ಟ್ವಿಟರ್‌, ಫೇಸ್‌ಬುಕ್‌ ಬಳಸಿ ‘ಇ–ದೂರು’ ನೀಡಿ

ಸಚಿವರಿಗೆ ಬರುವ ‘ಇ–ದೂರು’ಗಳಿಗೆ ಕ್ಷಿಪ್ರವಾಗಿ ಸ್ಪಂದಿಸುವ ಸಲುವಾಗಿ ಬೆಂಗಳೂರು ಮಹಾನಗರ ಪ್ರದೇಶಾಭಿವೃದ್ಧಿ ಪ್ರಾಧಿಕಾರದ (ಬಿಎಂಆರ್‌ಡಿಎ) ಕೇಂದ್ರ ಕಚೇರಿಯ ಕಟ್ಟಡದಲ್ಲಿ ಪ್ರತ್ಯೇಕ ಆನ್‌ಲೈನ್‌ ಸಾಮಾಜಿಕ ಮಾಧ್ಯಮ ಕೇಂದ್ರವನ್ನು ಸ್ಥಾಪಿಸಲಾಗಿದೆ. ಸಚಿವ ಕೆ.ಜೆ.ಜಾರ್ಜ್‌ ಅವರು ಸೋಮವಾರ ಈ ಕೇಂದ್ರವನ್ನು ಉದ್ಘಾಟಿಸಿದರು.

‘ಬಿಬಿಎಂಪಿ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ), ಜಲಮಂಡಳಿ, ಬೆಂಗಳೂರು ಮೆಟ್ರೊ ರೈಲು ನಿಗಮಗಳಿಗೆ (ಬಿಎಂಆರ್‌ಸಿಎಲ್) ಸಂಬಂಧಿಸಿದ ಸಮಸ್ಯೆಗಳನ್ನು ಹಾಗೂ ದೂರುಗಳನ್ನು ಸಾರ್ವಜನಿಕರು ಫೇಸ್‌ಬುಕ್‌ ಖಾತೆ ( https://www.facebook.com/blrdevminister) ಅಥವಾ ಟ್ವಿಟರ್‌ (https://twitter.com/blrdevminister) ಖಾತೆ ಮೂಲಕವೂ ಸಲ್ಲಿಸಬಹುದು’ ಎಂದು ಸಚಿವರು ತಿಳಿಸಿದರು.

‘ಇ ದೂರುಗಳನ್ನು ದಾಖಲಿಸಿಕೊಳ್ಳುವ ಕೇಂದ್ರದ ಸಿಬ್ಬಂದಿ ತಕ್ಷಣ ಸಂಬಂಧಪಟ್ಟ ಇಲಾಖಾ ಅಧಿಕಾರಿಗಳ ಗಮನಕ್ಕೆ ತರುತ್ತಾರೆ. ಇ–ದೂರುಗಳನ್ನು ನಿರ್ವಹಿಸುವುದಕ್ಕಾಗಿಯೇ ಆಯಾ ಸಂಸ್ಥೆಯಲ್ಲಿ ನೋಡಲ್‌ ಅಧಿಕಾರಿಗಳನ್ನು ನೇಮಿಸಲಾಗಿದೆ. ಅವರು ಸ್ಥಳೀಯ ಮಟ್ಟದ ಅಧಿಕಾರಿಗಳಿಗೆ ಈ ಬಗ್ಗೆ ಮಾಹಿತಿ ನೀಡುತ್ತಾರೆ. ದೂರು ಬಂದ 48 ಗಂಟೆಗಳ ಒಳಗೆ ಸಮಸ್ಯೆ ಬಗೆಹರಿಸಿ, ಈ ಬಗ್ಗೆ ದೂರು ನೀಡಿದವರಿಗೆ ತಿಳಿಸುತ್ತೇವೆ. ಸಮಸ್ಯೆ ಬಗೆಹರಿಸಲು ಹೆಚ್ಚು ಕಾಲಾವಕಾಶ ಬೇಕಾದಲ್ಲಿ ದೂರು ನೀಡಿದವರ ಗಮನಕ್ಕೆ ತರುತ್ತೇವೆ’ ಎಂದು ಸಚಿವರು ವಿವರಿಸಿದರು.

‘ ಒಂದು ವರ್ಷದಿಂದ ಆನ್‌ಲೈನ್ ದೂರುಗಳನ್ನು ಸ್ವೀಕರಿಸಲಾಗುತ್ತಿದೆ. ಆದರೆ, ಈ ವ್ಯವಸ್ಥೆಯ ನಿರ್ವಹಣೆಗಾಗಿ ಈಗ ಪ್ರತ್ಯೇಕ ಕೇಂದ್ರವನ್ನು ಆರಂಭಿಸಲಾಗಿದೆ. ಇದುವರೆಗೆ 3,500ಕ್ಕೂ ಹೆಚ್ಚು ದೂರುಗಳನ್ನು ಸ್ವೀಕರಿಸಿದ್ದೇವೆ. ಈ ಪೈಕಿ 2,500 ದೂರು ಬಿಬಿಎಂಪಿಗೆ ಸಂಬಂಧಿಸಿದವು.ಇವುಗಳಲ್ಲಿ ಶೇ 60ರಷ್ಟು ಸಮಸ್ಯೆಗಳನ್ನು ಇತ್ಯರ್ಥಪಡಿಸಲಾಗಿದೆ’ ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.

‘ಎಲ್ಲಿಯಾದರೂ ಕಸ ವಿಲೇವಾರಿ ಆಗದ ಬಗ್ಗೆ ದೂರು ಬಂದರೆ, ಅದೇ ದಿನ ಅದನ್ನು ತೆರವು ಮಾಡಬಹುದು. ಮೋರಿ ನಿರ್ಮಿಸುವ ಅಗತ್ಯ ಇದೆ ಎಂಬ ಬಗ್ಗೆ ಬೇಡಿಕೆ ಬಂದರೆ, ಅದನ್ನು ಈಡೇರಿಸಲು ಹೆಚ್ಚು ಸಮಯ ಬೇಕು. ಬಿಬಿಎಂಪಿಗೆ ಒಂದು ವರ್ಷದಲ್ಲಿ 1.68 ಲಕ್ಷ ದೂರುಗಳು ಬಂದಿದ್ದವು. ಈ ಪೈಕಿ ಶೇ 96ರಷ್ಟನ್ನು ವಿಲೇವಾರಿ ಮಾಡಿದ್ದೇವೆ. ಅಹವಾಲುಗಳ ಪರಿಶೀಲನೆ ನಡೆಸಲು ಉಪವಿಭಾಗ, ವಿಭಾಗ ಹಾಗೂ ವಲಯ ಮಟ್ಟದಲ್ಲಿ ಪ್ರತಿ ತಿಂಗಳು ಸಭೆಗಳನ್ನು ನಡೆಸಲಾಗುತ್ತಿದೆ’ ಎಂದು ಬಿಬಿಎಂಪಿ ಆಯುಕ್ತ ಎನ್‌.ಮಂಜುನಾಥ ಪ್ರಸಾದ್‌ ತಿಳಿಸಿದರು.

***
‘ನೇರವಾಗಿಯೂ ದೂರು ನೀಡಬಹುದು’

ಸಾರ್ವಜನಿಕರು ಬಿಬಿಎಂಪಿ, ಬಿಡಿಎ, ಜಲಮಂಡಳಿ ಅಥವಾ ಬಿಎಂಆರ್‌ಸಿಎಲ್‌ಗೆ ಟ್ವಿಟರ್‌ ಅಥವಾ ಫೇಸ್‌ಬುಕ್‌ ಮೂಲಕ ನೇರವಾಗಿಯೂ ನೇರವಾಗಿಯೂ ದೂರು ನೀಡಬಹುದು.

ಬಿಬಿಎಂಪಿ: https://www.facebook.com/bbmp.comm) ಅಥವಾ   (https://twitter.com/BBMPCOMM1)

ಬಿಡಿಎ: https://www.facebook.com/pq/BDABLR/) ಅಥವಾ  (https://twitter.com/bdablr)

ಜಲಮಂಡಳಿ: https://www.facebook.com/bangalorewatersupply) ಅಥವಾ   (https://twitter.com/chairmanbwssb)

ನಮ್ಮಮೆಟ್ರೊ: https://www.facebook.com/cpronammametro) ಅಥವಾ ಟ್ವಿಟರ್‌ (https://twitter.com/BMRCL