ದಿಬ್ರುಗಡ: ಕೋವಿಡ್‌–19 ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ, ಯುವರಾಜ್‌ ಸಿಂಗ್‌ ಫೌಂಡೇಷನ್‌ ಅಸ್ಸಾಂ ಆಸ್ಪತ್ರೆಯಲ್ಲಿ 100 ಹಾಸಿಗೆ ಸಾಮರ್ಥ್ಯದ ಮಕ್ಕಳ ಐಸಿಯು ಘಟಕ ಸ್ಥಾಪಿಸುವ ಕುರಿತು ಅಸ್ಸಾಂ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಯೊಂದಿಗೆ (ಎಎಂಸಿಎಚ್‌) ಒಡಂಬಡಿಕೆ ಪತ್ರಕ್ಕೆ ಸಹಿ ಹಾಕಿದೆ.
ಖ್ಯಾತ ಕ್ರಿಕೆಟಿಗ ಯುವರಾಜ್‌ ಸಿಂಗ್‌ ಅವರ ಈ ಪ್ರತಿಷ್ಠಾನವು, ಮೊದಲ ಕಂತಿನಲ್ಲಿ ಆಸ್ಪತ್ರೆಗೆ 50 ಹಾಸಿಗೆಗಳ ಘಟಕವನ್ನು ಪೂರೈಸಲಿದೆ ಎಂದು ಎಎಂಸಿಎಚ್‌ ಕಾಲೇಜಿನ ಪ್ರಾಚಾರ್ಯ ಮತ್ತು ಸೂಪರಿಂಟೆಂಡ್‌ ಸಂಜೀಬ್‌ ಕಾಕತಿ ತಿಳಿಸಿದ್ದಾರೆ.
ಮಕ್ಕಳ ಐಸಿಯುನ 100 ಹಾಸಿಗೆಗಳಲ್ಲಿ, 20 ಪೂರ್ಣ ಪ್ರಮಾಣದ ವೆಂಟಿಲೇಟರ್‌ಯುಕ್ತ ಘಟಕಗಳಾಗಿರಲಿವೆ ಎಂದು ಅವರು ಹೇಳಿದ್ದಾರೆ.
