕೆಯ ಆತ್ಮೀಯತೆಯನ್ನು ನಟಿಸುವವರು, ನನಗೆ ಯಾರ ಮೇಲೂ ಭಾವನಾತ್ಮಕ ಅವಲಂಬನೆಯಿಲ್ಲ ಎಂದು ತಮ್ಮನ್ನು ತಾವೇ ವಂಚಿಸಿಕೊಳ್ಳುವವರು, ಸಂಬಂಧಗಳಲ್ಲಿ ಸದಾ ಘರ್ಷಣೆಯೇ ಇಲ್ಲದ ಶಾಂತಿಯಿರಬೇಕೆಂಬ ಭ್ರಮೆಯಿರುವವರು ಬದುಕೆಂಬ ಮರದಲ್ಲಿ ನಳನಳಿಸುತ್ತಿರುವ ಬಾಂಧವ್ಯವೆಂಬ ಹಣ್ಣಿನ ರುಚಿಯನ್ನು ಕಂಡುಕೊಳ್ಳಲಾರರು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಕ್ಷೇಮ ಕುಶಲ: ನಳನಳಿಸುತ್ತಿರಲಿ ಬಾಂಧವ್ಯ.. ಕೆಲ ಸಲಹೆಗಳು ಇಲ್ಲಿವೆ

ಚಿನಕುರುಳಿ ಕಾರ್ಟೂನ್: ಜುಲೈ 26 ಶನಿವಾರ 2025

BMTC ಕಲಾಸಿಪಾಳ್ಯ ಬಸ್‌ ನಿಲ್ದಾಣ ಇನ್ಮುಂದೆ ‘ದೊಡ್ಡಣ್ಣ ಶೆಟ್ಟರ’ ಬಸ್ ನಿಲ್ದಾಣ

ಖಾನಾಪುರ ಹೆದ್ದಾರಿ ಕಾಮಗಾರಿ ವಿಳಂಬ: ಗುತ್ತಿಗೆದಾರರಿಗೆ ₹3.2 ಕೋಟಿ ದಂಡ

ವೀರಶೈವ-ಲಿಂಗಾಯತ ಒಂದೇ ಎಂದರೆ ಪ್ರತ್ಯೇಕ ಧರ್ಮಕ್ಕೆ ವಿರೋಧವೇಕೆ? ಬಸವಲಿಂಗ ಶ್ರೀ

WI vs AUS: 4ನೇ ಟಿ20 ಪಂದ್ಯವನ್ನೂ ಗೆದ್ದ ಆಸಿಸ್, ಕ್ಲೀನ್‌ಸ್ವೀಪ್‌ನತ್ತ ಹೆಜ್ಜೆ

ಕೊಹ್ಲಿ, ರೋಹಿತ್ ನಿವೃತ್ತಿ ಆಯಿತು, ಮುಂದೆ ಇವರೇ.. ಅಚ್ಚರಿಯ ಹೇಳಿಕೆ ನೀಡಿದ ಕೈಫ್

ಘಟಾನುಘಟಿಗಳನ್ನು ಹೆಸರಿಸಿ ಇಂತಹ ಬೌಲರ್‌ಗಳು ಈಗ ಯಾರಿದ್ದಾರೆ ಎಂದ ಪೀಟರ್ಸನ್

ಮಂಗಳೂರು: ಕಡಲ ನಗರಿಯಲ್ಲಿ ಬ್ಯಾಡ್ಮಿಂಟನ್ ಮೊರೆತ

ಒಳನೋಟ | ‘ಉತ್ತರ’ದ ಪ್ರತಿಭಾ ವಲಸೆ

ಒಳನೋಟ | ಬದಲಾಗುತ್ತಿದೆಯೇ ಅವಿಭಜಿತ ದಕ್ಷಿಣ ಕನ್ನಡ

ಒಳನೋಟ: ವ್ಯಾಮೋಹದ ಜಿಮ್‌, ಸ್ಟೆರಾಯ್ಡ್‌

ಒಳನೋಟ | ಬೇಸಾಯಕ್ಕೆ ಯುವಜನ ಬೇಕಾಗಿದ್ದಾರೆ! ಕೃಷಿ ಒಲ್ಲೆ ಎನ್ನುವವರೇ ಹೆಚ್ಚು

ಚಿನಕುರುಳಿ ಕಾರ್ಟೂನ್: ಜುಲೈ 26 ಶನಿವಾರ 2025

BMTC ಕಲಾಸಿಪಾಳ್ಯ ಬಸ್‌ ನಿಲ್ದಾಣ ಇನ್ಮುಂದೆ ‘ದೊಡ್ಡಣ್ಣ ಶೆಟ್ಟರ’ ಬಸ್ ನಿಲ್ದಾಣ

ಖಾನಾಪುರ ಹೆದ್ದಾರಿ ಕಾಮಗಾರಿ ವಿಳಂಬ: ಗುತ್ತಿಗೆದಾರರಿಗೆ ₹3.2 ಕೋಟಿ ದಂಡ

ವೀರಶೈವ-ಲಿಂಗಾಯತ ಒಂದೇ ಎಂದರೆ ಪ್ರತ್ಯೇಕ ಧರ್ಮಕ್ಕೆ ವಿರೋಧವೇಕೆ? ಬಸವಲಿಂಗ ಶ್ರೀ