ಜೈಪುರ: ಪ್ರತಿಷ್ಠಿತ ಜೈಪುರ ಸಾಹಿತ್ಯ ಉತ್ಸವದ (ಜೆಎಲ್‌ಎಫ್‌) 17ನೇ ಆವೃತಿಯು ಫೆಬ್ರುವರಿ 1ರಿಂದ ಆರಂಭವಾಗಲಿದ್ದು, ದೇಶ, ವಿದೇಶಗಳ ಸುಮಾರು 550 ಲೇಖಕರು ಮತ್ತು ಕಲಾವಿದರು ಇದರಲ್ಲಿ ಪಾಲ್ಗೊಳ್ಳಲಿದ್ದಾರೆ.
ಐದು ದಿನಗಳ ಸಾಹಿತ್ಯ ಉತ್ಸವ ಇದಾಗಿದ್ದು, ಈ ಬಾರಿಯ ವಸ್ತುವಿಷಯ ‘ಸ್ಟೋರೀಸ್‌ ಯುನೈಟ್ ಅಸ್‌’ (ಕಥೆಗಳು ನಮ್ಮನ್ನು ಒಗ್ಗೂಡಿಸುತ್ತವೆ) ಎಂಬುದಾಗಿದೆ. ಸಾಹಿತ್ಯಕ್ಕಿರುವ ಪರಿವರ್ತನಾ ಶಕ್ತಿ, ಸಾಹಿತ್ಯವು ಹೇಗೆ ಸಮಾಜವನ್ನು ಪ್ರತಿಬಿಂಬಿಸುತ್ತದೆ ಮತ್ತು ಜನರನ್ನು ಹೇಗೆ ಒಗ್ಗೂಡಿಸುತ್ತದೆ ಎಂಬ ಅಂಶಗಳನ್ನು ಅನ್ವೇಷಿಸುವ ಗುರಿಯನ್ನು ಈ ಬಾರಿಯ ಜೆಎಲ್‌ಎಫ್‌ ಹೊಂದಿದೆ.
‘ಜೈಪುರದ ಕ್ಲಾರ್ಕ್ಸ್‌ ಅಮೆರ್‌ ಹೋಟೆಲ್‌ನಲ್ಲಿ ಈ ಬಾರಿಯ ಜೆಎಲ್‌ಎಫ್‌ ಜರುಗಲಿದೆ. ಸಾಹಿತ್ಯ ಉತ್ಸವದಲ್ಲಿ ಪಾಲ್ಗೊಳ್ಳುವಂತೆ ಸಾಹಿತ್ಯಾಸಕ್ತರಿಗೆ ಆಮಂತ್ರಿಸುತ್ತೇವೆ. ಜಾಗತಿಕ ಸಾಹಿತ್ಯ ಇತಿಹಾಸದಲ್ಲಿ ಮತ್ತೊಂದು ಮಹತ್ವದ ಅಧ್ಯಾಯವನ್ನು ನಾವೆಲ್ಲರೂ ಒಟ್ಟಾಗಿ ರಚಿಸೋಣ’ ಎಂದು ಜೆಎಲ್‌ಎಫ್‌ ಹೇಳಿದೆ.
