ಬೆಂಗಳೂರು: ಇತ್ತೀಚೆಗೆ ಸುರಿದ ಭಾರಿ ಮಳೆಯಿಂದಾಗಿ ಟೊಮೆಟೊ, ಬೀನ್ಸ್‌ ಸೇರಿದಂತೆ ಕೆಲ ತರಕಾರಿಗಳ ದರ ದಿಢೀರ್ ಏರಿದೆ.
ಎರಡು ವಾರಗಳ ಹಿಂದೆ ಟೊಮೆಟೊ ದರ ಕೆ.ಜಿ.ಗೆ ₹ 20ರಷ್ಟಿತ್ತು. ಗಣನೀಯ ಏರಿಕೆ ಕಂಡಿರುವ ಟೊಮೆಟೊ ಸದ್ಯ ₹ 60ರಿಂದ ₹ 70ರವರೆಗೆ ಮಾರಾಟವಾಗುತ್ತಿದೆ. ಬೀನ್ಸ್‌ ದರವೂ ಏರಿದ್ದು, ಕೆ.ಜಿ.ಗೆ ₹ 80ರಂತೆ ಸೋಮವಾರ ಮಾರಾಟವಾಗಿದೆ.
ಸುಮಾರು ಎರಡು ತಿಂಗಳಿನಿಂದ ಏರುಗತಿಯಲ್ಲೇ ಇದ್ದ ಹಸಿಮೆಣಸಿನಕಾಯಿ ದರ ₹ 40ಕ್ಕೆ ಕುಸಿದಿದೆ. ದಪ್ಪ ಮೆಣಸಿನಕಾಯಿ (ಕ್ಯಾಪ್ಸಿಕಂ) ₹ 50ರಂತೆ ಮಾರಾಟವಾಗುತ್ತಿದೆ.
‘ಇತ್ತೀಚೆಗೆ ಸುರಿದ ಭಾರಿ ಮಳೆಗೆ ಟೊಮೆಟೊ ಮತ್ತು ಬೀನ್ಸ್‌ ಬೆಳೆಗಳಿಗೆ ಹಾನಿಯಾಗಿದೆ. ಇದರಿಂದಾಗಿ ಟೊಮೆಟೊ ಮತ್ತು ಬೀನ್ಸ್‌ ದರ ದಿಢೀರ್ ಏರಿಕೆಯಾಗಿದೆ. ನಗರದ ವಿವಿಧ ಬಡಾವಣೆಗಳಲ್ಲಿರುವ ಚಿಲ್ಲರೆ ವ್ಯಾಪಾರಿಗಳು ಕೆ.ಜಿ. ಟೊಮೆಟೊ ₹80ರವೆರೆಗೆ ಮಾರಾಟ ಮಾಡುತ್ತಿದ್ದಾರೆ. ಇನ್ನೂ ಒಂದು ತಿಂಗಳು ಬೆಲೆ ಏರಿಕೆ ಮುಂದುವರಿಯುವ ಸಾಧ್ಯತೆ ಇದೆ’ ಎಂದು ಎಪಿಎಂಸಿ ಮಾರುಕಟ್ಟೆಯ ತರಕಾರಿ ವರ್ತಕ ಕುಮಾರ್ ಹೇಳಿದರು.
ಸೊಪ್ಪಿನ ದರ ಏರುಪೇರು ಮೆಂತ್ಯ ಸೊಪ್ಪು ದುಬಾರಿಯಾಗಿದ್ದು, ಪ್ರತಿ ಕಟ್ಟಿಗೆ ₹35ರವರೆಗೆ ಏರಿದೆ. ಕೊತ್ತಂಬರಿ, ಸಬ್ಬಕ್ಕಿ ₹20 ಹಾಗೂ ದಂಟು, ಪಾಲಕ್‌ ₹15ರಂತೆ ಮಾರಾಟವಾಗುತ್ತಿವೆ. ಬೇಸಿಗೆ ಇರುವುದರಿಂದ ಹಣ್ಣಿನ ದರಗಳೆಲ್ಲ ತಿಂಗಳಿನಿಂದಲೂ ಏರಿವೆ. ಮಾವಿನ ಅವಧಿ ಆರಂಭವಾಗಿರುವುದರಿಂದ 10ಕ್ಕೂ ಹೆಚ್ಚು ತಳಿಯ ಮಾವು ಮಾರುಕಟ್ಟೆಗಳಿಗೆ ಲಗ್ಗೆ ಇಟ್ಟಿವೆ. ಮಾವಿಗೆ ₹ 80ರಿಂದ ₹ 220ರವರೆಗೆ ಬೆಲೆ ಇದೆ.
