‘ಕ್ವಿಂಟ್‌’ ಸಂಸ್ಥಾಪಕ ಬಹಲ್‌ಗೆ ಐ.ಟಿ ಬಿಸಿ

ತನಿಖೆ ನಡೆಯುತ್ತಿರುವ ಪ್ರಕರಣಕ್ಕೆ ಸಂಬಂಧಿಸಿದ ದಾಖಲೆಗಳು ಮತ್ತು ಇತರ ಸಾಕ್ಷ್ಯಗಳಿಗಾಗಿ ಹುಡುಕಾಟ ನಡೆದಿದೆ. ಇತರ ಕೆಲವರಿಗೆ ಸೇರಿದ ಸ್ಥಳಗಳಲ್ಲಿಯೂ ಶೋಧ ನಡೆಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

‘ರೀತು ಕಪೂರ್‌ ಅವರ ಡಿಜಿಟಲ್‌ ಸಾಧನಗಳಲ್ಲಿದ್ದ ದತ್ತಾಂಶದ ಪ್ರತಿ ಪಡೆದುಕೊಳ್ಳಲು ಐ.ಟಿ. ಅಧಿಕಾರಿಗಳು ಯತ್ನಿಸಿದ್ದಾರೆ. ಖಾಸಗಿತನದ ಹಕ್ಕಿಗೆ ಸಂಬಂಧಿಸಿದ ಕಾನೂನುಗಳು ಏನು ಮತ್ತು ಪತ್ರಕರ್ತೆಯಾಗಿ ಸಂಗ್ರಹಿಸಿದ ಮಾಹಿತಿ ಮತ್ತು ವೈಯಕ್ತಿಕ ಮಾಹಿತಿಯನ್ನು ಅಧಿಕಾರಿಗಳು ಪಡೆದುಕೊಳ್ಳಬಹುದೇ ಎಂದು ರೀತೂ ಕೂಗಿ ಕೇಳಿದರು. ಆಗ ನಾನು ಅವರ ಮನೆಯ ಹೊರಗೆ ಇದ್ದೆ. ಐ.ಟಿ.ಯ ಇಬ್ಬರು ಅಧಿಕಾರಿಗಳು ರೀತೂ ಅವರನ್ನು ಮನೆಯೊಳಕ್ಕೆ ಎಳೆದುಕೊಂಡರು’ ಎಂದು ‘ದ ಕ್ವಿಂಟ್‌’ನ ಸಹ ಸಂಪಾದಕಿ ಪೂನಮ್‌ ಅಗರ್‌ವಾಲ್‌ ಟ್ವೀಟ್‌ ಮಾಡಿದ್ದಾರೆ.

ರೀತೂ ಅವರು ‘ದ ಕ್ವಿಂಟ್‌’ನ ಸಹ ಸಂಸ್ಥಾಪಕಿ ಮತ್ತು ಮುಖ್ಯ ಕಾರ್ಯನಿರ್ವಹಣಾ ಅಧಿಕಾರಿ.ಐ.ಟಿ. ಅಧಿಕಾರಿಗಳು ‘ದ ಕ್ವಿಂಟ್‌’ ಕಚೇರಿ ಮತ್ತು ಅದರ ಸಂಸ್ಥಾಪಕರ ನಿವಾಸದಲ್ಲಿ ನಡೆಸಿದ ಶೋಧದ ಬಗ್ಗೆ ಭಾರತೀಯ ಸಂಪಾದಕರ ಕೂಟ (ಇಜಿಐ) ಕಳವಳ ವ್ಯಕ್ತಪಡಿಸಿದೆ.