ಮುಂಬೈ: ಮಹಾರಾಷ್ಟ್ರದಲ್ಲಿ ಕೊರೊನಾ ವೈರಸ್ನ ರೂಪಾಂತರ ತಳಿ ಓಮೈಕ್ರಾನ್ನ 8 ಪ್ರಕರಣಗಳು ಶುಕ್ರವಾರ ದೃಢಪಟ್ಟಿವೆ. ಇದರೊಂದಿಗೆ ರಾಜ್ಯದಲ್ಲಿ ಈವರೆಗೆ ದೃಢಪಟ್ಟ ಓಮೈಕ್ರಾನ್ ಪ್ರಕರಣಗಳ ಸಂಖ್ಯೆ 40ಕ್ಕೆ ಏರಿಕೆಯಾಗಿದೆ.
ಪುಣೆಯಲ್ಲಿರುವ ರಾಷ್ಟ್ರೀಯ ವೈರಾಲಜಿ ಸಂಸ್ಥೆ ನೀಡಿರುವ ಮಾಹಿತಿ ಪ್ರಕಾರ, 8 ಮಂದಿ ಸೋಂಕಿತರಲ್ಲಿ 6 ಜನ ಪುಣೆಯವರು. ಒಬ್ಬರು ಮುಂಬೈ ಹಾಗೂ ಮತ್ತೊಬ್ಬರು ಕಲ್ಯಾಣ್ ದೊಂಬಿವಿಲಿಯವರು.
ಪ್ರಾಥಮಿಕ ಮಾಹಿತಿ ಪ್ರಕಾರ ಸೊಂಕಿತರಲ್ಲಿ ನಾಲ್ವರು ದುಬೈ ಪ್ರಯಾಣದ ಹಿನ್ನೆಲೆ ಹೊಂದಿದ್ದಾರೆ. ಇನ್ನಿಬ್ಬರು ಅವರ ಸಂಪರ್ಕಕ್ಕೆ ಬಂದವರು. ಮುಂಬೈಯ ವ್ಯಕ್ತಿ ಅಮೆರಿಕದಿಂದ ವಾಪಸಾಗಿದ್ದರು. ಮತ್ತೊಬ್ಬ ಸೋಂಕಿತರು ನೈಜೀರಿಯಾ ಪ್ರಯಾಣದ ಹಿನ್ನೆಲೆ ಹೊಂದಿದ್ದಾರೆ.
8 ಮಂದಿ ಸೋಂಕಿತರ ಪೈಕಿ ಇಬ್ಬರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಉಳಿದ ಆರು ಮಂದಿ ಮನೆಯಲ್ಲೇ ಪ್ರತ್ಯೇಕವಾಗಿದ್ದು ಚಿಕಿತ್ಸೆ ಪಡೆಯುತ್ತಿದ್ದಾರೆ.