ರಾಜಕೀಯ ಮರೆತು ಮ್ಯೂಸಿಯಂ ಸುತ್ತಿದ ಸಿಎಂ ಬಿ.ಎಸ್. ಯಡಿಯೂರಪ್ಪ

ಮುರುಘಾ ಮಠದ ಆವರಣದಲ್ಲಿ ನೂತನವಾಗಿ ನಿರ್ಮಿಸಿರುವ ‘ಮುರುಘಾಶ್ರೀ ಪ್ರಾಚ್ಯವಸ್ತು ಮ್ಯೂಸಿಯಂ’ ಅನ್ನು ಮುಖ್ಯಮಂತ್ರಿ ಭಾನುವಾರ ಉದ್ಘಾಟಿಸಿದರು. ಟೇಪ್‌ ಕತ್ತರಿಸಿ ಮುಂದಡಿ ಇಟ್ಟ ಯಡಿಯೂರಪ್ಪ ಅವರು ಕುತೂಹಲದಿಂದಲೇ ವಸ್ತು ಸಂಗ್ರಹಾಲಯ ಸುತ್ತಿದರು. ಅವರ ಮೊಗದಲ್ಲಿ ರಾಜಕೀಯದ ದುಗುಡ ಇಣುಕಲಿಲ್ಲ.

ಜೊತೆಯಲ್ಲೇ ಹೆಜ್ಜೆ ಹಾಕುತ್ತಿದ್ದ ಶಿವಮೂರ್ತಿ ಮುರುಘಾ ಶರಣರು ಮ್ಯೂಸಿಯಂ ಬಗ್ಗೆ ವಿವರಣೆ ನೀಡುತ್ತಿದ್ದರು. ಪ್ರತಿ ವಸ್ತುವಿನ ಹಿನ್ನೆಲೆ, ಪ್ರಾಮುಖ್ಯತೆಯನ್ನು ವಿವರಿಸುತ್ತಿದ್ದರು. ಗಮನ ಸೆಳೆದ ಪರಿಕರಗಳನ್ನು ಮುಖ್ಯಮಂತ್ರಿ ಸೂಕ್ಷ್ಮವಾಗಿ ಪರಿಶೀಲಿಸುತ್ತಿದ್ದರು. ಪ್ರವೇಶ ದ್ವಾರದ ಸಮೀಪದ ಕೆಲ ವಸ್ತುಗಳನ್ನು ಸಾಂಕೇತಿಕವಾಗಿ ವೀಕ್ಷಿಸಬಹುದು ಎಂಬ ಆಯೋಜಕರ ಊಹೆಯನ್ನು ಅವರು ಹುಸಿಗೊಳಿಸಿದರು. ತಳಮಹಡಿಯಲ್ಲಿದ್ದ ಎಲ್ಲ ವಸ್ತುಗಳನ್ನು ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದರು.

ಕಲ್ಲಿನ ವಸ್ತುಗಳ ವಿಭಾಗ ಮುಖ್ಯಮಂತ್ರಿಯ ಗಮನ ಸೆಳೆಯಿತು. ಹಲವು ಶತಮಾನಗಳಷ್ಟು ಹಳೆಯದಾದ ಕಲ್ಲಿನ ಆಕೃತಿಗಳನ್ನು ತದೇಕಚಿತ್ತದಿಂದ ವೀಕ್ಷಿಸಿದರು. ನೀರು ಸಂಗ್ರಹಕ್ಕೆ ಪೂರ್ವಜರು ರೂಪಿಸಿದ್ದ ಕಲ್ಲಿನ ಬಾನಿಗಳನ್ನು ಬೆರಗಿನಿಂದ ನೋಡಿದರು. ಜೋಳ, ರಾಗಿ ಬೀಸಲು ಆನೆ ಕಟ್ಟಿ ಬಳಸುತ್ತಿದ್ದ ಬೃಹದಾಕಾರದ ಬೀಸುವ ಕಲ್ಲು ನೋಡಿ ಚಕಿತರಾದರು. ಭಾರಿ ಆಕಾರದ ಬೀಸುವ ಕಲ್ಲನ್ನು ಮುಟ್ಟಿ ನೋಡಿ ಛಾಯಾಚಿತ್ರಗಳಿಗೆ ಪೋಸು ನೀಡಿದರು.

ಕಂಚು, ಪಂಚಲೋಹಗಳಿಂದ ನಿರ್ಮಿಸಿದ ಗಣೇಶ, ಲಕ್ಷ್ಮಿ, ಸರಸ್ವತಿ ಸೇರಿದಂತೆ ನೂರಾರು ದೇವರ ವಿಗ್ರಹ ನೋಡುತ್ತ ಮುಂದೆ ಸಾಗಿದರು. ರಾಮಾಯಣ ಮತ್ತು ಮಹಾಭಾರತದ ವಿಗ್ರಹಗಳು ಅವರನ್ನು ಗತಕಾಲಕ್ಕೆ ಜಾರುವಂತೆ ಮಾಡಿದವು. ಪ್ರಾಚೀನ ಕಾಲದ ವಸ್ತುಗಳು ಅವರಿಗೆ ಹೊಸದೊಂದು ಪ್ರಪಂಚವನ್ನು ಪರಿಚಯಿಸಿದವು.

‘ಒಂದನೇ ಶತಮಾನದಿಂದ 21ನೇ ಶತಮಾನದವರೆಗಿನ ಸುಮಾರು 50 ಸಾವಿರ ವಸ್ತುಗಳು ಮ್ಯೂಸಿಯಂನಲ್ಲಿವೆ. ಅಪರೂಪದ ಕಾಷ್ಠಶಿಲ್ಪ ಕಲಾಕೃತಿ, ವಿಗ್ರಹಗಳನ್ನು ಸಂಗ್ರಹಿಸಿಡಲಾಗಿದೆ. ಭಾರತ, ರೋಮ್‌ ನಾಣ್ಯ ಹಾಗೂ ಅಂಚೆ ಚೀಟಿಗಳು ಇಲ್ಲಿವೆ. ನಾಲ್ವರು ಪೀಠಾಧಿಪತಿಗಳಿಗೆ ಸಲ್ಲಿಸಿದ ಬಿನ್ನವತ್ತಳೆ, ಬಳಸಿದ ಪೂಜಾ ಸಾಮಗ್ರಿಗಳನ್ನು ಪ್ರದರ್ಶನಕ್ಕೆ ಇಡಲಾಗಿದೆ’ ಎಂದು ಶಿವಮೂರ್ತಿ ಮುರುಘಾ ಶರಣರು ಮಾಹಿತಿ ನೀಡಿದರು.

ಹಲವು ದಶಕಗಳ ಹಿಂದಿನ ಕ್ಯಾಮೆರಾ ಸಂಗ್ರಹಗಳನ್ನು ನೋಡಿ ಮಾಹಿತಿ ಪಡೆದರು. ಕತ್ತಿ, ಗುರಾಣಿ ಸೇರಿ ಯುದ್ಧದಲ್ಲಿ ಬಳಕೆ ಮಾಡುತ್ತಿದ್ದ ಇತರ ಆಯುಧಗಳನ್ನು ಕೊಂಚ ಸೂಕ್ಷ್ಮವಾಗಿ ಗಮನಿಸಿದರು. ಸಂಗೀತ ಪರಿಕರ, ತಾಳೆಗರಿ ಸಾಹಿತ್ಯದ ಕಟ್ಟುಗಳನ್ನು ವೀಕ್ಷಿಸಿದರು. ಪಲ್ಲಕ್ಕಿಯ ಸಮೀಪದಲ್ಲಿದ್ದ ಬಸವಣ್ಣನ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಮಾಡಿ ಮ್ಯೂಸಿಯಂನಿಂದ ಹೊರಬಂದರು.