ತಂಪು ತಂಪು ದಿರಿಸು

 

ಟ್ರೆಂಡಿ ಡ್ರೆಸ್‌ಗಳು: ಇದು ಫ್ಯಾಷನ್ ಕಾಲ. ಎಲ್ಲರೂ ಫ್ಯಾಷನ್‌ಗೆ ಹೆಚ್ಚು ಮಹತ್ವ ನೀಡುತ್ತಾರೆ. ಬೇಸಿಗೆ ಕಾಲದಲ್ಲಿಯೂ ಸಮ್ಮರ್ ಫ್ಯಾಷನ್ ಡ್ರೆಸ್‌ಗಳು ಸಿಗುತ್ತವೆ. ಇದರಲ್ಲಿ ಇಂದು ಇರುವ ಟ್ರೆಂಡಿ ಡ್ರೆಸ್‌ಗಳು ನಾಳೆ ಸಿಗುವುದಿಲ್ಲ. ಸಾಕಷ್ಟು ವಿಧದ ಡ್ರೆಸ್‌ಗಳು ಲಭ್ಯವಾಗುತ್ತವೆ. ಲಾಂಗ್ ಮ್ಯಾಕ್ಸಿ ಸಮ್ಮರ್ ಡ್ರೆಸ್ ಕೂಡ ಒಂದು. ಇದರಲ್ಲಿ ಬಟ್ಟೆ ಸ್ವಲ್ಪ ತೆಳುವಾಗಿ, ಲೂಸ್ ಆಗಿ ಇರುತ್ತವೆ. ಇದರಿಂದ ದೇಹಕ್ಕೆ ಗಾಳಿ ತಾಗುವುದರಿಂದ ಬಿಸಿಲಿನ ತಾಪ ಕಡಿಮೆಯಾಗುತ್ತದೆ. ಇಂತಹ ಬಟ್ಟೆಗಳು ದೇಹವನ್ನು ತಂಪಾಗಿಡುತ್ತವೆ.
 

ಮೊಣಕಾಲು ಕೆಳಗಿನವರೆಗೆ ಜೋತು ಬೀಳುವ ಕಾಟನ್ ಡ್ರೆಸ್‌ಗಳೂ ಇವೆ. ಇವುಗಳಿಂದ ದೇಹವನ್ನು ಹೆಚ್ಚು ತಂಪಾಗಿಟ್ಟುಕೊಳ್ಳಬಹುದು. ಅದರಂತೆಯೇ ಕಾಕ್ ಟೈಲ್ ಎಂಬ ವೈವಿಧ್ಯಮಯ ಡ್ರೆಸ್ ಕೂಡ ಹಾಕಬಹುದು. ಅಂದರೆ, ಮೊಣಕಾಲುಗಳಿಂತ ಕೆಳಗಿನವರೆಗೆ ಇರುವ ಡ್ರೆಸ್‌ಗಳನ್ನೂ ಹಾಕಿಕೊಳ್ಳಬಹುದು. ಆದರೆ, ಇವೆಲ್ಲ ಕಾಟನ್ ಆಗಿದ್ದರೆ ಉತ್ತಮ.

 

ತೋಳು ಸಂಪೂರ್ಣ ಮುಚ್ಚುವಂತೆ ಡ್ರೆಸ್ ಹಾಕಿಕೊಳ್ಳುವುದಕ್ಕಿಂತ ಸ್ಲೀವ್ ಲೆಸ್ ಡ್ರೆಸ್‌ಗಳಿಗೆ ಇಂತಹ ಸಂದರ್ಭದಲ್ಲಿ ಆದ್ಯತೆ ನೀಡುವುದರಿಂದ ಸೆಖೆಯನ್ನು ಕಡಿಮೆ ಮಾಡಬಹುದು. ಜೊತೆಗೆ, ಈ ರೀತಿಯ ಡ್ರೆಸ್‌ಗೆ ಆದ್ಯತೆ ನೀಡಿದಾಗ ಶಾಲು ಕೂಡ ಜತೆಗಿರಲಿ. ಆದರೆ, ಲೆಗ್ಗಿನ್ಸ್  ಇಂತಹ ಸಂದರ್ಭದಲ್ಲಿ ಸೂಕ್ತವಲ್ಲ.  

 

ಸಭೆ ಸಮಾರಂಭದಂತಹ ಸಂದರ್ಭದಲ್ಲಿ ಸೀರೆಗೆ ಆದ್ಯತೆ ನೀಡುವುದು ಒಳ್ಳೆಯದು. ಜೊತೆಗೆ ತೆಳುವಾದ ರೇಷ್ಮೆ ಸೀರೆಯಾಗಿದ್ದರೆ, ಚರ್ಮದಿಂದ ಬೆವರು ಬರುವುದನ್ನು ತಡೆಯುತ್ತದೆ. ಇದರಿಂದ ದೇಹದಿಂದ ದುರ್ಗಂಧ ಬರುವುದು ನಿಲ್ಲುತ್ತದೆ.