ಸಾಮ್ನಾ: ಸೇನಾ, ಅಕಾಲಿದಳ ಎನ್‌ಡಿಎ ತೊರೆದ ಮೇಲೆ ಮೈತ್ರಿಕೂಟದಲ್ಲಿ ಇನ್ನೇನಿದೆ ?

‘ಮೊದಲು ಶಿವಸೇನಾ ಮೈತ್ರಿಕೂಟದಿಂದ ಹೊರ ಬಂದಿತ್ತು. ಮೈತ್ರಿಕೂಟದ ಕೊನೆಯ ಆಧಾರಸ್ತಂಭವಾಗಿದ್ದ ಶಿರೋಮಣಿ ಅಕಾಲಿದಳ ಎನ್‌ಡಿಎದಿಂದ ಹೊರ ನಡೆಯಿತು. ಆಗ, ಅವರನ್ನು ತಡೆಯುವುದಕ್ಕೆ ಯಾರೂ ಪ್ರಯತ್ನಿಸಲಿಲ್ಲ. ಪಂಜಾಬ್ ಮತ್ತು ಮಹಾರಾಷ್ಟ್ರ ರಾಜ್ಯಗಳ ‘ಬಲಿಷ್ಠ ಶಕ್ತಿ’ಯಾಗಿರುವ ಈ ಪಕ್ಷಗಳು ಎನ್‌ಡಿಎದಿಂದ ಹೊರಬಂದ ಮೇಲೆ, ಅಲ್ಲಿ ಇನ್ನೇನು ಉಳಿದಿದೆ‘ ಎಂದು ಶಿವಸೇನಾತನ್ನ ಪಕ್ಷದ ಮುಖವಾಣಿ ‘ಸಾಮ್ನಾ’ದ ಸಂಪಾದಕೀಯದಲ್ಲಿ ಪ್ರಶ್ನಿಸಿದೆ. ‘‍ಈ ಮೈತ್ರಿಕೂಟ ಎರಡು ಸಿಂಹಗಳನ್ನು (ಅಕಾಲಿದಳ ಮತ್ತು ಸೇನಾ) ಕಳೆದುಕೊಂಡಿದೆ’ ಎಂದು ಉಲ್ಲೇಖಿಸಲಾಗಿದೆ.

ಮಹಾರಾಷ್ಟ್ರದಲ್ಲಿ ಮುಖ್ಯಮಂತ್ರಿ ಆಯ್ಕೆ ವೇಳೆ ಬಿಜೆಪಿಯೊಂದಿಗೆ ಭಿನ್ನಾಭಿಪ್ರಾಯ ಉಂಟಾದ ಕಾರಣ ಶಿವಸೇನಾ, ಎನ್‌ಡಿಎ ತೊರೆದಿತ್ತು. ಇತ್ತೀಚೆಗೆ ಸಂಸತ್ತಿನಲ್ಲಿ ಕೃಷಿ ಮಸೂದೆಗಳಿಗೆ ಒಪ್ಪಿಗೆ ನೀಡಿದ್ದನ್ನು ವಿರೋಧಿಸಿ ಶಿರೋಮಣಿ ಅಕಾಲಿದಳದ ಹರ್ಸಿಮ್ರತ್ ಕೌರ್ ಬಾದಲ್‌ ತಮ್ಮ ಸ್ಥಾನಕ್ಕೆ ರಾಜೀನಾಮೆ ನೀಡಿದರು. ನಂತರ, ಅಕಾಲಿ ದಳ ಮೈತ್ರಿಕೂಟದಿಂದ ಹೊರಗುಳಿಯುವುದಾಗಿ ಪ್ರಕಟಿಸಿತು.