ಸಂಯಮ ಕೀರ್ತಿಸ್ತಂಭ

ಧ್ವಜಸ್ತಂಭ, ದೀಪಸ್ತಂಭ, ಬಾಣಸ್ತಂಭ, ಅಶೋಕಸ್ತಂಭ, ಜಯ/ವಿಜಯಸ್ತಂಭ, ಗರುಡಕಂಬ, ಬ್ರಹ್ಮಕಂಬ, ಮಾನಸ್ತಂಭ, ಕೀರ್ತಿಸ್ತಂಭ ಹೀಗೆ ಹಲವು ಹೆಸರಿನಲ್ಲಿ, ಹಲವು ರೂಪದಲ್ಲಿ ಭಾರತದ ತುಂಬೆಲ್ಲ ಗಮನಾರ್ಹ ಪ್ರಮಾಣದಲ್ಲಿ ಬಟ್ಟಬಯಲಿನಲ್ಲಿ ಸ್ತಂಭಗಳ ನಿರ್ಮಾಣವಾಗಿವೆ. ಇವುಗಳೆಲ್ಲದರ ಹಿಂದೆ ಐತಿಹಾಸಿಕ ಹಾಗೂ ಸಾಂಸ್ಕೃತಿಕ ಮಹತ್ವವಿದೆ. ಆದ್ದರಿಂದ ಇವುಗಳು ಅಧ್ಯಯನ ಯೋಗ್ಯವಾಗಿವೆ. ಒಂದು ಊರಂತು ದೊಡ್ಡ ಕಂಬದ ಕಾರಣದಿಂದಲೇ ‘‘ಕಂಬದಹಳ್ಳಿ’’ ಎಂಬ ಹೆಸರನ್ನು ಪಡೆದಿದೆ. ಸಲ್ಲೇಖನದಿಂದ ಬಂಕಾಪುರದಲ್ಲಿ ಮುಡುಪಿದ (ಧಾರ್ಮಿಕ ಭಾವನೆಯಲ್ಲಿ ಪ್ರಾಣ ತ್ಯಜಿಸಿದ) ಗಂಗರಾಜ ಮಾರಸಿಂಹನ ವಿಷಯ; ಶಿವಗಂಗೆಯ ಜಿನಾಲಯದಲ್ಲಿ ಮುಡಿಪಿದ ರಾಣಿ ಶಾಂತಲೆಯ ಸಾವಿನ ವಿಷಯ, ಶ್ರವಣಬೆಳಗೊಳದ ಶಾಸನಗಳಲ್ಲಿ ದಾಖಲಾಗಿವೆ.
ಹೀಗೆ ಅನೇಕ ದಾಖಲೆಗಳಿಗೆ ಅಲ್ಲಿನ ಶಾಸನಗಳು ಮಾಧ್ಯಮವಾಗಿವೆ. ಈ ಸಾಲಿನಲ್ಲಿ 2018 ಜನವರಿ 27 ರಂದು ಲೋಕಾರ್ಪಣೆಗೊಂಡ, 25 ಅಡಿ ಎತ್ತರದ, ಆಚಾರ್ಯ ವಿದ್ಯಾಸಾಗರರ ಸಂಯಮ ಸ್ವರ್ಣ ಜಯಂತಿಯ ಅಂಗವಾಗಿ ನಿರ್ಮಾಣಗೊಂಡ ಕೀತಸ್ತಂಭವೂ ಸೇರುವುದು. ಭಾರತೀಯ ಜೈನ ಸಂಸ್ಕೃತಿಗೆ ಕರ್ನಾಟಕದ ಕೊಡುಗೆ ಅಪಾರ. ವಿಶೇಷವಾಗಿ ಯುಗಪ್ರವರ್ತಕ ಜೈನಾಚಾರ್ಯರನ್ನು ನೀಡಿದೆ. ಅಂಥವರಲ್ಲಿ ಇಂದು ಧರ್ಮ ಪ್ರಭಾವಕರಾಗಿರುವ ಆಚಾರ್ಯ ವಿದ್ಯಾಸಾಗರರು ಹುಟ್ಟಿ ಬೆಳೆದದ್ದು ಕರ್ನಾಟಕದ ಸದಲಗ ಎಂಬ ಊರಿನಲ್ಲಿ. ಅವರು ಬಾಲಕರಾಗಿದ್ದಾಗಲೇ ಜೀವನ ಪರ್ಯಂತ ಬ್ರಹ್ಮಚರ್ಯ ವ್ರತವನ್ನು ಸ್ವೀಕರಿಸಿದರು. ಅನಂತರ ದಿಗಂಬರ ಮುನಿಗಳಾದರು. ಕೆಲವು ವರ್ಷಗಳಲ್ಲೇ ಆಚಾರ್ಯರಾದರು. ತನಗೆ ಆಚಾರ್ಯ ಪದವಿಯನ್ನು ನೀಡಿದ ಗುರುವೇ, ತಮ್ಮ ಆಚಾರ್ಯ ಪದವಿಯನ್ನು ತ್ಯಜಿಸಿ, ಇವರನ್ನು ಆಚಾರ್ಯರನ್ನಾಗಿ ಸ್ವೀಕರಿಸಿ, ಇವರ ಮಾರ್ಗದರ್ಶನದಲ್ಲಿ ಸಲ್ಲೇಖನ ಸ್ವೀಕರಿಸಿ ಮುಡುಪಿದರು.