ಶುಕ್ರವಾರ, ಜೂನ್ 18, 2021
27 °C
ಮಕ್ಕಳ ಪದ್ಯ

ಜೀರುಂಡೆ

ಸುರೇಶ ನೇರ್ಲಿಗೆ Updated:

ಅಕ್ಷರ ಗಾತ್ರ : | |

ಒಂದಿನ ನಾನು ಹೊಲಕ್ಕೆ ಹೋದೆನು
ಅಪ್ಪನ ಜೊತೆಯಲ್ಲಿ
ಮಿಂಚುವ ಜೀರುಂಡೆ ಕಂಡೆನು ಆಗ
ಜಾಲಿಯ ಮರದಲ್ಲಿ

ಮುಳ್ಳಿನ ಗಿಡಕೆ ಕೈಯನು ಹಾಕಿ
ಹಿಡಿದೆನು ತವಕದಲಿ
ಬೆಂಕಿಪೊಟ್ಟಣದಿ ಕೂಡಿದೆ ಅದನು
ಸೊಪ್ಪನು ಹಾಕುತಲಿ

ಚಣಚಣ ತೆಗೆದು ನೋಡುತ ಕುಳಿತೆ
ಸಂತಸ ಹೊಂದುತಲಿ
ಮೊಟ್ಟೆಯನಿಕ್ಕಿಸಿ ಮರಿಯನು ಮಾಡಿಸಿ
ನೋಡುವ ಆಸೆಯಲಿ

ಕುತ್ತಿಗೆ ಹಿಡಿದು ದಾರವ ಬಿಗಿದು
ಹಾರಿಸಿ ನಲಿಯುತಲಿ
ಪುರ್ ಪುರ್ ಸದ್ದಿಗೆ ಸಂತಸಗೊಂಡು
ಪುಳಕಿತನಾಗುತಲಿ

ಉದ್ದದ ಮೀಸೆ ಗುಂಡನೆ ಕಣ್ಣು
ಮಿಂಚುವ ರೆಕ್ಕೆಯಲಿ
ಬಣ್ಣದ ಸೊಗಸು ನೀಲಿಯ ಹೊಳಪು
ಬಣ್ಣಿಸಿ ಹೇಳುತಲಿ

ಮೂರನೆ ದಿನಕೆ ಮೊಟ್ಟೆಯ ನೋಡಿ
ಆಸೆಯು ಹೆಚ್ಚುತಲಿ
ಮರಿಯನು ಕಾಣುವ ಆತುರವೇನು
ನನ್ನೆದೆ ಗೂಡಿನಲಿ

ಹಿಟ್ಟನು ತಿನ್ನಿಸಿ ಸಾಕುವ ಆಸೆಗೆ
ಜೀರುಂಡೆ ಮೌನದಲಿ
ರೆಕ್ಕೆಯ ಬಿಚ್ಚದೆ ಕಣ್ಣನು ಮುಚ್ಚಿತು
ಮೊಟ್ಟೆಯ ಪಕ್ಕದಲಿ

ಸತ್ತಿತು ನನ್ನ ಆಸೆಯ ಜೀರುಂಡೆ
ಬೇಸರ ಮಾಡುತಲಿ
ಅಯ್ಯೋ ಪಾಪ ಎನ್ನುತ ನೊಂದು
ಅತ್ತೆನು ನೆನಪಿನಲಿ.....

ಫಲಿತಾಂಶ 2021 ಪೂರ್ಣ ಮಾಹಿತಿ ಇಲ್ಲಿದೆ

ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.