ಬಿಸಿಯೂಟ ನೀಡಲು ಕಾರ್ಯಕರ್ತೆಯರಿಂದ ಹರಸಾಹಸ

ಪಟ್ಟಣದ ಮತ್ತು ಕೆಲವು ಗ್ರಾಮಾಂತರ ಅಂಗನವಾಡಿ ಕೇಂದ್ರಗಳಿಗೆ ಭೇಟಿ ನೀಡಿದಾಗ ಬಾಂಣತಿಯರು ಕನಿಷ್ಠ 45 ದಿನ ಮನೆಯಿಂದ ಹೊರಬರಲಾಗದ ಸ್ಥಿತಿ ಇದೆ. ಈ ಕಾರಣ ಬಾಣಂತಿಯರ ಮನೆಗೆ ಆಹಾರ ಕಳುಹಿಸಬೇಕಾಗಿದೆ. ಇನ್ನೂ ಗರ್ಭಿಣಿಯರಿಗೆ ದಿನ ಹತ್ತಿರವಾಗುತ್ತಿದ್ದಂತೆ ಬರಲಾಗದ ಕಾರಣ ಅವರಿಗೂ ಸಹ ಮನೆಗೆ ಕಳುಹಿಸಬೇಕಾಗಿದೆ ಎಂದು ಕಾರ್ಯಕರ್ತೆಯರು ಹೇಳುತ್ತಾರೆ.

’ಕೆಲ ಮಹಿಳೆಯರು ಹಿಂದಿನ ಪದ್ಧತಿಯಂತೆ ಆಹಾರ ಸಾಮಾಗ್ರಿ ನೀಡಿ ನಾವೇ ತಯಾರು ಮಾಡಿಕೊಳ್ಳುತ್ತೇವೆ ಎಂದು ಮನವಿ ಮಾಡುತ್ತಿದ್ದಾರೆ. ಮಲ್ಲಿಪಾಳ್ಯದಲ್ಲಿ ಫಲಾನುಭವಿಗಳು ಆಸಕ್ತಿ ತೋರದಿದ್ದರೂ ಕಾರ್ಯಕರ್ತೆಯರು ಅಹಾರ ಸಿದ್ಧಪಡಿಸಿ ಬಾಣಂತಿಯರ ಮನೆಗೆ ತಲುಪಿಸಲು ವ್ಯವಸ್ಥೆ ಮಾಡುತ್ತಿರುವುದು ಕಂಡು ಬರುತ್ತಿದೆ. ಇನ್ನೂ ಕೆಲವರು ಬರಲು ಜಾತಿ ಅಡ್ಡವಾಗಿದೆ’ ಎಂಬ ದಲಿತ ನಾರಾಯಣ್ ಅಭಿಪ್ರಾಯಪಟ್ಟರು.

ಬೋರಲಿಂಗನಪಾಳ್ಯ, ಬಿಳಿ ದೇವಾಲಯ ಮತ್ತು ಪಟ್ಟಣದ ಹೌಸಿಂಗ್ ಬೋರ್ಡ್‌ ಕಾಲೊನಿಯಲ್ಲಿ ಶೇ 50 ಭಾಗ ಯಶಸ್ವಿಯಾಗಿದೆ. ಕ್ರಮೇಣ ಸುಧಾರಣೆ ಕಂಡು ಬರುವ ವಿಶ್ವಾಸವನ್ನು ಕಾರ್ಯಕರ್ತೆಯರು ವ್ಯಕ್ತಪಡಿಸಿದ್ದಾರೆ.

’ಮಕ್ಕಳಿಗೆ ನೀಡುವ ಮೊಟ್ಟೆಯ ಹಣವನ್ನು ಮೂರು ತಿಂಗಳಾದರೂ ಕೊಟ್ಟಿಲ್ಲ. ಈಗ ಮಾತೃಪೂರ್ಣ ಯೋಜನೆಯ ತರಕಾರಿ ಮತ್ತು ಮೊಟ್ಟೆಗೂ ಹಣ ಹಾಕಬೇಕಾದ ಪರಿಸ್ಥಿತಿ ಎದುರಾಗಿದೆ’ ಎಂದು ಸಿಐಟಿಯೂ ಅಧ್ಯಕ್ಷ ಗುಲ್ಜಾರ್ ತಿಳಿಸಿದ್ದಾರೆ.