ಹುಸಿ ಪ್ರತಿಭಟನೆ, ಪ್ರಚಾರದ ಹಂಬಲ, ಅಂದಭಕ್ತಿಯ ಹಿಂಸೆಯ ದಾರಿಗಳನ್ನು ಅನುಸರಿಸದೇ ಕನ್ನಡ ನಾಡು–ನುಡಿಗಾಗಿ ತಮ್ಮಷ್ಟಕ್ಕೆ ತಾವು ಸೇವೆ ಸಲ್ಲಿಸುತ್ತಿರುವ ಅನೇಕ ವ್ಯಕ್ತಿಗಳು ನಮ್ಮ ನಡುವೆ ಇದ್ದಾರೆ. ಅಂತಹ ವಿರಳರಲ್ಲಿ ಒಬ್ಬರು ಎ.ನಾರಾಯಣ ಪ್ರಸಾದ್. ವೃತ್ತಿಯಿಂದ ಹಿಂದಿ ಪ್ರಾಧ್ಯಾಪಕರಾದರೂ ಅವರ ಪ್ರೀತಿ-ಪ್ರವೃತ್ತಿ ಕನ್ನಡಕ್ಕೆ ಮೀಸಲು. ಅಂತರ್ಜಾಲದ ಬ್ಲಾಗ್ಗಳ ಮೂಲಕ ಅವರು ಸಲ್ಲಿಸುತ್ತಿರುವ ಕನ್ನಡ ಸೇವೆ ಪ್ರಶಂಸನಾರ್ಹವಾದದ್ದು.
ಸರ್ಕಾರಿ ಕಾಲೇಜಿನಲ್ಲಿ ಹಿಂದಿ ಅಧ್ಯಾಪಕರಾಗಿ ಸುಮಾರು ಇಪ್ಪತ್ತೈದು ವರ್ಷಗಳಿಗೂ ಹೆಚ್ಚಿನ ಕಾಲ ಸೇವೆ ಸಲ್ಲಿಸಿ, ರಾಜ್ಯ-ರಾಷ್ಟ್ರ-ಅಂತರರಾಷ್ಟ್ರೀಯ ಮಟ್ಟದ ವಿಚಾರ ಸಂಕಿರಣಗಳಲ್ಲಿ ವಿದ್ವತ್ಪೂರ್ಣ ಪ್ರಬಂಧಗಳನ್ನು ಮಂಡಿಸಿದ ಅನುಭವ ನಾರಾಯಣ ಪ್ರಸಾದ್ ಅವರದು. ನಾಲ್ಕು ವರ್ಷಗಳ ಹಿಂದೆ ತಮ್ಮ ಈ ಪ್ರಬಂಧಗಳನ್ನು ಅಂತರ್ಜಾಲದಲ್ಲಿ ಪ್ರಕಟಿಸಲೆಂದು ವೈಯಕ್ತಿಕ ಬ್ಲಾಗ್ ಒಂದನ್ನು ತೆರೆದರು.
‘ಶಿಕ್ಷಣ-ವೃತ್ತಿ ತರಬೇತಿ’ ಕುರಿತ ಮಾಹಿತಿಗಳನ್ನೂ ಅದರಲ್ಲಿ ಪ್ರಕಟಿಸತೊಡಗಿದರು. ಸಾಹಿತ್ಯ-ಸಂಗೀತದಲ್ಲೂ ಆಸಕ್ತಿ ಇದ್ದುದರಿಂದ ‘ನಾನೇಕೆ ನಮ್ಮ ಹಾಸನದ ಸಾಹಿತಿ-ಕಲಾವಿದರ ಮಾಹಿತಿಯನ್ನು ಬ್ಲಾಗ್ಗೆ ರವಾನಿಸಬಾರದು?’ ಎಂದುಕೊಂಡು ಕನ್ನಡ ಸಾಹಿತಿಗಳ ಮನೆಗಳನ್ನು ಎಡತಾಕಿದರು. ಕಾಲೇಜು ಶಿಕ್ಷಣ ಇಲಾಖೆಯ ನೋಡಲ್ ಅಧಿಕಾರಿಯಾಗಿ ಪದೋನ್ನತಿ ಪಡೆದು ಬೆಂಗಳೂರಿಗೆ ವರ್ಗವಾದ ಮೇಲೆ ಆ ಕೆಲಸ ವಿಸ್ತಾರವಾಯಿತು.
ವಿಶಿಷ್ಟ ಪರಿಕಲ್ಪನೆ
ಬ್ಲಾಗ್ ಮಾಧ್ಯಮ ಶ್ರವಣ-ದೃಶ್ಯ ಮಾಧ್ಯಮಗಳಿಗೆ ವಿಪುಲ ಆಯ್ಕೆ-ಅವಕಾಶಗಳನ್ನು ಹೊಂದಿರುವ ವೇದಿಕೆ. ‘ಇಂಥ ಮಾಧ್ಯಮದಲ್ಲಿ ಸಾಹಿತಿ-ಕಲಾವಿದರ ಕುರಿತ ವಿವರ ಬರೆಯುವುದರಲ್ಲಿ ಹೊಸತೇನೂ ಇರುವುದಿಲ್ಲ. ಬದಲಿಗೆ ವಿಡಿಯೊ ಸಂದರ್ಶನ ಮಾಡಿದರೆ ಅದೊಂದು ಶಾಶ್ವತ ಸಾಕ್ಷ್ಯಚಿತ್ರವೇ ಆಗಬಹುದಲ್ಲ?’ ಎಂಬ ಯೋಚನೆಯಿಂದ ಸಾಹಿತಿಗಳ ವಿಳಾಸ-ದೂರವಾಣಿ ಸಂಖ್ಯೆಗಳನ್ನು ಕಲೆ ಹಾಕಿದರು. ತಮ್ಮ ವಿಡಿಯೊ ಚಿತ್ರಿಕೆಗಳಿಗೆ ನಾರಾಯಣ ಪ್ರಸಾದರು ವಿನೂತನ ಚೌಕಟ್ಟು-ವಿಶಿಷ್ಟ ನಮೂನೆಯನ್ನು ರೂಪಿಸಿದರು.
ಕೇವಲ ಹವ್ಯಾಸಕ್ಕೆಂದು ಆರಂಭವಾದ ಈ ಚಟುವಟಿಕೆ ಅವರಿಗೇ ಅರಿವಿಲ್ಲದಂತೆ ನೂರು ದಾಟಿ, ಸಾವಿರಕ್ಕೆ ಕಾಲಿಟ್ಟಿತು. ಇದುವರೆವಿಗೂ ಒಂದು ಸಾವಿರದ ಒಂದು ನೂರು ವಿಡಿಯೊ ಚಿತ್ರಿಕೆಗಳು ಅಂತರ್ಜಾಲದಲ್ಲಿ ಹರಿದು, ಕನ್ನಡಿಗರ ಮನೆ-ಮನ ಮುಟ್ಟಿವೆ. 26 ದೇಶಗಳ 14 ಲಕ್ಷ ವೀಕ್ಷಕರು ಈ ದೃಶ್ಯಗಳಿಗೆ ಮೆಚ್ಚುಗೆ ಸೂಚಿಸಿದ್ದಾರೆ. ಅನೇಕ ಕನ್ನಡ ಸಾಹಿತಿ-ಕಲಾವಿದರನ್ನು ಸಂಪರ್ಕಿಸುವ ವೇದಿಕೆಯಾಗಿವೆ. ಡಿ.ವಿ.ಜಿ.ಯವರಂಥ ಸಾಹಿತಿ ದಿಗ್ಗಜರ ಬಗ್ಗೆ ಯುವಜನರಿಗೆ ಅರಿವು ಮೂಡಿಸುವ ಶೈಕ್ಷಣಿಕ ವಾಹಿನಿಯಾಗಿವೆ.
ನಾರಾಯಣ ಪ್ರಸಾದರ ಬ್ಲಾಗ್ಗಳಲ್ಲಿ ಶಾಲಾ-ಕಾಲೇಜುಗಳ ಪಠ್ಯದಲ್ಲಿನ ಕನ್ನಡ-ಹಿಂದಿ ಕವಿತೆಗಳ ಗಾಯನ, ಖ್ಯಾತ ಲೇಖಕರಿಂದ ಅವುಗಳ ವ್ಯಾಖ್ಯಾನಗಳೂ, ಇಂಗ್ಲಿಷ್ ಕಠಿಣವೆನ್ನುವ ಗ್ರಾಮೀಣ ವಿದ್ಯಾರ್ಥಿಗಳಿಗೆ ಇಂಗ್ಲಿಷ್ ಪಾಠಗಳು ಲಭ್ಯವಿದೆ. ಬಹುಮುಖಿ ಪ್ರತಿಭೆಯ ಅವರು ಕ್ರೀಡೆ, ಚಾರಣ, ಪ್ಯಾರಾ ಸೈಕ್ಲಿಂಗ್ ಸಾಹಸ ಕ್ರೀಡೆಗಳು, ಉದ್ಯೋಗ ಮಾಹಿತಿ-ವ್ಯಕ್ತಿತ್ವ ವಿಕಸನ ಕುರಿತ ಪ್ರಾಯೋಗಿಕ ತರಗತಿಗಳನ್ನೂ ತಮ್ಮ ಬ್ಲಾಗ್ಗಳಲ್ಲಿ ಅಳವಡಿಸಿರುವುದು ಗಮನಾರ್ಹ.
ಏಕವ್ಯಕ್ತಿ ಪರಿಶ್ರಮ
ತಮ್ಮ ಬ್ಲಾಗ್ಗಳ ಮೂಲಕ ಇಷ್ಟೊಂದು ಮಾಹಿತಿ-ಚಿತ್ರಿಕೆಗಳನ್ನು ಕಲೆಹಾಕಿದ್ದಾರೆ ಈ ಪ್ರಾಧ್ಯಾಪಕರು. ಯಾರ ನೆರವನ್ನೂ ಪಡೆಯದೆ ತಮ್ಮ ಖರ್ಚು, ಶ್ರಮ, ಸಮಯ, ನೈಪುಣ್ಯದಿಂದ 10 ಬ್ಲಾಗ್ಗಳನ್ನು ನಿರಂತರವಾಗಿ ನಡೆಸಿಕೊಂಡು ಬರುತ್ತಿದ್ದಾರೆ.
-ಎ.ನಾರಾಯಣ ಪ್ರಸಾದ್ ಅವರ ಬ್ಲಾಗ್ ಕೊಂಡಿ: napskannada.blogspot.in
-ಮೊಬೈಲ್: 9242260456.
ವಿಡಿಯೋ ಬ್ಲಾಗ್ನ ಪರಿವಿಡಿ
* ವ್ಯಕ್ತಿಯ ಬಾಲ್ಯದ ರೋಚಕ ಘಟನೆಯ ವಿವರ
* ಅವರ ವಿಡಿಯೊ ಸಂದರ್ಶನ
* ಅವರ ನಡೆ-ನುಡಿ-ವಾಚನ/ಗಾಯನ/ನೃತ್ಯ
* ಕಾರ್ಯವೈಖರಿ
* ಸಾಧನೆ-ಪ್ರಶಸ್ತಿಗಳ ದೃಶ್ಯಾವಳಿ
* ಪುಸ್ತಕಗಳು/ಕಾರ್ಯಕ್ರಮಗಳ ಮಾಹಿತಿ
* ಪದ ವಿಶ್ಲೇಷಣೆ: ಇಷ್ಟವಾದ ಒಂದು ಪದದ ಬಗ್ಗೆ ವ್ಯಕ್ತಿಯ ವಿಶ್ಲೇಷಣೆ
* ವಿಳಾಸ-ದೂರವಾಣಿ-ಈಮೈಲ್ ವಿವರ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.