ಚುನಾವಣಾ ಪ್ರಚಾರಕ್ಕೆ ಆಲಂಕಾರಿಕ ವಾಹನ!

ಬಿಜೆಪಿ ಕಚೇರಿಯೆದುರು ಗುರುವಾರ ನಿಂತಿದ್ದ ವಾಹನವೊಂದು ಎಲ್ಲರ ಗಮನ ಸೆಳೆಯಿತು. ಇಸುಜು ವಾಹನಕ್ಕೆ ಬೆಂಗಳೂರಿನ ಸಂಸ್ಥೆಯೊಂದು ಅಲಂಕಾರ ಮಾಡಿ ಕೊಡುತ್ತಿದ್ದು, ಪ್ರಚಾರ ವಾಹನ ಬಯಸುವ ಪಕ್ಷಗಳ ಪದಾಧಿಕಾರಿಗಳನ್ನು ಭೇಟಿಯಾಗುತ್ತಿದ್ದಾರೆ.

ಈ ವಾಹನಗಳಲ್ಲಿ ಅಭ್ಯರ್ಥಿಗಳು ಬಯಸುವ ಬಣ್ಣ, ರಾಜಕಾರಣಿಗಳ ಚಿತ್ರ ಮತ್ತು ಘೋಷಣೆಗಳನ್ನು ಹಾಕಿಕೊಡಲಾಗುತ್ತದೆ. ಮಾದರಿ ವಾಹನ ದಲ್ಲಿ ಒಂದು ಕಿ.ಮೀ ತನಕ  ಧ್ವನಿ ಕೇಳಿಸುವ 250 ವ್ಯಾಟ್‌ನ ಆರು ಸ್ಪೀಕರ್‌ಗಳನ್ನು ಮತ್ತು ದೂರದವರೆಗೆ ಬೆಳಕು ಹರಿಸಬಲ್ಲ ಎಂಟು ಎಲ್‌ಇಡಿ ಲೈಟ್ ಅಳವಡಿಸಲಾಗಿದೆ. ವಿದ್ಯುತ್ ‌ಪೂರೈಸಲು ಒಂದು ಕಿಲೋವ್ಯಾಟ್ ಸಾಮರ್ಥ್ಯದ ಜನರೇಟರ್‌ ಈ ವಾಹನದಲ್ಲಿದೆ.

ಈ ವಾಹನದ ಮಾರುಕಟ್ಟೆ ದರ ₹ 9.10 ಲಕ್ಷ. ಚುನಾವಣಾ ಪ್ರಚಾರಕ್ಕೆ ಅಗತ್ಯವಾದ ವ್ಯವಸ್ಥೆ ಅಳವಡಿಸಲು ತಗಲುವ ವೆಚ್ಚ ಸೇರಿ ಒಟ್ಟು ₹ 13.2 ಲಕ್ಷ ನೀಡಿದರೆ ವಾಹನದ ನೋಂದಣಿಯನ್ನೂ ಮಾಡಿಕೊಡಲಾಗುವುದು ಎಂದು ಈ ಸಂಸ್ಥೆಯ ಪ್ರತಿನಿಧಿ ತಿಳಿಸಿದರು.

ಕೆಲವು ಶಾಸಕರು ಈಗಾಗಲೇ ಮುಂಗಡ ಹಣ ಪಾವತಿಸಿ ಕಾಯ್ದಿರಿಸಿದ್ದಾರೆ. 20 ಜನರ ಜೊತೆ ಮಾತುಕತೆ ನಡೆಯುತ್ತಿದೆ ಎಂದೂ ಅವರು ಹೇಳಿದರು.