ಕೆಸರು ಗದ್ದೆಯಾದ ಮೈಬೂಬ ನಗರ ರಸ್ತೆ

‘ಮೈಬೂಬ ನಗರದಲ್ಲಿ ಚರಂಡಿ ವ್ಯವಸ್ಥೆ ಸರಿಯಿಲ್ಲ. ಮಳೆ ನೀರು, ಮನೆಗಳ ಶೌಚಾಲಯಗಳ ನೀರು, ನಿತ್ಯದ ಬಳಕೆ ನೀರು ಎಲ್ಲವೂ ರಸ್ತೆ ಆವರಿಸುತ್ತದೆ. ಇದರಿಂದ ರಸ್ತೆಗೂ ಚರಂಡಿಗೂ ವ್ಯತ್ಯಾಸವೇ ತಿಳಿಯದಂಥ ಪರಿಸ್ಥಿತಿ ಇದೆ’ ಎಂದು ಸ್ಥಳೀಯರು ಅಳಲು ತೋಡಿಕೊಳ್ಳುತ್ತಾರೆ.

ಸೊಳ್ಳೆ ಕಾಟ: ‘ನೀರು ನಿಲ್ಲುವುದರಿಂದ ಸೊಳ್ಳೆಗಳ ಕಾಟ ಹೆಚ್ಚಿದೆ. ಕೆಸರು ತುಂಬಿರುವ ಚರಂಡಿಗಳಿಂದ ದುರ್ನಾತ ಹರಡುತ್ತಿದ್ದು, ಮನೆಯಲ್ಲಿ ಕುಳಿತುಕೊಳ್ಳಲು ಆಗದಂತ ಸ್ಥಿತಿಯಿದೆ’ ಎನ್ನುತ್ತಾರೆ ಸ್ಥಳೀಯ ನಿವಾಸಿ ಮಾಲತೇಶ ಅಣ್ಣೀಗೇರಿ.

‘ಶಾಲೆ, ಕಾಲೇಜಿಗೆ ಹೋಗುವ ಮಕ್ಕಳಿಗೆ, ವಾಹನ ಸವಾರರಿಗೆ ತುಂಬಾ ಕಿರಿಕಿರಿಯಾಗಿದೆ. ಈ ಸಮಸ್ಯೆ ಪರಿಹಾರಿಸಬೇಕು ಎಂದು ಆಗ್ರಹಿಸಿ ವಾರ್ಡ್‌ನ ಸದಸ್ಯೆ ವಲೀಬಿ ದುಕಾನದಾರ ಮತ್ತು ಅಧಿಕಾರಿಗಳಿಗೆ ಮೌಖಿಕವಾಗಿ, ಲಿಖಿತವಾಗಿ ಅನೇಕ ಬಾರಿ ಮನವಿ ಮಾಡಲಾಗಿದೆ. ಆದರೂ ಈ ವರೆಗೆ ಸಮಸ್ಯೆಗಳು ಪರಿಹಾರವಾಗಿಲ್ಲ’ ಎಂದು ಅವರು ದೂರಿದರು.

‘ಮೈಬೂಬ ನಗರದಲ್ಲಿನ ಸರ್ಕಾರಿ ಉರ್ದು ಪ್ರೌಢ ಶಾಲೆ ಹಿಂಬದಿ ರಸ್ತೆ, ಕಾರಡಗಿ ಪ್ಲಾಟ್‌ನ ರಸ್ತೆ ತೀರ ಹದಗೆಟ್ಟಿದೆ. ಈ ಕುರಿತು ಹತ್ತಾರು ಬಾರಿ ಪುರಸಭೆಯ ಅಧಿಕಾರಿಗಳ ಗಮನಕ್ಕೆ ತರಲಾಗಿದೆ. ಆದರೂ ಸಹ ಅಭಿವೃದ್ಧಿ ಕುರಿತು ಈ ವರೆಗೆ ಗಮನ ಹರಿಲ್ಲ. ಅದರಿಂದ ವಾರ್ಡ್‌ ಜನರ ಪ್ರಶ್ನೆ ಉತ್ತರ ನೀಡದ ಪರಿಸ್ಥಿತಿ ಎದುರಾಗಿದೆ’ ಎಂದು ವಾರ್ಡ್‌ ಸದಸ್ಯೆ ವಲೀಬಿ ದುಕಾನದಾರ ಅಸಹಾಯಕತೆ ವ್ಯಕ್ತಪಡಿಸುತ್ತಾರೆ.