ಪ್ರಶ್ನೆಪತ್ರಿಕೆ ಸೋರಿಕೆ ನಮ್ಮ ಸರ್ಕಾರದ ವಿಫಲತೆ ತೋರುತ್ತದೆ: ಅಸ್ಸಾಂ ಸಿ.ಎಂ

ಅಸ್ಸಾಂ ವಿಧಾನಸಭೆ ಅಧಿವೇಶನದಲ್ಲಿ ಈ ಕುರಿತು ಅವರು ಮಾತನಾಡಿದರು. ‘ಮೆಟ್ರಿಕ್‌ (10ನೇ ತರಗತಿ) ಪರೀಕ್ಷೆ ಪ್ರಶ್ನೆಪತ್ರಿಕೆ ಸೋರಿಕೆಯಂಥ ಪ್ರಕರಣಗಳು ನಡೆಯಲೇಬಾರದು. ಇದು ನಮ್ಮ ವಿಫಲತೆಯನ್ನು ತೋರುತ್ತದೆ. ಇದನ್ನು ನಾನು ಒಪ್ಪಿಕೊಳ್ಳುತ್ತೇನೆ. ಶಾಲೆಯೊಂದರ ಪರೀಕ್ಷಾ ಕೇಂದ್ರದ ಮೇಲ್ವಿಚಾರಕ ಈ ಹಗರಣದ ಪ್ರಮುಖ ಆಪಾದಿತ. ಜೊತೆಗೆ, ಮೂವರು ಇತರ ಶಿಕ್ಷಕರೂ ಈ ಇದರಲ್ಲಿ ಭಾಗಿಯಾಗಿದ್ದಾರೆ ಎಂದು ತಿಳಿದುಬಂದಿದೆ’ ಎಂದರು.

ಈ ಹಗರಣದ ಹಿಂದಿರುವವರನ್ನು ಪತ್ತೆ ಮಾಡಲಾಗುವುದು ಎಂದರು.

‘ಎಸ್‌ಇಬಿಎ ಬಲಪಡಿಸಲು ಭವಿಷ್ಯದಲ್ಲಿ ಎಲ್ಲಾ ರೀತಿಯ ಕ್ರಮಗಳನ್ನು ತೆಗೆದುಕೊಳ್ಳಲಾಗುವುದು. ಅಸ್ಸಾಂ ಪೊಲೀಸರು ಈ ಪ್ರಕರಣವನ್ನು 48 ಗಂಟೆಗಳ ಒಳಗೆ ಭೇದಿಸಿದ್ದಾರೆ. ಆರೋಪಿಗಳು ಪೊಲೀಸರ ಎದುರು ಶರಣಾಗಿ, ಈ ಪ್ರಕರಣದ ಕುರಿತು ಇನ್ನಷ್ಟು ಮಾಹಿತಿ ನೀಡಬೇಕೆಂದು ಮನವಿ ಮಾಡುತ್ತೇನೆ ಎಂದು ಬಿಸ್ವಾ ಹೇಳಿದರು.

ಮಾರ್ಚ್‌ 13ರಂದು 10ನೇ ತರಗತಿ ಸಾಮಾನ್ಯ ವಿಜ್ಞಾನ ಪರೀಕ್ಷೆ ನಿಗದಿಯಾಗಿತ್ತು. ಪ್ರಶ್ನೆ ಪತ್ರಿಕೆ ಸೋರಿಕೆಯಾದ ಕಾರಣ ಪರೀಕ್ಷೆಯನ್ನು ಮುಂದೂಡಲಾಯಿತು.