ಬೆಂಗಳೂರು: ಕರ್ನಾಟಕದ ಶ್ರೀಹರಿ ನಟರಾಜ್ ಭೋಪಾಲ್‌ನಲ್ಲಿ ನಡೆಯುತ್ತಿರುವ 71ನೇ ಗ್ಲೆನ್‌ಮಾರ್ಕ್ ಸೀನಿಯರ್ ರಾಷ್ಟ್ರೀಯ ಈಜು ಚಾಂಪಿಯನ್‌ಷಿಪ್‌ನಲ್ಲಿ ಕೂಟ ದಾಖಲೆಯೊಂದಿಗೆ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ.
ಪುರುಷರ 50ಮೀ ಬ್ಯಾಕ್‌ಸ್ಟ್ರೋಕ್ ವಿಭಾಗದಲ್ಲಿ ಶ್ರೀಹರಿ 26.58 ಸೆಕೆಂಡುಗಳಲ್ಲಿ ಮೊದಲಿಗರಾಗಿ ಗುರಿ ಮುಟ್ಟಿದರು. ರಾಂಚಿಯಲ್ಲಿ 2016ರಲ್ಲಿ ಪಿ.ಎಸ್ ಮಧು (26.73) ನಿರ್ಮಿಸಿದ್ದ ದಾಖಲೆಯನ್ನು ಅವರು ಅಳಿಸಿಹಾಕಿದರು.
ಸಲೋನಿ ದಲಾಲ್ (2:45.16) ಮಹಿಳೆಯರ 200ಮೀ ಬ್ರೆಸ್ಟ್‌ಸ್ಟ್ರೋಕ್ ವಿಭಾಗದಲ್ಲಿ ಬೆಳ್ಳಿ, ಸುವಾನ ಸಿ. ಭಾಸ್ಕರ್‌ (31.82ಸೆ) ಮಹಿಳೆಯರ 50ಮೀ ಬ್ಯಾಕ್‌ಸ್ಟ್ರೋಕ್ ವಿಭಾಗದಲ್ಲಿ ಬೆಳ್ಳಿ ಜಯಿಸಿದ್ದಾರೆ.
4X100ಮೀ ಮೆಡ್ಲೆ ವಿಭಾಗದಲ್ಲಿ ಕರ್ನಾಟಕದ ಮಹಿಳೆಯರ ತಂಡ (4:41.70) ಕೂಟ ದಾಖಲೆಯೊಂದಿಗೆ ಚಿನ್ನ ಗೆದ್ದುಕೊಂಡಿದೆ.
ರಾಜ್ಯ ತಂಡದಲ್ಲಿ ಸುವಾನ, ಸಲೋನಿ, ದಾಮಿನಿ ಗೌಡ ಹಾಗೂ ವಿ. ಮಾಳವಿಕಾ ಇದ್ದರು. ಪರುಷರ 4X100ಮೀ ಮೆಡ್ಲೆ ವಿಭಾಗದಲ್ಲಿ ರಾಜ್ಯ ತಂಡ ಕಂಚು ಗೆದ್ದಿದೆ.
