ನವದೆಹಲಿ: ಸ್ಟೇಟ್‌ ಬ್ಯಾಂಕ್ ಆಫ್‌ ಇಂಡಿಯಾ, 2016–17ರಲ್ಲಿ ವಸೂಲಾಗದ ₹ 20,339 ಕೋಟಿ ಸಾಲದ ಮೊತ್ತವನ್ನು ವಜಾ ಮಾಡಿದೆ.
ಈ ಅವಧಿಯಲ್ಲಿ ಸರ್ಕಾರಿ ಸ್ವಾಮ್ಯದ ಬ್ಯಾಂಕ್‌ಗಳು ಒಟ್ಟಾರೆ ₹ 81,683 ಕೋಟಿಗಳಷ್ಟು ಮೊತ್ತದ ಸಾಲವನ್ನು ವಜಾ ಮಾಡಿವೆ. ಇದರಲ್ಲಿ ಎಸ್‌ಬಿಐನ ಪಾಲು ಗರಿಷ್ಠ ಮಟ್ಟದಲ್ಲಿ ಇದೆ. ಎಸ್‌ಬಿಐ ವಜಾ ಮಾಡಿದ ಸಾಲದ ಮೊತ್ತವು ಐದು ಸಹವರ್ತಿ ಬ್ಯಾಂಕ್‌ಗಳ ವಿಲೀನಕ್ಕೂ ಮುಂಚಿನ ಅವಧಿಗೆ ಸೇರಿದೆ.
ಸರ್ಕಾರಿ ಸ್ವಾಮ್ಯದ ಬ್ಯಾಂಕ್‌ಗಳು 2012–13ರಲ್ಲಿ ಒಟ್ಟಾರೆ ₹ 27,231 ಕೋಟಿ ಮೊತ್ತದ ಸಾಲ ವಜಾ ಮಾಡಿದ್ದವು. ಐದು ವರ್ಷಗಳಲ್ಲಿ ಈ ಮೊತ್ತ ಮೂರು ಪಟ್ಟು ಹೆಚ್ಚಾಗಿದೆ.
ಎಸ್‌ಬಿಐ ನಂತರದ ಸ್ಥಾನದಲ್ಲಿ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್(₹ 9,205 ಕೋಟಿ), ಬ್ಯಾಂಕ್ ಆಫ್‌ ಇಂಡಿಯಾ (₹ 7,346 ಕೋಟಿ), ಕೆನರಾ ಬ್ಯಾಂಕ್ (₹ 5,545 ಕೋಟಿ) ಮತ್ತು ಬ್ಯಾಂಕ್ ಆಫ್‌ ಬರೋಡಾ (₹ 4,348 ಕೋಟಿ) ಇವೆ.
ಪ್ರಸಕ್ತ ಹಣಕಾಸು ವರ್ಷದ ಮೊದಲ 6 ತಿಂಗಳಲ್ಲಿ ಬ್ಯಾಂಕ್‌ಗಳು ₹ 53,625 ಕೋಟಿ ಮೊತ್ತದ ಸಾಲ ವಜಾ ಮಾಡಿವೆ.
ಸರ್ಕಾರಿ ಸ್ವಾಮ್ಯದ 21 ಬ್ಯಾಂಕ್‌ಗಳ ಪೈಕಿ 9 ಬ್ಯಾಂಕ್‌ಗಳ ಒಟ್ಟು ಎನ್‌ಪಿಎ 2017ರ ಸೆಪ್ಟೆಂಬರ್‌ ತಿಂಗಳಾಂತ್ಯಕ್ಕೆ ಬ್ಯಾಂಕ್‌ಗಳು ಅದುವರೆಗೂ ಮಂಜೂರು ಮಾಡಿರುವ ಸಾಲದ ಒಟ್ಟು ಮೊತ್ತದ ಶೇ 15ರಷ್ಟು ಇದೆ.
