ದೆಹಲಿ: ದಶಕದಲ್ಲೇ ಕನಿಷ್ಠ ತಾಪಮಾನ ದಾಖಲಾಗುವ ಸಾಧ್ಯತೆ

ದೆಹಲಿಯಲ್ಲಿ ನವೆಂಬರ್‌ ತಿಂಗಳಲ್ಲಿ ಸರಾಸರಿ ತಾಪಮಾನ 12.9 ಡಿಗ್ರಿ ಸೆಲ್ಷಿಯಸ್ ಇತ್ತು. ನವೆಂಬರ್ 1 ರಿಂದ 29ರವರೆಗೆ, ನಗರದಲ್ಲಿ ಸರಾಸರಿ ಕನಿಷ್ಠ ತಾಪಮಾನ 10.3 ಡಿ.ಸೆ. ಇತ್ತು. ಇದು ಈ ದಶಕದಲ್ಲಿ ದಾಖಲಾದ ಕನಿಷ್ಠ ಸರಾಸರಿ ತಾಪಮಾನ ಎಂದು ಐಎಂಡಿ ದತ್ತಾಂಶಗಳು ಹೇಳುತ್ತಿವೆ.

ಕಳೆದ ವರ್ಷ ಇದೇ ತಿಂಗಳಲ್ಲಿ 15 ಡಿ.ಸೆ., 2018ರಲ್ಲಿ 13.4 ಡಿ.ಸೆ. ಮತ್ತು 2017 ಮತ್ತು 2016ರಲ್ಲಿ 12.8 ಡಿಗ್ರಿ ಸರಾಸರಿ ಕನಿಷ್ಠ ತಾಪಮಾನವಿತ್ತು.

ಭಾನುವಾರ ದೆಹಲಿಯಲ್ಲಿ ಕನಿಷ್ಠ ತಾಪಮಾನ 7 ಡಿಗ್ರಿ ಸೆಲ್ಷಿಯಸ್‌. ನವೆಂಬರ್ ತಿಂಗಳಲ್ಲಿ ಸತತ ಏಳನೇ ದಿನಗಳೂ 10 ಡಿಗ್ರಿಗಿಂತ ಕಡಿಮೆ ತಾಪಮಾನ ದಾಖಲಾಗಿದೆ. ಐಎಂಡಿ ಪ್ರಕಾರ ಸೋಮವಾರ ಕೂಡ ಇಷ್ಟೇ ಕನಿಷ್ಠ ತಾಪಮಾನ ಮುಂದುವರಿಯಲಿದೆ.

ದೆಹಲಿಯಲ್ಲಿ ನ. 23 ರಂದು 6.3 ಡಿಗ್ರಿ ಕನಿಷ್ಠ ತಾಪಮಾನವಿತ್ತು. ಇದು 2003ರ ನವೆಂಬರ್‌ನಿಂದ ಇಲ್ಲಿವರೆಗೆ ದಾಖಲಾಗಿರುವ ಅತ್ಯಂತ ಕನಿಷ್ಠ ತಾಪಮಾನ ಎನ್ನುತ್ತಾರೆ ಐಎಂಡಿ ವಲಯ ಹವಾಮಾನ ಕೇಂದ್ರದ ಮುಖ್ಯಸ್ಥ ಕುಲದೀಪ್ ಶ್ರೀವಾಸ್ತವ.

ನವೆಂಬರ್ ತಿಂಗಳಲ್ಲಿ 16ನೇ ತಾರೀಖು ಹೊರತುಪಡಿಸಿ, ಉಳಿದ ಎಲ್ಲ ದಿನಗಳಲ್ಲೂ ಶೀತದ ವಾತಾವರಣವಿದ್ದು, ಸಾಮಾನ್ಯ ತಾಪಮಾನಕ್ಕಿಂತ 2 ರಿಂದ 3 ಡಿಗ್ರಿ ಸೆಲ್ಷಿಯಸ್‌ನಷ್ಟು ಕಡಿಮೆ ದಾಖಲಾಗಿತ್ತು ಎಂದು ಐಎಂಡಿ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ವರ್ಷದ ಅಕ್ಟೋಬರ್‌ನಲ್ಲಿ ಸರಾಸರಿ ಕನಿಷ್ಠ ತಾಪಮಾನ 17.2 ಡಿಗ್ರಿ ಸೆಲ್ಸಿಯಸ್ ಇತ್ತು. ಇದು 1962 ರ ನಂತರ ಈ ತಿಂಗಳಲ್ಲಿ ಇಷ್ಟು ಕನಿಷ್ಠ ತಾಪಮಾನ ದಾಖಲಾದ ಉದಾಹರಣೆ ಇರಲಿಲ್ಲ. ಆಗ 16.9 ಡಿಗ್ರಿ ಸೆಲ್ಸಿಯಸ್ ದಾಖಲಾಗಿತ್ತು.