ಗುರುವಾರ, 12–10–1967

ಮಂಗಳವಾರ, ಜೂನ್ 25, 2019
28 °C

ಗುರುವಾರ, 12–10–1967

Published:
Updated:

ಡಾ. ಲೋಹಿಯಾ ನಿಧನ

ನವದೆಹಲಿ, ಅ. 12
– ಹತ್ತು ದಿನಗಳಿಂದ ಜೀವನ–ಮರಣಗಳ ತೂಗುಯ್ಯಾಲೆಯಲ್ಲಿ ತೊನೆದಾಡುತ್ತಿದ್ದ, ಭಾರತದ ಅಗ್ರಗಣ್ಯ ಸೋಷಲಿಸ್ಟ್ ಧುರೀಣ ಡಾ. ರಾಂ ಮನೋಹರ ಲೋಹಿಯಾ ಅವರು ಇಂದು ರಾತ್ರಿ 1 ಗಂಟೆ 5 ನಿಮಿಷಕ್ಕೆ ವೆಲಿಂಗ್ಟನ್ ಆಸ್ಪತ್ರೆಯಲ್ಲಿ ನಿಧನರಾದರು.

ಅವರಿಗೆ 57 ವರ್ಷ ವಯಸ್ಸಾಗಿತ್ತು. ಪ್ರಾಸ್ಟೇಟ್ ಗ್ರಂಥಿಯ ವಿಕಾಸದ ಕಾರಣಕ್ಕಾಗಿ ಕಳೆದ ತಿಂಗಳು 30ರಂದು ಅವರಿಗೆ ಶಸ್ತ್ರಕ್ರಿಯೆ ನಡೆಸಲಾಗಿತ್ತು.

ಈ ಶಸ್ತ್ರಕ್ರಿಯೆಯ ಕಾರಣ ಉಂಟಾದ ಗಾಯದಲ್ಲಿ ನಂಜುಂಟಾಗಿ, ಅದು ರಕ್ತಕ್ಕೆ ವ್ಯಾಪಿಸಿ, ಅದರ ಫಲವಾಗಿ ಕಳೆದ ಹತ್ತು ದಿನಗಳಲ್ಲಿ ಅವರ ದೇಹಸ್ಥಿತಿ ತುಂಬಾ ಕಳವಳಕ್ಕೆಡೆ ಕೊಟ್ಟಿದ್ದಿತು.

ಅವರನ್ನು ಮರಣದ ದವಡೆಯಿಂದ ಪಾರು ಮಾಡಲು ಹಲವಾರು ಜಗದ್ವಿಖ್ಯಾತ ವೈದ್ಯರ ತಂಡ ನಿರಂತರವಾಗಿ ಶ್ರಮಿಸಿತಾದರೂ ಸಾರ್ಥಕವಾಗಲಿಲ್ಲ.

ಡಾ. ಲೋಹಿಯಾ ಅವರ ನಿಧನ ವಾರ್ತೆಯನ್ನು ಕೂಡಲೆ ರಾಷ್ಟ್ರಪತಿ, ಉಪರಾಷ್ಟ್ರಪತಿ ಮತ್ತು ಇತರೆ ನಾಯಕರಿಗೆ ತಿಳಿಸಲಾಯಿತು. ನಾಯಕರ ಹಾಗೂ ವಿವಿಧ ರಾಜಕೀಯ ಪಕ್ಷಗಳ ಕಾರ್ಯಕರ್ತರು ಪ್ರವಾಹದೋಪಾದಿಯಲ್ಲಿ ನರ್ಸಿಂಗ್ ಹೋಂಗೆ ಬರಲಾರಂಭಿಸಿದರು.

*

ಚಳವಳಿಯಿಂದ ಪ್ರಯೋಜನವಿಲ್ಲ

ಪುಣೆ, ಅ. 11– ಮೈಸೂರು–ಮಹಾರಾಷ್ಟ್ರ ಗಡಿ ವಿವಾದದ ಬಗ್ಗೆ ಚಳವಳಿಯ ಮಾರ್ಗ ಅನುಸರಿಸುವುದರಿಂದ ಏನೂ ಪ್ರಯೋಜನ ಕಾಣದೆಂದು ಮಹಾರಾಷ್ಟ್ರ ಮುಖ್ಯಮಂತ್ರಿ ಶ್ರೀ ವಿ.ಪಿ. ಸಿಂಗ್ ಅವರು ಇಂದು ಇಲ್ಲಿ ತಿಳಿಸಿದರು.

‘ನನ್ನ ಮಟ್ಟಿಗೆ ಹೇಳುವುದಾದರೆ ಈ ಸಮಸ್ಯೆಯನ್ನು ಬೌದ್ಧಿಕ ಮಟ್ಟದಲ್ಲಿ ಪರಿಹರಿಸಿಕೊಳ್ಳಲು ಯತ್ನಿಸುವುದು ಮೇಲೆನಿಸುತ್ತದೆ’ ಎಂದು ಅವರು ವರದಿಗಾರರಿಗೆ ತಿಳಿಸಿದರು.

*

ಉರಿ ವಿಭಾಗದಲ್ಲಿ ಶಾಂತ ಪರಿಸ್ಥಿತಿ

ನವದೆಹಲಿ, ಅ. 11–
ಕಾಶ್ಮೀರದ ಉರಿ ಕ್ಷೇತ್ರದಲ್ಲಿ ಶಾಂತ ಪರಿಸ್ಥಿತಿ ಉಂಟಾಗಿದೆಯೆಂದು ಇಂದು ಬೆಳಿಗ್ಗೆ ಇಲ್ಲಿಗೆ ಬಂದ ಇತ್ತೀಚಿನ ವರದಿ ತಿಳಿಸಿದೆ.

ನಿನ್ನೆಯಿಂದ ಗುಂಡಿನ ದಾಳಿ ಇಲ್ಲವೆಂದೂ ಆ ವರದಿ ಹೇಳಿದೆ.

*

ಹೆಂಡ ಇಳಿಸಲು ಆಂಧ್ರದಿಂದ ರಾಜ್ಯಕ್ಕೆ 60,000 ಈಚಲು ಮರ

ಹೈದರಾಬಾದ್, ಅ. 11–
ಈ ತಿಂಗಳು 15 ರಿಂದ ಪಾನನಿರೋಧ ರದ್ದಾಗುವ ಮೈಸೂರು ರಾಜ್ಯದ ಅಗತ್ಯ ಪೂರೈಸಲು 60,000 ಈಚಲು ಮರಗಳನ್ನು ನೀಡಲು ಆಂಧ್ರ ಸರ್ಕಾರ ಮುಂದಾಗಿದೆ.

ಈಗ ಮೈಸೂರು ರಾಜ್ಯದಲ್ಲಿ ಈಚಲು ಮರಗಳ ಅಭಾವ ಉಂಟಾಗಿರುವ ಕಾರಣ ರಾಜ್ಯದ ಅಬ್ಕಾರಿ ಕಮಿಷನರ್ ಅವರು ಇತ್ತೀಚೆಗೆ ಹೈದರಾಬಾದಿಗೆ ಭೇಟಿ ಇತ್ತರಲ್ಲದೆ ಚಿತ್ತೂರು, ಅನಂತಪುರ ಮತ್ತು ಮಹಬೂಬ್‌ನಗರ ಜಿಲ್ಲೆಗಳಲ್ಲಿ ಈಚಲು ಮರಗಳಿಂದ ಹೆಂಡ ಇಳಿಸಲು ಅನುಮತಿ ಬಗ್ಗೆ ಪ್ರಸ್ತಾಪಿಸಿದರು.

ಹೆಂಡ ಇಳಿಸಲು ಈಚಲು ಮರಗಳನ್ನು ಬಿಟ್ಟು ಕೊಡುವ ನಿರ್ಧಾರವನ್ನು ಈಗಾಗಲೇ ಮೈಸೂರು ಸರ್ಕಾರಕ್ಕೆ ಬರೆದ ಪತ್ರದಲ್ಲಿ ತಿಳಿಸಿರುವುದಾಗಿ ಆಂಧ್ರ ಸರ್ಕಾರದ ಅಬ್ಕಾರಿ ಸಚಿವ ಶ್ರೀ ವಿ. ಸತ್ಯನಾರಾಯಣರಾವ್ ಅವರು ಇಂದು ಇಲ್ಲಿ ಪಿ.ಟಿ.ಐ.ಗೆ ತಿಳಿಸಿದರು.

ವಿರಾಟ್ ಕೊಹ್ಲಿ ನಾಯಕತ್ವದ ಭಾರತ ಕ್ರಿಕೆಟ್‌ ತಂಡ ಕಪ್ ಗೆಲ್ಲುತ್ತಾ? ಐಸಿಸಿ ವಿಶ್ವಕಪ್ 2019 ಯಾರು ಗೆಲ್ಲುತ್ತಾರೆ? ಕೋಟ್ಯಂತರ ಕ್ರಿಕೆಟ್ ಪ್ರೇಮಿಗಳ ನಿರೀಕ್ಷೆಗೆ ಉತ್ತರ ಸಿಗುವ ಕಾಲ ಬಂದಿದೆ. ವಿಶ್ವಕಪ್ ಕ್ರಿಕೆಟ್‌ನ ಸ್ಕೋರ್ ಅಪ್‌ಡೇಟ್ಸ್‌, ಮ್ಯಾಚ್‌ಗಳ ವರದಿ, ವಿಶ್ವಕಪ್ ಕ್ರಿಕೆಟ್ ಹೆಜ್ಜೆ ಗುರುತು, ಆಟಗಾರರ ಸಂದರ್ಶನ, ವೇಳಾಪಟ್ಟಿ ತಿಳಿದುಕೊಳ್ಳಲು www.prajavani.net ಜಾಲತಾಣಕ್ಕೆ ಭೇಟಿ ನೀಡಿ. ಕ್ರೀಡಾಪ್ರೇಮಿಗಳ ನೆಚ್ಚಿನ ಆಯ್ಕೆ ‘ಪ್ರಜಾವಾಣಿ’. ಇದು ಅತ್ಯಂತ ವಿಶ್ವಾಸಾರ್ಹ ಸುದ್ದಿ ಮಾಧ್ಯಮ.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry