ನವದೆಹಲಿ: ಪ್ರಧಾನಿಯಾದ ಬಳಿಕ ಪ್ರತಿಬಾರಿ ಸ್ವಾತಂತ್ರ್ಯ ದಿನಾಚರಣೆಗೆ ಹೊಸ ಶೈಲಿಯ ರುಮಾಲು ತೊಡುವ ಸಂಪ್ರದಾಯವನ್ನು ನರೇಂದ್ರ ಮೋದಿ ಅವರು ಈ ಬಾರಿಯೂ ಮುಂದುವರಿಸಿದ್ದು, ರಾಜಸ್ಥಾನದ ಬಣ್ಣಬಣ್ಣಗಳ ರುಮಾಲು ಈ ಬಾರಿಯ ಅವರ ಆಯ್ಕೆಯಾಗಿತ್ತು.
ಐತಿಹಾಸಿಕ ಕೆಂಪುಕೋಟೆಯಲ್ಲಿ 10ನೇ ಬಾರಿ ಧ್ವಜಾರೋಹಣ ನೆರವೇರಿಸಿದ ಅವರು ರಾಜಸ್ಥಾನಿ ಶೈಲಿಯ ಪೇಟವನ್ನು ತೊಟ್ಟು ಭಾಷಣ ಮಾಡಿದರು.
ಬಾಂಧನಿ ಚಿತ್ರಗಳುಳ್ಳ ಈ ರುಮಾಲಿನಲ್ಲಿ ಹಳದಿ, ಹಸಿರು, ಕೆಂಪು ಬಣ್ಣಗಳನ್ನು ಢಾಳವಾಗಿ ಬಳಸಲಾಗಿದೆ. ಬಿಳಿ ಕುರ್ತಾ ಹಾಗೂ ಕಪ್ಪು ವಿ–ನೆಕ್ ಜಾಕೆಟ್ ತೊಟ್ಟಿದ್ದ ಪ್ರಧಾನಿ ಮೋದಿ ಅವರ ತಲೆ ಮೇಲಿನ ಬಣ್ಣಬಣ್ಣದ ರುಮಾಲು ಎದ್ದು ಕಾಣುವಂತಿತ್ತು.