6

ಪುರಪ್ರವೇಶಕ್ಕೆ ಸಾಕ್ಷಿಯಾದ ಭಕ್ತರು

Published:
Updated:

ದೇವರ ಹಿಪ್ಪರಗಿ: ಇಲ್ಲಿನ ಐತಿಹಾಸಿಕ ಹಿನ್ನೆಲೆಯ ರಾವುತರಾಯನ ರೂಪಾಂಲಕಾರ ಪೂರ್ಣಗೊಂಡಿದ್ದು, ಬಂಡಿಯಾತ್ರೆಯ ಮೂಲಕ ಅಸಂಖ್ಯಾತ ಭಕ್ತರ ಉದ್ಘೋಷಗಳೊಂದಿಗೆ ಪುರಪ್ರವೇಶವಾಯಿತು.

ಪಟ್ಟಣ ಸೇರಿದಂತೆ ರಾಜ್ಯದ ಅಸಂಖ್ಯಾತ ಭಕ್ತರು ರಾವುತರಾಯನ ಆರಾಧನೆ ಮಾಡುತ್ತಾರೆ. ಆರು ತಿಂಗಳುಗಳ ಹಿಂದೆ ಮೂರ್ತಿ ರೂಪದ ರಾವುತರಾಯನನ್ನು ಬಣ್ಣಕ್ಕಾಗಿ ಪಟ್ಟಣದ ಹೊರವಲಯದ ಮಲ್ಲಯ್ಯನ ದೇವಸ್ಥಾನದಲ್ಲಿ ಪ್ರತಿಷ್ಠಾಪಿಸಲಾಗಿತ್ತು. ಸಾಕಷ್ಟು ಕಟ್ಟುನಿಟ್ಟಿನ ಪೂಜಾ ವಿಧಿ ವಿಧಾನಗಳಿಂದ ಜರುಗುವ ಈ ಕಾರ್ಯ ಕೊನೆಗೊಂಡಿದ್ದು, ಇದರ ಅಂಗವಾಗಿ ಶನಿವಾರ ಹೊಮ, ಹವನಾದಿಯಾಗಿ ಎಲ್ಲ ಶಾಸ್ತ್ರೋಕ್ತ ಕಾರ್ಯಕ್ರಮ ಜರುಗಿದವು.

ಭಾನುವಾರ ಬೆಳಿಗ್ಗೆ ತನ್ನ ಹೊಸ ರೂಪ, ವಸ್ತ್ರ, ಸರ್ವಾಭರಣ ಭೂಷಿತ ನಾಗಿ ಆಶ್ವಾರೂಢನಾದ ರಾವುತರಾಯ ಬಂಡಿಯಾತ್ರೆಯ ಮೂಲಕ ಸ್ವಸ್ಥಾನ ತಲುಪಿದ. ಹೊಸ ರೂಪಿನಿಂದ ಕಂಗೊಳಿಸಿದ ಆರಾಧ್ಯ ಮೂರ್ತಿಯನ್ನು ಕಂಡು ಪುಳಕಿತಗೊಂಡ ಭಕ್ತರು ‘ಏಳಕೋಟಿ, ಏಳಕೋಟಿ, ಏಳಕೋಟಿಗೆ’ ಎಂಬ ಘೋಷವಾಕ್ಯ ಮೊಳಗಿಸಿದರು. ನೈವೇದ್ಯ ಅರ್ಪಿಸಿ, ತೆಂಗಿನ ಕಾಯಿ ಒಡೆದು ಭಕ್ತಿ ಸಮರ್ಪಿಸಿದರು.

ಈ ಮೊದಲು ರಾವುತರಾಯನಿಗೆ ಬಣ್ಣದ ರೂಪಾಲಂಕಾರ 25 ವರ್ಷಗಳಿಗೊಮ್ಮೆ ಜರುಗುತ್ತಿತ್ತು. ಆದರೆ ಈಗ ಪ್ರತಿವರ್ಷ ಜರುಗುವ ಜಾತ್ರೆಯಲ್ಲಿ ಎಸೆಯುವ ಹಣ್ಣು, ಉತ್ತತ್ತಿಗಳಿಂದ ರಾವುತರಾಯ ರೂಪ ಮಸುಕಾಗಿದ್ದರಿಂದ ಅವಶ್ಯವೆನಿಸಿದ ಸಮಯದಲ್ಲಿ ಅಲಂಕಾರ ಮಾಡಲಾಗುತ್ತಿದೆ. ಈ ಕಾರ್ಯವನ್ನು ವಿಶೇಷ ಪರಿಣಿತರು ಪೂಜಾ ವಿಧಿ ವಿಧಾನಗಳಿಂದ ನೆರವೇರಿಸಬೇಕಾಗುತ್ತದೆ.

ಈ ಮೊದಲು 2005–06 ರಲ್ಲಿ ಹಾಗೂ 2001–02 ರಲ್ಲಿ ಅಲಂಕಾರ ಕಾರ್ಯ ನಡೆದಿತ್ತು. ಬಂಡಿಯಾತ್ರೆಯಲ್ಲಿ ಚಂದ್ರಾಮ ಯಳಕೋಟಿ, ಮಲ್ಲನಗೌಡ ಪಾಟೀಲ, ಶ್ರೀಶೈಲ ದೇವರಮನಿ, ಬಸನಗೌಡ ಪಾಟೀಲ, ಪ್ರಮೋದ ನಾಡಗೌಡ, ಶಂಕರ ಗಿಡಗಾರ, ಗಂಗಾರಾಮ ಮೆಟಗಾರ, ದೇವಪ್ಪ ವಗ್ಗರ, ಮಾಳಪ್ಪ ವಗ್ಗರ, ಕಾಸಪ್ಪ ಮೆಟಗಾರ ಸೇರಿದಂತೆ ಸಾಂಪ್ರದಾಯಿಕ ಕಾರ್ಯ ನಿರ್ವಹಿಸುವ ಎಲ್ಲ ಸಮುದಾಯದ ಜನ ಇದ್ದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry