ಬಿಜೆಪಿ ಸರ್ಕಾರದಲ್ಲಿ ದಲಿತರು, ಒಬಿಸಿಗಳಿಗೆ ಸೂಕ್ತ ಗೌರವ: ನರೇಂದ್ರ ಮೋದಿ

ಮಧ್ಯಪ್ರದೇಶದ ಸಾಗರ್ ಜಿಲ್ಲೆಯ ಢಾನಾದಲ್ಲಿ ನಡೆದ ಸಾರ್ವಜನಿಕ ರ‍್ಯಾಲಿಯಲ್ಲಿ ಮಾತನಾಡಿದ ಅವರು, ‘ಈ ಹಿಂದಿನ ಸರ್ಕಾರಗಳು ಬಡವರಿಗೆ ಕನಿಷ್ಠ ನೀರಿನ ಸೌಕರ್ಯವನ್ನೂ ನೀಡಲು ವಿಫಲವಾಗಿದ್ದವು. ಆದರೆ, ನಮ್ಮ ಸರ್ಕಾರದಲ್ಲಿ ದಲಿತರ ಕೇರಿಗಳು, ಹಿಂದುಳಿದ ಮತ್ತು ಬುಡಕಟ್ಟು ಪ್ರದೇಶಗಳಲ್ಲಿ ಜಲಜೀವನ್ ಮಿಷನ್ ಅಡಿಯಲ್ಲಿ ಕುಡಿಯುವ ನಲ್ಲಿ ನೀರು ಸೌಕರ್ಯ ಕಲ್ಪಿಸಲಾಗಿದೆ’ ಎಂದರು. 

ಢಾನಾದಲ್ಲಿ ಮೋದಿ ಅವರು ವಿವಿಧ ರಸ್ತೆ ಅಭಿವೃದ್ಧಿ ಯೋಜನೆಗಳಿಗೆ ಶಂಕುಸ್ಥಾಪನೆಯ ಜತೆಗೆ  ಬಿನಾ-ಕೋಟಾ ರೈಲು ಮಾರ್ಗ ಯೋಜನೆಯನ್ನು ರಾಷ್ಟ್ರಕ್ಕೆ ಸಮರ್ಪಿಸಿದರು.‌‌

ಸಾರ್ವಜನಿಕ ರ‍್ಯಾಲಿಗೂ ಮುನ್ನ ಪ್ರಧಾನಿ ಅವರು, ಬದ್‌ತುಮಾ ಗ್ರಾಮದಲ್ಲಿ ₹100 ಕೋಟಿ ವೆಚ್ಚದಲ್ಲಿ ಸಂತ ಹಾಗೂ ಸಾಮಾಜಿಕ ಸುಧಾರಕ ರವಿದಾಸ್ ಅವರ ನೆನಪಿಗಾಗಿ ನಿರ್ಮಿಸುತ್ತಿರುವ ದೇವಾಲಯಕ್ಕೆ ಭೂಮಿಪೂಜೆ ನೆರವೇರಿಸಿದರು.

ಅಸ್ಥಿರತೆ, ಅತಿರೇಕ ಮತ್ತು ದೌರ್ಜನ್ಯಗಳಿಂದ ಕೂಡಿದ್ದ ಮೊಘಲರ ಕಾಲಘಟ್ಟದಲ್ಲಿ ಜನಿಸಿದ್ದ ಸಂತ ರವಿದಾಸ್ ಅವರು ಸಾಮಾಜಿಕ ಅನಿಷ್ಟಗಳ ವಿರುದ್ಧ ಜಾಗೃತಿ ಮೂಡಿಸಿದರು ಎಂದು ಶ್ಲಾಘಿಸಿದರು.