ಭುಜ್‌: ಗುಜರಾತ್‌ನ ಮುಂದ್ರಾ ಬಂದರಿನಲ್ಲಿ 2,988 ಕೆ.ಜಿ. ಹೆರಾಯಿನ್ ಜಪ್ತಿ ಪ್ರಕರಣದ ಆರೋಪಿಯೊಬ್ಬ ಪಂಜಾಬ್‌ನಲ್ಲಿ ಪೊಲೀಸರ ವಶದಿಂದ ತಪ್ಪಿಸಿಕೊಂಡು, ಪರಾರಿಯಾಗಿರುವುದಾಗಿ ಪೊಲೀಸರು ಭಾನುವಾರ ಹೇಳಿದ್ದಾರೆ.
ಜೋಬನ್‌ಜಿತ್ ಸಿಂಗ್‌ ಸಂಧು ಪರಾರಿಯಾಗಿರುವ ಆರೋಪಿ.
‘ಹೆರಾಯಿನ್ ಜಪ್ತಿ ಪ್ರಕರಣದಲ್ಲಿ ಬಂಧಿತನಾಗಿದ್ದ ಸಂಧುನನ್ನು ಕಛ್ ಜೈಲಿನಲ್ಲಿ ಇರಿಸಲಾಗಿತ್ತು. ಬೇರೊಂದು ಪ್ರಕರಣ ಸಂಬಂಧ ನ್ಯಾಯಾಲಯಕ್ಕೆ ಹಾಜರುಪಡಿಸುವ ಸಲುವಾಗಿ ಪಂಜಾಬ್‌ನ ಅಮೃತಸರಕ್ಕೆ ಕರೆದೊಯ್ಯಲಾಗಿತ್ತು. ಮರಳಿ ಕರೆ ತರುವ ಸಂದರ್ಭದಲ್ಲಿ ಆರೋಪಿ ಶನಿವಾರ ಪರಾರಿಯಾಗಿದ್ದಾನೆ’ ಎಂದು ಕಛ್(ಪಶ್ಚಿಮ) ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಮಹೇಂದ್ರ ಬಗಾಡಿಯಾ ತಿಳಿಸಿದ್ದಾರೆ.
‘ಪಂಜಾಬ್‌ ಪೊಲೀಸರ ನೆರವಿನಿಂದ ಆರೋಪಿ ಪತ್ತೆಗೆ ಕಾರ್ಯಾಚರಣೆ ಕೈಗೊಳ್ಳಲಾಗಿದೆ’ ಎಂದೂ ಹೇಳಿದ್ದಾರೆ.
